RICCE ‘E FURETANA â SURRENTINA

RICCE ‘E FURETANA â SURRENTINA   chello ca serve pe sseje perzone   600 gramme ‘e ricce ‘e furetana,  miezu chilò ‘e mulignane viulette napulitane, 400 gramme ‘e passata ‘e pummarola, ‘na cepolla ndurata ‘e Muntoro  ammunnata e ntretata, ‘nu  puparunciello  pirciante (piccante)lavato, asciuttato e grabbato (inciso) p’ ‘o lluongo, 400 gramme ‘e muzzarella tagliata a ffarinule piccerelle, ‘nu bicchiere d’uoglio ‘auliva dunciglio,   sale duppio ‘ddoje  vrancate, sale fino e ppepe janco mmacenato a ffrisco q.n.s. 100 gramme ‘e pecurino rattato finu fino, ‘nu tuppeto ‘e prutusino lavato, asciuttato e  ntretato.   comme se fa    Lavà e asciuttà ‘e mulignane levanno ‘e streppune e ‘e ddoje ponte; tagliarle a felle doppie  dduje centimetre e sestimarle a ccuscie (derrammate ognuno ‘e sale duppio) dinto a ‘nu scolapasta pe ‘na mez’ora. Scularle, sciacquarle sotto a ‘nu strèpeto d’acqua fredda, spremmerle a tagliarle a ffarinule ‘e tre centimetre pe dduje  pe ttre. Sciacquarle ancòra. Dinto a ‘na prupurziunata tiella ricà ll’uoglio cu ‘o ttrigliato ‘e cepolla e tenerlo a ffuoco miccio nfi’ a cche nun à  pigliato  culore; agnadí ‘e ffarinule ‘e mulignane,   aizà ‘o ffuoco e fà cocere pe ddiece minute; auní ‘a passata ‘e pummarole, ‘o puparunciello  pirciante (piccante)lavato, asciuttato e grabbato (incisi) p’ ‘o lluongo,e fà cocere pe n’ati ddiece   minuti, ma avascianno ‘o  ffuoco  e ammiscanno spisso;  agghiustà ‘e sale fino e mantené ‘ncaudo.     Àrvere teniente teniente ‘e ricce ‘e furetane dinto a otto litre ‘e acqua vullente salata (vrancata ‘e sale duppio), scularle e revacarle  dint’ â tiella cu ‘o zzuco caudo. Tenerle a ffuoco allero pe ‘nu paro ‘e minute e a ll’urdemo,  fora dô ffuoco, derrammàrle cu ‘nu tuppeto ‘e prutusino lavato, asciuttato e  ntretato. Ammiscà, ‘mpiattà derrammà cu ‘o ccaso e ‘o ppepe mmacenato a ffrisco  e serví caude ‘e fuculare ‘sti sabruse ricce ‘e furetane â surrentina.   Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e aggarbbatéve ‘o vernecale!! Raffaele Bracale