NAPOLI – ATALANTA (17.10.20)4 A 1 ‘A VEDETTE ACCUSSÍ

NAPOLI – ATALANTA (17.10.20)4 A 1

‘A VEDETTE ACCUSSÍ

Canta Napoli, guagliú! Napule a sbraso! Ajere, ‘mmerz’ê ttre ô san Paolo ‘nnante a scarze mille masciadde (spettatori) raccumannate ‘a scuatra cuana ‘ncartaje  quatto  sfugliatelle ricce â scuatra ‘e Gasperini  ca se sta ancòra rusecanno ‘o limone p’’a fijura ‘e niente ca facetteno ‘e suoje pigliate a ppallunate dô Ciuccio pe ttutto ‘o primmo ajone fenuto quatto a zzero senza ca lumbarde fósseno capace ‘e fa ‘o cellechio ê nuoste. Peccato, peccato però pe chell’addaffa (rete) cuncessa dê nuoste, pe bbia ‘e ‘nu paro ‘e sfurtunate artidadde (rimpalle) ca ô 69’ lassajeno campo   a Llammers(o) ca libbero franco jette fottere troppo ‘a vicino  a Ppastacrisciuta ca nun ce putette fà niente…    cosa  ca nun ce cunzentette ‘e nchiudere ‘a mubbara (partita) cu ‘a porta acrata (inviolata) comme ce stevemo abbituanno! Peccato. Però ‘a suddisfazziona pe ll’arnassa (vittoria) cunquistata fove ô stesso grossa assaje e vvoglio sperà ca cuntinuammo accussí cosa pussibbile datose ca ajere ‘a scuatra d’ ‘o Ciuccio dimustraje d’essere forte cu ssette parme ‘e saciccio, visto ca jucaje no contro a ‘na maniata ‘e profuche, ma  contr’â scuatra primma ‘ncrassifica i ‘e mmettette sotto, ne facette carna pe ppurpette. E avesse pure pututo esaggerà.Accuntentammoce, allimmeno p’’o mumento.

    Passammo ‘e ppaggelle:

OSPINA[Pastacrisciuta] 6,5 – Se spassaje  a gguardà ê cumpagne suoje ca tagliavano campo e avverzarie cumme e cquanno vulevano; maje chiammato a ffà coccosa  facette vedé ca cu ‘e piere ce sape fà puggianno (rilanciando) p’’e suoje sempe cu ppricisione cumme succedette ô 43’ quanno piscaje a Ccaromecosta cu ‘nu pallone a mmesura      ca ‘o niggeriano facette addeventà ‘a primma addaffa (rete) soja cu ‘a maglia d’’o Napule.Surtunato,  pe ppoche centimetre nun riuscette a ffermà ‘o pallone ‘e  Lammers(o)    

DI LORENZO 6,5 Facette ‘o ssuĵo, cullabburanno, diammannose (sovrapponendosi) e ccuntrullanno a mmestiere a  Ggosens(o).

MANOLAS[Chitelassa] 6,5  Nun cuncedette niente a nnisciuno, sempe presente pure cu ‘e ttriste quanno fove nicessario e Zzapata se n’addunaje!

 

KOULIBALY[‘O Ggialante] 6,5 – Ce mettette forza e attenziona risultanno’nsuperabbile; jucaje tanti pallune partenno da vascio e ppruvaje a ffarese vedé ‘nnante cchiú ‘e ‘na vota.

 

 HYSAJ[Mezacucchiara] 6,5  Se vedette ca a mmancina se trova bbuono, difennete, mantenette ‘a linia e diammaje (appoggiò) sempe cu pricisione.

 

 RUIZ[Anemalonga] 6,5 Cchiú libbero ‘e tajennà (impostare) se truvaje assaje bbuono cu ‘o Mammone ca lle guardaje ‘e spalle; truvaje sempe ‘e mmesure juste pe ffà nascere n’azziona periculosa cagnanno juoco e mmettennoce ‘a cegna (grinta) nicessaria. [Da ll’ 83' DEMME 6 ‘e stima]

 

BAKAYOKO[‘O Mammone] 7 Presenza ‘e sustanza ca se facette sèntere,’nu cumbattente pronto a ffà ‘o mastino i a mutajffà (raddoppiare). Ll’ommo ca ceb vuleva! [Dô 75' LOBOTKA 6 ‘e stima]

 

POLITANO 7 Attaccaje e rrafaddaje (spinse) cercanno spisso a Llozano da ll’auta bbanna; ô 30’ mettette ‘a firma sotto a n’addaffa (rete) overo bbella.[Dô 60' GHOULAM 6 – Trasette a ccose fatte jucanno, senza fessarie,  a ccarigginno (esterno) auto].

 

 MERTENS[Ciruzzo] 6,5 Bbona atalossa (prestazione)’nfra ‘e llinie dànno ‘mpiccio e apprenziona ê lunbarde ‘e Gasperini; bbona ‘a ‘ntesa cu ‘e duje carigginne (esterni). Sportiello lle anniaje ‘a priezza ‘e ll’addaffa  (gol) ca se fósse mmeretata. [Dô 75' MALCUIT 6 ‘e stima].

 

 LOZANO 8  Tacnia,zureja (tecnica e velocità) e sustanza , natu jucatore a ppietto a cchillo ‘e primma! N’ata pareglia(doppietta)!’A primma addaffa  (gol) fove  facile facile,ma ‘a siconna assaje bbella.  il secondo molto bello.

 

 OSIMHEN[Caromecosta] 7,5 – ‘Nu demmonio quanno parte a ccapa sotto! E ccumme ‘o firme  quanno vola cantanno dànno rispiro e appujo  (supporto) a tutta ‘a scuatra?  Finalmente ‘o Napoli à truvato ‘nu nassio (attaccante) capace ‘e fa sezziona (reparto) a ppe isso sulo ‘e cuntrullà pallune avete e dde fa spazzio ê cumpagne,purtannose arreto cchiú avverzarie cumme nn’accosione dììa siconna addaffa (rete) ‘e Lozano; troppo bbello ‘o  primmo stuco (gol) cu ‘a maglia luvarda quanno Caromecosta cuntrullaje ‘nu lanzo ‘e Pastacrisciuta e lassaje partí ‘na sciabbulata ‘nchianaterra da paricchi metre.Finalmente ‘nu granne jucatore ca fa scuatra! [Da ll'83' PETAGNA 6 ‘e stima]

all. GATTUSO 8,5 – ‘Nu Napule overo bbello ca jucaje cu ccegna  (grinta),cuncentrato e ddivertennose; tutto matàlo (perfetto) o quase pecché mancano ancòra ‘nu pizzeco ‘e cazzimma  e ll’asciarra (cattiveria)ca ce vo’ quanno s’à dda ‘mpedí a ll’avverzarie quacche timidda (ripartenza) periculosa.

E ffermammoce cca cuntente d’esserce miso dint’â sacca n’ati tre ppunte ‘ncopp’a ttre mubbare (partite) jucate, â faccia d’’a vecchia zoccola, d’’a federazziona e dde chi male ce vo’!

Mo, si ‘o Cielo ‘o vvo’ ce sentimmo viernarí ca vène pe ccuntarve chello ca succede gioverí ô san Paolo contro a ll ulandese ’e ll’ AZ Alkmaar(re) p’’a tarra (sfida) d’’a cuppetta aiuropea. Sperammo ‘e nun sunnarce ‘nu bbruttu suonno!

Staveti bbe’! R.Bracale Brak