NAPOLI- SASSUOLO [01.11.20] 0 A 2 ‘A VEDETTE ACCUSSÍ

NAPOLI- SASSUOLO [01.11.20] 0 A 2

‘A VEDETTE ACCUSSÍ

Mannaggia ê cane ‘e massaria guagliú, che collera e cche scuorno; ajere a ll’ra d’’e ppastarelle e dd’’o rusolio ‘o Ciuccio facette ô san San Paolo ‘na fijura ‘e seje sorde facennose vattere pe ddoje a zzero dô Sassuolo [‘na scuatra scamosa, tosta e ccazzera, assineja (satellite) d’’a vecchia zoccola ca se defennette aizanno ‘na bbarràcema (barricata) addó ‘e nuoste jetteno a ttuzzà e nnun foveno capace ‘e passà, mentre lloro, ajutate da ll’ucummo (arbitro) Mariani 4 e ppo ve dico,ce futtetteno ddoje vote e abbuscajemo; ma pe fforza, pe fforza, ajere ‘a scuatra nosta  nun  fove all ‘ardezza d’’a situazziona, passaje ‘na bbona mez’ora a sturià ll’avverzario senza capirce ‘nu saciccio e cqua’ pisce piglià e ppe ttutt’’o riesto d’’o sibbacco (match) fove troppo cumpassata, bbatieja (lenta) e ssenza ficre (idee) e cquanno ne truvaje una, sotto porta smarrunajeno mo uno mo n’ato  e gghiette a fferní cumme v’aggiu ditto. A ‘stu punto, amariggiato cumme sto’, nun valesse ‘a pena ‘e fà paggelle e mmettesse quatto a ttutte quante  ma nunn’è gghiusto e ppe nun fa zimmare e crapette una mbulletta, dongo chello ca ogneduno, pe mme se mmeretaje:

OSPINA[Pastacrisciuta] 6,5 Nun tenette itimme (colpe) ‘ncopp’ê ddoje addaffe pigliate e ffove overo bbravo a ddicere ‘e no ‘na vota  a Bboga e ‘na vota a  Rrogerio.

DI LORENZO 5  Se facette apprezzà  quanno se racabbaje  (sovrappose) a Ppolitano, ma  sufferette quanno fove  attaccato i asasa (soprattutto) s’êsse avuto ‘a sparagnà ‘a scarpesata  a Rraspadori ca ll’ucummo liggette pe ricore a ffavore d’’o Sassuolo.

 

MANOLAS[Chitelassa] 5,5  Doppo ‘nu bbuonu primmo ajone (tempo) se facette nutizzià (ammonire), se ‘ncazzaje doppo ca se vedette cassà (annullare) ‘o stuco (gol) d’’o pussibbile uno a uno e nnun riuscette a ffermà ô 95’ a Llopez(ze) ca facette ‘o doje a zzero. Peccato.

 

KOULIBALY[‘O Ggialante] 6,5  Uno d’’e poche a sse salvà dint’â bbrutta serata d’’o Ciuccio: tanti tacculle mumazze  (interventi ottimi), tanti tacatamme (anticipi), tante repartite (ripartenze) palla ô pere.

 

HYSAJ[Mezacucchiara] 6   Tutto summato quacche bbona jucata ‘a facette vedé pure si nunn’ è ffatto pe stà  a mmancina, ma  nun saccio si Gattuso facette bbuono a   chiammareselo ‘mpanca vinte minuto primma ca fenesse ‘a mubbara (partita) [dô 70' RUI 5 – Nun migliuraje ‘a situazziona, nun facette ‘nu jabbro (cross) decente e asasa (soprattutto)ô 95’ appustiato ‘ncopp’â linia d’’a porta nosta, se ‘mpappinaje piere e ppiere e nnun riuscette a ffermà ‘o pallone d’’o doje a zzero.]

 

RUIZ[Anemalonga] 5  Serata no. Giraje a vvacante spustanno ‘o pallone da cca e dda lla, ma senza zuco e ccontro a  Llocatelli i a  Lopez(ze) nce refunnette tierzo e ccapitale; nun riuscette a sfruttà ‘na bbona palla fermato da  Consigli ca ‘o stuppaje.

BAKAYOKO 6  Tutto summato facette ‘o suĵo facennose sentere ‘mmiez’ô campo, dispaíto (nonostante) ll’azzimma (sconfitta).

 

POLITANO 6,5 Fove ‘o sulo a mmettere ‘ndifficultà ‘a trasera (difesa) emigliana risultanno ‘o meglio d’’a sezziona  (reparto) uffenziva d’’o  Napule. [dô 78'  ZIELINSKI s.v.]

 

MERTENS[Ciruzzo] 4,5  Me dispiace, ma pure isso nun fove a ll’ardezza d’’a situazziona; brutta serata ‘a soja ca tiraje da fora, sbaglianno mira, ‘nu paro ‘e vote e asasa (sioprattutto) se magnaje ‘o pussibbile uno a uno sulo ‘nnante a Cconsigli. [dô 70'  ELMAS[‘O Turco] 5  Se vedette poco e nniente.]

 

LOZANO 4,5  Aizaje fummo e porvera sbaglianno assaje e ccunchiudenno poco e Ggattuso se ll’êtte ‘a chiammà ‘mpanca mez’ora primma ca fenesse. [dô 65'  PETAGNA 5  Nun se rennette maje periculuso e sí e nno fove capace ‘e piglià palla e ddarla.]

 

OSIMHEN[Caromecosta] 4,5 Ce mettette sulo bbona vuluntà, ma nun riuscette maje a ddà sustanza â fatica soja tiranno ‘mporta o jabbranno (crossando) p’’e cumpagne.  Difficile, se non impossibile, tenerlo dal punto di vista fisico. Ma quando deve concretizzare la propria mole di lavoro, ovvero calciare a rete o crossare per i compagni, è un mezzo disastro.

 

all. GATTUSO 4,5  Quanno s’abbusca ll’itimma è ‘mprimmose d’’o mutarribbo (allenatore) ca ajere ce capette poco e nnun priparaje a dduvere’o sibbacco (match). Pure ‘e cagne nun migliurajeno ‘a facenna. Peccato.

 arb. MARIANI 4 E ll’aggiu trattato a ‘stu rumaniso ca nce aveva sempe purtato bbuono ma ca ajere ce trattaje ‘na chiaveca; sentiteme: ‘nnaccasione d’’o ricore dato ô Sassuolo se facette cundizziunà dô culleco d’’a Varra ca lle cunzola â zia moneca,  jette a vvedé, ma  cu ll’uocchie nchiuse e  nnun se rennette cunto ca sí Di Lorenzo êva sí e nno scarpesato ‘nu pere ‘e Raspadori, ma senza farlo niente tant’è overo ca ll’emigliano facette ancòra ‘nu pare ‘e metre primma ‘e menarese ‘nterra; piezzo e ppejo ‘ncopp’â siconna addaffa (rete) quanno nun cecaje a vvedé ca Caromecosta fove tirato p’’a maglietta  mentre cercava ‘e trasí dint’â muntaca (area di rigore) emigliana e nnun ce siscaje ‘a timmurria (punizione) a ffavore; nurmale ca ‘ncopp’ô caputiamento,ô 95’, cu ‘o Napule tutto annante, Maxime Lopez(ze) riuscesse a ssignà…

E femammoce cca. Mo cumme a mmo nun saccio ancòra, quanno – si ‘o Cielo ‘o vvo’ – ce sentimmo.

 Dammoce ‘nu pizzeco ‘ncopp’â panza e staveti bbe’.R. Bracale Brak