FRITTATA ‘E PATANE

 

 

 

FRITTATA ‘E PATANE

Chello ca serve pe cquatto perzone:

400 gramme ‘e patane vecchie jalizze,

5 ova,

‘na fraschetella ‘e rosamarina,

‘nu spiculo d’aglio ammunnato e ntretato,

50 gramme ‘e ‘nzogna

½ bicchiere d’uoglio dunciglio,

duje cucchiare ‘e caso pecurino rattato,

‘na vrancata ‘e sale duppio,

sale fino e ppepe janco mmacenato a ffrisco q.c.n. v.

Comme se fa

 

‘Sta frittata ‘e  patane s’ appripara mettenno a ffuoco allero allero ‘na cazzarola cu seje litre d’acqua salata (vrancata ‘e sale duppio) e facenno ascí a vollere. Fraditanto ammunnà ‘e ppatane, lavarle e tagliarle a ffarinule ‘e ‘nu centimetro ‘e squina;appena ll’acqua jesce a vvollere menà ‘e ffarinule dinto a ll’acqua e farlere pe cinche minute;scularle e tenerle ‘e parte; mettere a ffuoco allero ‘na tiella ‘e fierro niro cu ‘a ‘nzogna, ll’uoglio, l’aglio ntretato e ‘a fraschetella spullecata; appena ll’aglio à pigliato culore agnadí ‘e ffarinule ‘e patane arvate e farle suassà pe tre minute; sbattere dinto a ‘na ciotola ll’ove cu ‘o caso pecurino sale fino e ppepe janco mmacenato a ffrisco e ricarle dint’â tiella ‘ncopp’ê ffarinule; cummiglià cu ‘nu cupierchio e lassà raffermà  (rassodare) bbuono ‘a frittata ‘a ‘nu lato, facennola cocere pe tre minute; po ajutannose cu ‘o cupierchio,avutarla sotto e ‘ncoppa e farla sciulià n’ata vota dint’â tiella e farla cocere pe n’ati tre minute. Servirla súbbeto cauda ‘e fuculare. Vini: Curpuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza ‘a magnà.

Mangia Napoli, bbona salute! Scialàteve e aggarbbatéve ‘o vernecale!

Raffaele Bracale