‘A PUPATELLA I ‘O PAPPAGNACCO prima parte

NCE STEVA ‘NA VOTA

Cunte a mmanèra mia.

[Si Perreault nun fósse stato frangese,  e ffósse nato ‘mmiez’ô Mercato a Nnapule  i avesse scritto a llengua napulitana…]

‘A PUPATELLA I ‘O PAPPAGNACCO

[La bella e la bestia] 1ª parte

 

Nce steva ‘na vota ‘nu ciràulo, virulo, ma  ricco sfunnato ca teneva seje figlie:tre mascule  e ttre ffemmene e ddatose ch’era ommo ‘e munno e ssapeva campà nun êva sparagnato denaro p’ aducà tutt’’a figliulanza soja dànno a ògnuno d’’e seje figlie ‘e meglie prufessure; ‘e ffiglie erano tutte  assaje bbelle, ma ‘a cchiú ppiccerella era ‘na vera maraviglia e dda quanno era nata tutte ‘a chiammajeno Pupatella  ca lle rummanette pe contranomme, cosa ca scatenaje ‘a ggelusia d’’e ssore.

‘Sta guagliona nun sulo era ‘a cchiú bbella, ma pure ‘a cchiú aunesta ‘e ll’ate; ‘e ddoje cchiú ggrosse, datose ch’erano ricche, s’’a penzavano assaje,  tenevano ‘a vavia d’’e ssignore  nobbile e nun vulevano stà ‘ncumpagnia cu ‘e ffiglie d’ati ciràule e ss’’a facevano sulo cu cchi teneva quarte ‘e nubbiltà. Jeveno a ògne ffestino, ê bballe,a ttriato, a spasso  e giacché se sapeva ca stevano bbone a ddenare, paricchi figlie ‘e ciràule overo gruosse s’’e vvulevano spusà, ma lloro chiaro e ttunno dicetteno ca  se fosseno  mmaretate sulo cu ‘nu Duca o, a ddicere poco, cu ‘nu conte; pe pparta soja ‘mmece  ‘a cchiú ppiccerella  nun se cumpurtava comm’ê ssore e passava bbona parte d’’o tiempo suĵo no a spassarsela, ma a lleggere bbuoni libbre e ccu ttutto chesto  pur’essa avette cchiú ‘e ‘na pruposta ‘e spusarizzio; però essa ringrazziaje cu bbona crianza  chille ca s’’a vulevano spusà e ddicette  ch’era  troppo guagliona e ca vuleva tené cumpagnia ancòra pe cquacche anno ô pate vicchiariello.

 Ora mo capitaje  ca tutto ‘nzieme  ô ciràulo ‘na notte ll’arrubbajeno tutt’’a mercanzia i ‘o puveriello jette sotto e ‘ncoppa facenno  fallenza e nnun lle rummanette ca ‘na casarella assaje luntana e ffove custretto a ddicere, cu ‘e llacreme a ll’uocchie, ê figlie ca s’êven’’a rassignà a gghí ‘e casa dint’a cchella casarella fora mano e, ppe ccampà, s’êven’’a rassignà a zzappà ‘a terra.  Brak(continua)