PASTOTTO SUSTANZIUSO

PASTOTTO SUSTANZIUSO  chello ca ce vo’ pe sseje perzone 600 gramme ‘e avemmarie (tubbettielle rigate), 150 gramme ‘e pancetta a vvarriglie ‘e 5 cm. pe 2, pe uno, ‘na cepolla ndurata ‘e Muntoro ammunnata e ntretata suttile,  ‘na farinula pe bbroro veggetale, ‘nu bicchiere ‘e vino janco asciutto, ‘nu bicchiere e miezo d’uoglio ‘auliva dunciglio, 4 ove, ‘na bustina ‘e safrone, sale duppio ‘na vrancata, pepe janco macenato a ffrisco q.n.s. ‘nu puparunciello  percante (piccante)lavato, asciuttato e grabbato (inciso) p’ ‘o lluongo, 100 gramme ‘e pecurino rattato finu fino. ‘nu túppeto ‘e prutusino lavato, asciuttato e ntretato finu fino.

Comme se fa  Dinto a ‘na prupurziunata cazzarola pruvvista ‘e cupierchio  a ffuoco allero cu ‘nu bicchiere d’uoglio suassà ‘e vvarriglie  ‘e pancetta cu ‘nu puparunciello  percante (piccante)lavato, asciuttato e grabbato (inciso) p’ ‘o lluongo e mantenere ‘ncaudo;  cu dduje litre d’acqua vullente  e ‘a farinula  appruntà ‘o bbroro, accumpliarve ‘a  bustina ‘e safrone, metterlo a ffuoco allero e appena ‘o bbroro jesce a vvollere, àrverve a meza cuttura ll’avemmarie e revacarle dinto â cazzarola cu ‘a cunnimma, e lla a ffuoco miccio cumpletà ‘a cuttura agnadenno poco â vota tutt’ ‘o bbroro ca à dda essere assurbito tuttu quanto.Quase a  ffenetura ‘e  cuttura, sbattere ll’ova e  derrammarle  ‘ncopp’ô pastotto ‘nzieme a  tutt’ ‘o ccaso,tuiglià ‘nu poco,cummiglià ‘a cazzarola e lassà a ffuoco doce nfi’ a cche ll’ova se so’amalgamate; a ‘stu punto stutà ‘o ffuoco, misturà pe quacche mminuto, derrammà  cu  ‘nu túppeto ‘e prutusino lavato, asciuttato e ntretato finu fino, ‘mpiattà cumpletanno ‘e purzione cu abbunnante pepe janco mmacenato a ffrisco. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute e scialàteve!! Raffaele Bracale