NAPOLI – BOLOGNA [7.3.21]3 A 1 ‘A VEDETTE ACCUSSÍ

 

NAPOLI – BOLOGNA [7.3.21]3 A 1

‘A VEDETTE ACCUSSÍ

Bbuono accussí guagliú! Chilli tre ppunte ca ajeressera ô Maradona ‘o Napule contr’ê mmurtadelle d’’o zincaro se mettette dint’â sacca nce serveveno, nce erano assulutamente nicessarie   asasa (soprattutto) doppo  d’’e duje punte perze da fesse, all’urdemu minuto contr’ô Sassuolo… e mmenu male ca ajere nun cuncedettemo ‘o bbisse e, v’aggiu ditto, affuzzajemo (vincemmo) pe ttre a ddoje doppo ‘nu bbellu sibbacco (match) jucato p’affuzzà (vincere) lassanno sulo ‘na ventina ‘e minute ê murtadelle.

 Tre ppunte d’oro pirciò chille d’ajere   o ‘mmece nunn avessemo cchiú pututo luttà pe ‘nu posto ‘nCiampionsa, lotta ca po’ cuntinuà doppo d’’o sibbacco (match) contr’ô Bbulogna affuzzato (vinto) cu ddoje addaffe (reti) d’’o capitano Insigne [una a ll’8’ e n’ata ô 76’], cu ‘nu stuco ‘e Caromecosta ô 66’ e  ll’inutile addaffa  (rete) ‘e Soriano ô 73’.’Nfra ‘e ccose da arricurdà nce fove pure ‘nu stuco (gol) ‘e Palacio cassato [i a rraggiona!]  da ll’ucummo (arbitro) e asasa (soprattutto) ‘o guajo [nun sapimmo ancòra quanto ‘mpurtante..] capitato ô 21’ a  Ghoulam(me) ca se nn’êtte âscí! Ora mo ‘e cuane, perzeguitate da scarogna e da additte (infortuni),  se trovano  a mneno tre dâ Roma quarta, ma cu ‘na mubbara  (partita) mancante  [‘o ricupero ‘ncasa d’’a vecchia zoccola ,’mprugramma p’’e diciassette ‘e ‘stu mese ca vene a essere de fuoco datose ca ce ll’âmm’’a  pure vedé dummeneca 14 cu ‘o Milan(ne) i ê 21 cu ‘a Roma…]. Sperammo ca fradintanto riuscimmo a rricuperà allimmeno Lozano! Passammo ê ppaggelle:

OSPINA[Pastacrisciuta] 7,5 Dduje bbelli tacculle (interventi) ‘nfra ‘e pale e ‘nu paro d’asciute aute. Nun tenette itimme (colpe) ‘ncopp’ô stuco (gol)’e Soriano e sse cumpurtaje bbuono dànno ammanna (sicurezza) â trasera (difesa).

 

DI LORENZO 6,5  Sempe attiento lla ddereto guardannose  ‘a curzia ‘e dritta cu itidda  (diligenza) e ppricisione e appena putette scennenno pure ‘nnante.

 

RRAHMANI 6 – Avette primma piglià ‘e mmesure, ma po truvaje ‘a zurea (ritmo) justa il ritmo giusto e ss’abbuscaje ‘o ggranone.

 

KOULIBALY[‘O Ggialante] 6,5  Atalossa (prestazione) attienta , pricisa e ssenza sfregazze (sbavature cu ttutto ca se ll’êtte ‘a vedé cu n’accunto scamuso cumm’è Ppalacio!

 

GHOULAM 6 - Veramente jellato. Doppo appena 21 minute se n’êtte âscí pe ‘nu guajo ô denucchio…

[Dô 22' HYSAJ[Mezacucchiara] 6 Trasette e ffacette tutto ‘o duvere suojo.

 

 RUIZ[Anemalonga] 6  Jucaje bunariello, ma è ancòra luntano parente d’’o jucatore ‘e ‘na vota: ajere facette cchiú ‘e ‘nu sfregazzo (sbavatura). Peccato.

 

DEMME 5  Me dispiace levarle ‘nu zifo (voto) pecché nsi’ ô 73’ êva jucato bbuono, ma nun pozzo perdunarle ‘a fessaria ca favurette ‘o stuco  (gol) ‘e Soriano.

 

ZIELINSKI 7,5 Jucatore ‘e n’ata pata: arvasatto  (centrocampista) sensazziunale.Se facette vedé pe ttutt’’o campo e asasa(soprattutto) fove isso ca cu dduje granni missidde (assist) mannaje ‘mporta primma a Insigne e ppo a Ccaromecosta. Nun se ne po’ ffà a mmeno!

 

[Dô 79' ELMAS[‚O Turco] S.v.]

 

POLITANO 5,5  ‘A chiena i ‘a vacante; tentaje ‘e sfunnà a ddritta, ma facette fetecchia; quacche bbona ficra (idea) ca nun addivintaje rialtà.

 

MERTENS[Ciruzzo] 5 Nun ce simmo, nunn’è ancòra isso cumme contro ô  Sassuolo, fove  troppo frenato e mmaje  periculuso.

[Dô 53' OSIMHEN[Caromecosta] 7 Trasette subbeto ‘nsibbacco (nel match)e ttruvaje quase subbeto ‘o stuco (gol) magnannose ‘o campo; ‘e cchiú appacciucaje  (propiziò) pure  ‘o tre a uno d’’o capitano.

 

INSIGNE 7,5  Fove uno d’’e meglie d’’e suoje, jucaje p’’a scuatra e ccercaje spisso ‘a porta signanno ‘na pareglia d’addaffe (reti). Jucasse sempr accussí!

[Dô 79'  RUI s.v.

all. GATTUSO 6  Tutto summato ‘a scuatra soja facette ‘o nnicessario,  sufferenno sí e nno ‘nu quarto d’ora, ma po truvaje n’arnassa (vittoria) funnamentale ‘nvista d’’a  semmana cchiú ‘mpurtante d’’a caracuddamma  (stagione calcistica).

Arb. CHIFFI 6- ‘A chiena i ‘a vacante.

E nnun dicimmo ‘e cchiú. Mo si ‘o Cielo ‘o ppermette ce sentimmo llunnerí ca vene pe ccuntareve che succere dummeneca  a ssera ô Meazza contro ê diavule russe e nnire. Facimmo corne e Cciuccio fa’ tu! Staveti bbe’. R.Bracale Brak