RICATUNE MANTECATE CU ‘E CARCIOFFOLE

 

RICATUNE MANTECATE CU ‘E CARCIOFFOLE

 

Chello ca ce vo’ pe sseje perzone

600 gramme ‘e ricatune,

6 carcioffole viulette napulitane,

300 gramme ‘e ricotta ‘e pecura,

½ bicchiere ‘e latte caudo retunno,

‘nu bicchiere d’ uoglio ‘auliva dunciglio,

100 gramme ‘e caso pecurino rattato finu fino,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata,

sale fino e ppepe janco macenato a ffrisco q.n.s.

 

Comme se fa

 

Ammunnà ‘e carcioffole ammuzzanno ‘o turzo, levànnone ‘e pparte e ‘e  cchiú ttoste,e muzzanno ‘e pponte cu ‘e spine; tagliarle  a mmità p ‘ ‘o lluongo, levà ‘a varva  e ssempe p’ ‘o lluongo tagliarle a fellocce suttile e  metterle a bbagno dinto a ‘na  ciotola d’ acqua e zuco ‘e limone pe ‘nu quarto d’ora. Scularle, asciuttarle cu ‘nu foglio ‘e carta asciugante pe cucina, metterle dinto a ‘na ‘nzalaterella e cunnirle cu ll’uoglio, ‘o ssale fino e ‘o ppepe janco macenato a ffrisco.A ‘stu punto dellajà dinto a ‘na prupurziunata ‘nzalatèra ‘a ricotta cu ‘o miezu bicchiere‘e latte caudo retunno. Fraditanto arevere teniente teniente ‘e ricatune dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â ‘nsalatèra cu ‘a ricotta.Ammiscà, derrammà cu ‘o ccaso pecurino e cu ‘o tuppeto ‘e prutusino lavato, asciuttato e ntretato finu fino; agnadí, cu ll’uoglio  ‘e cunnimma,   ‘e fellocce ‘e carcioffole, ammiscà ancòra e ‘mpiattà. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale