‘A PUPATELLA I ‘O PAPPAGNACCO 2ª parte

NCE STEVA ‘NA VOTA

Cunte a mmanèra mia.

[Si Perreault nun fósse stato frangese,  e ffósse nato ‘mmiez’ô Mercato a Nnapule  i avesse scritto a llengua napulitana…]

‘A PUPATELLA I ‘O PAPPAGNACCO

[La bella e la bestia] 2ª parte

‘E ddoje guaglione cchiú strappate  risponnetteno ca no, nun ne  vulevano sapé ‘e lassà ‘a città, addó teneveno cchiú ‘e ‘nu spasimante, ca, dicevano lloro, erano pronte a spusarsele pure senza ca fósseno addutate. Però ‘e ppuverelle se sbagliaveno assaje pecché,cumme addeventajeno appezzentute, ògne spasimante pigliaje ‘o llargo. Datose po ca ‘e ddoje guaglione erano superbiose, erano disprezzate ‘a tutte ca dicevano: “Nun s’ammeretano d’essere cumpiatite; è gghiusto ch’ànno avuto avascià ‘e ccorne; mo ponno jí a ffà ‘e ssignore sulo arrete ê ppecure i ê curdische!”

Però dicevano pure tutte quante: “ Ce dispiace sulo p’’a disgrazzia capitata  Ppupatella ch’è ‘na ‘bbona guagliona, sguazzona cu ‘e puverielle,affettulosa i affabbele!”

Cumminfatte ce foveno ‘nfra ll’ate paricchi cavaliere ca s’’a vulevano spusà cu ttutte ca nun fósse cchiú addutata ‘e denaro,  ma essa dicette ca nun s’’a senteva proprio ‘e lassà ô pate povero e vvicchiariello ‘int’â scajenza e ca fósse juto cu isso ‘mmiez’â campagna pe ccunzularlo e ddarele ‘na mana ‘int’ê ffatiche. E ccu ttutto ca ô pprincipio nc’era rummanata male avenno perzo  ògne sustanza, se cunzulava ‘ncapo a essa stessa cundicennose: “Pure ca i’ m’’a chiagnesse tutt’’e juorne nun ne cacciasse niente d’’o pperduto; è mmeglio pirciò  cercà d’essere felice pure senza ‘nu centesimo ‘int’â sacca!”

Appena arrivate â  casa ‘e campagna, ciràulo i ‘e ttre ffiglie soje accumminciajeno a zzappà ‘a terra; Pupatella s’ aizava ê cquatto â matina pe ppulezzà casa e ppriparà ‘o mmagnà p’’a famiglia.

A ll’accummenzaglia nce malepateva ‘nu poco pe bbia ca nunn’era abbituata a ccancariarese cumme a ‘na vajassa, ma ‘ncapo ‘e ‘nu paro ‘e mise se facette cchiú chiantuta  e, ffaticanno tutt’’a jurnata,se percacciaje ‘na saluta ‘e fierro; quanno êva fenuto ‘e ffacenne se metteva a lleggere o a ssunà ‘a spenetta  sempe ca nun cantariasse o filasse ‘a lana. ‘Mmece ‘e ssore se sfastediavano assaje datose ca se suseveno mmerz’ê ddiece d’’a matina e ppo jeveno a spasso pe ttutt’’a jurnata e sse diverteveno arricurdannose  ‘e scicche custume i ‘a bbella suggità ‘e ‘na vota.

R.Bracale (continua)