MEZEPENNE SAFRUNATE CU ZZAMPUGLIATA ‘E CUCUZZIELLE

 

MEZEPENNE  SAFRUNATE CU ZZAMPUGLIATA ‘E CUCUZZIELLE

 

Chello ca ce vo’ pe sseje perzone

600 gramme ‘e mezepenne,

 ‘na cepolla ndurata ‘e Muntoro, ammunnata e ntretata fina fina,

ciento gramme ‘e pancetta affummecata  tagliata a ffarinule ‘e ‘nu cm. ‘e squina,

600 gramme ‘e cucuzzielle piccerille,

tre  bustine ‘e safrone,

‘nu cerasiello percante(piccante)lavato, asciuttato e grabbato (inciso) p’ ‘o lluongo,

 ‘nu bicchiere d’ uoglio ‘auliva dunciglio,

 

100 gramme ‘e caso pecurino rattato finu fino,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata,

sale fino e ppepe janco macenato a ffrisco q.n.s.

 

Comme se fa

  Appruntà apprimma ‘a zampugliata ‘e cucuzzielle

ricanno ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolle e ô cerasiello percante; a ‘stu punto agnadí dint’â tiella ‘e ffarinule ‘e pancetta i ‘e cucuzzielle lavate asciuttate e tagliate a rundelle ‘e miezu centimetro ‘e spessore; ‘nfonnere tutto  cu ‘o bicchiere ‘e vino,farlo svapurà e fà suassà pe ddiece  minute sempe a ffuoco allero.A ffine ‘e cuttura revacà tutto dinto a ‘nu mmiscraturo e siffulà nfi’ a uttené ‘na zampugliata críceta, dellicata e malacosa e tenerla ‘ncaudo dint’â tiella    Fraditanto arevere teniente teniente ‘e mezepenne dinto a ‘na caurara cu otto litre d’acqua vullente salata (vrancata ‘e sale duppio)e safrunata cu ‘e ttre bustine ‘e safrone. Scularle e revacarle dint’ â tiella cu ‘a zampugliata; agnadí tutt’ ‘o ccaso pecurino, ammiscà e misturà pe cinche minute; â fine a ffuoco stutato  derrammà cu ‘o ‘o tuppeto ‘e prutusino lavato, asciuttato e ntretato finu fino;  ammiscà ancòra e ‘mpiattà. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale