FRITTATA 'E MULIGNANE

 

FRITTATA ‘E MULIGNANE

chello ca serve pe sseje perzone

miezu kilò ‘e mulignane longhe viulette napulitane lavate asciuttate e tagliate p’ ‘o ccurto  a fellocce ‘e miezu centimetro.

‘na grossa cepolla ndurata ‘e Muntoro ammunnata e ntretata,

8 ova

‘nu bicchiere e mmiezo  d’ uoglio ‘auliva dunciglio,

‘nu cucchiarino ‘e cannella,

sale duppio ddoje vrancate,

sale fino e ppepe janco mmacenato a ffrisco q.n.s.

 

comme se fa

Lavà e asciuttà ‘e mulignane levanno ‘e streppune e ‘e ddoje ponte; tagliarle p' 'o ccurto  a fellocce  doppie miezu centimetro e sestimarle a ccuscie (derrammate ognuno ‘e sale duppio) dinto a ‘nu scolapasta pe ‘na mez’ora.
Scularle, sciacquarle sotto a ‘nu strèpeto d’acqua fredda, spremmerle a tagliarle a ffarinule ‘e tre centimetre pe dduje  pe ttre. Sciacquarle ancòra. Ammunnà ‘a cepolla e ntretarla. Dinto a ‘na prupurziunata tiella ricà miezu bicchiere  d’uoglio cu ‘o ttrigliato ‘e cepolla e tenerlo a ffuoco miccio nfi’ a cche nun à  pigliato  culore; agnadí ‘e ffellocce  ‘e mulignane,agnadí ‘a cannella, sale fino e ppepe janco mmacenato a ffrisco, ‘nu quarto d’acqua vullente    aizà ‘o ffuoco e fà cocere pe ddiece minute nfi’ a cche ‘e mmulignane nun addeventano tennere. Aumentà ‘o ffuoco pe ffà asciuttà tutta ll’acqua. A chistu punto levà ‘a tiella dô ffuoco e ffà arrefreddà ‘e mulignane. Fraditanto arapí dinto a ‘na zupperella ll’ova accuncià ‘e sale e ppepe e sbatterle. Ricà ll’uoglio rummaso dint’â tiella cu ‘e mulignane, metterle a ffuoco forte e appena è divintato vullente revacà ll’ova sbattute, tuiglià, avascià ‘o ffuoco   e aiutannose cu ‘na palettella ‘e fierro fà cocere ‘a frittata primma ‘a ‘nu lato e ppo ‘a ll’ato l'olio, cinche minute pe parte. Serví súbbeto ‘ntavula spartuta a ggusse (spicchi).

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale