VERMICIELLE AMMULLECATE

VERMICIELLE AMMULLECATE

 

Chello ca ce vo’ pe sseje perzone:

600 gramme ‘e   vermecielle ( no ‘e spavette!)

‘nu bicchiere e miezo d’ uoglio ‘auliva dunciglio,

dduje spicule d’aglio ammunnate e ntretate finu fino,

100 gramme ‘e sulumiglie d’alicesalate  sott’uoglio ,

100 gramme d’ aulive nere desciussate,

sale duppio ‘na vrancata,

300 gramme ‘e mullica ‘e pane casareccio arruscata ô tiesto e ppo ntretata cu ‘nu mmiscaturo,

100 gramme ‘e caso  pecurino rattato finu fino,

50 gramme ‘e pignuole arruscate ô tiesto,

50 gramme d’uva passa  ammullata e spremmuta,

sale fino e ppepe janco mmacenato a ffrisco q.n.s.

‘nu tuppeto ‘e prutusino lavato, asciuttato e  ntretato.

 

comme se fa

Appruntà ‘a mullica ‘e pane arruscata e ntretata e ammiscarla cu ‘o ccaso pecurino.Ricà tutto dint’ a ‘na tiella cu ‘a mmità ‘e ll’uoglio e tenerlo  a ffuoco allero pe cinche minute.Tené ‘e parte. Appruntà ‘e pignuole ô tiesto e ammullà ll’uva passa cu  poca acqua vullente e spremmerla. Ricà ‘o riesto ‘e ll’uoglio dint’ a ‘na prupurziunata tiella e a ffuoco allero fà piglià culore ô ttrigliato d’aglio; agnadí ‘e sulumiglie d’alicesalata e farle accumplià scamazzanno cu ‘a ponta ‘e ‘na cucchiarella; agnadí‘e pignuole arruscate ô tiesto, ll’uva passa  ammullata e spremmuta e ll’aulive desciussate e fà ‘nzaputí tutto pe cinche minute a ffuoco doce; mantené ‘ncaudo.  Àrvere teniente teniente ‘e vermecielle dinto a otto litre ‘e acqua vullente salata (vrancata ‘e sale duppio), scularle e ancòra ummete d’acqua  revacarle  dint’ â tiella cu ‘o zuchillo cu ll’alicesalate  ancòra caudo.Ammiscà e agnadirve ‘a mullica ‘e pane ammiscata cu ‘o ccaso pecurino;tenerle a ffuoco allero pe ‘nu paro ‘e minute e a ll’urdemo,  fora dô ffuoco, derrammàrle cu ‘nu tuppeto ‘e prutusino lavato, asciuttato e  ntretato. Ammiscà, ‘mpiattà e serví derrammanno ògne purzione cu abbunnante pepe janco mmacenato a ffrisco. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale