PARMA – NAPOLI (20.9.20) 0 A 2 ‘A VEDETTE ACCUSSÍ

PARMA – NAPOLI (20.9.20) 0 A 2

‘A VEDETTE ACCUSSÍ

Eccuce cca guagliú!  Cumme ‘o Cielo à vuluto, nce simmo viste n’ata vota! Ajere, a ll’ora streuza ‘e ll’apritivo ‘o Napule accumminciaje ‘o campiunato nuovo e gghiette a mmetterse tre ppunte sustanziuse dint’â sacca jucanno a Pparma, ‘ncasa d’’e ducale,  e doppo nuvantaseje minute ‘e pussesso ‘e palla riuscette a mmettere ê spalle ‘e Sepe ‘nu paro ‘e pallune. Me fósse aspettato ‘e vederele affuzzà (vincere) cchiú llargo, ma pacienza! Gattuso vulette accummincià a gghiucà cu ll’ausato sicuro tenennose ‘mpanca a ttutte ‘e nuove cumpreso a Ccaromecuoste ca mannaje ‘ncampo sulo ‘ncapo ‘e n’ora , ma cumme trasette facette cagnà faccia ô sibbacco (match) e ssulo sfruttanno ‘nu muvimento suĵo ô 63’ Ciruzzo sbluccaje ‘a facenna! Scusate si è ppoco! ‘O doje a zzero arrivaje po   ô 77’ quanno Lorenzigno mettette a ffrutto ‘na bbella jucata ‘e Lozano.

A ‘stu punto venenno a nnuje ve dico ca ‘e ccose a Pparma jetteno cchiú o meno accussí: ‘o Napule pe n’ora abbadaje a mmantenere ‘o pussesso palla e cce riuscette senza però maje cercà ‘a porta ‘e Sepe; pe pparta soja manco ‘o Parma fove crestiano ‘e fa spurcà ‘e guante a Ppastacrisciuta e ppe cquase n’ora ‘ntribbuna-divano stevemo scappanno a ssuonno asasa (soprattutto) chille ‘e nuje ca s’aspettaveno ‘e vedé ‘nu quatto- doje-tre -uno… Quanno finalmente ô 60’ trasette Caromecuoste s’avutaje ‘o canisto   a vventajo  (vantaggio) d’’o  Napule ca riuscette a llevà ‘o cupierchio ô bbuccaccio ‘e fasule d’’o Parma i ‘o sbacantaje senza correre pericule.

 Passammo ê ppaggelle:

OSPINA[Pastacrisciuta] 6,5 – Pochi situazzione periculose ‘a fora ‘e n’asciuta auta appena accuminciata ll’arrancua (ripresa)quanno fove caricato da ‘nu zimmaro lucale arresecanno ‘e farese male assaje; dimustraje curaggio e pperzunalità permettenose ‘nu sumbrero ‘ncopp’ a  Kcaramò ô 92′! Bravo.

DI LORENZO 6  Bbona ‘a catena ‘e dritta cu Llozano,facennose valé quanno fove nicessario.

 

MANOLAS [Chitelassa] 6,5  Se cunfermaje jucatore ‘e spessore e dde mestiere pe pputenza e attijarra (scelta) ‘e tiempo. E ch’ato vuó dicere?

 

KOULIBALY[‘O Ggialante] 6,5  Forte e priciso e pputente cumme ‘o  cumpagno ‘e sezziona (reparto) â faccia ‘e chi dicette ca ‘e vvoce ‘e mercato ‘o putevano cundizziunà! Ma ve ne jate o no?!

HYSAJ[Mezacucchiara ] 6 Facette ‘o ssuojo senza manco surà ‘a maglia datose ca ‘o Parma dâ curzia soja appressuraje (spinse) poco o niente.

 

FABIAN[Anemalonga] 5,5 Nun s’ammereta ‘o seje pecché me parette ca nun steva ‘e genio; sbagliaje cchiú ‘e ‘nu pasiglio (passaggio) e nun fove maje periculuso. Peccato!  [Da ll’84’ ELMAS[‘O Turco] sv]

 

DEMME 5  Nun me piacette; facette poco a ppietto ‘e chello ca po’ ffà: ‘a sustanza ce sta, ma lle manca ‘a qualità e ajere se vedette. [Dô 61′ OSIMHEN[Caromecuoste] 6,5  P’essere stata ‘a primma vota DIMUSTRAJE D’ESSERE ‘E SUSTANZA E CQUALITà; trasette cu ‘na granna frennesia, rignette ‘a muntaca (aria di rigore) d’’e ducale senza fa cape d’angelo, ma sulo cu ‘a presenza soja cagnaje ‘o sibacco (match). Dduje minute e Cciruzzo truvaje ‘o ventajo (vantaggio); da chillu mumento ‘o Ciuccio ‘mpurraje  (accelerò) assaje custruenno cchiú ‘e n’azziona; se chiammaje ll’applavuso d’’a tribbuna-divano cu ‘nu tacco ca libberaje a Lorenzigno ca però cugliette ‘o palo. Si tanto me dà tanto è gghiucatore ca ce po’ ffà spassà.

 

ZIELINSKI 5,5 Ajere me dette ll’impressione ‘e nun vulerlo fa; ggiraje a vvacante e cchiú ‘e ‘na vota se chiammaje fora dô juoco e, ccrediteme ‘ncopp’â parola, tene prubbleme ‘e perzunalità [Da ll’88’ LOBOTKA sv]

 

LOZANO 7  Bbella atalossa (prestazione) d’’o messicano ca fove ‘o cchiú friccecariello d’’e tre lla ‘nnante  pure senza pognere maje, ma ce facette arrecrià ô 61′ quanno dâ curzia mettette ‘mmiezo ‘nu jabbro matàlo (cross perfetto),  Iacopone se ‘mpappinaje e  Cciruzzo mettette a ffrutto. ‘O stesso capitaje ‘ncopp’ô doje a zzero p’’o Ciuccio 0-2,quanno ‘mmece ‘e jabbrà (crossare) tiraje e Ssepe ce dètte ‘na mana. Tutto summato ajere Lozano se facette apprezzà assaje. [Da ll’84’ POLITANO sv]

 

MERTENS[Ciruzzo] 6,5 P’’a primm’ora ce stette e nun ce stette senza farese troppo apprezzà, però appena avette ‘a palla bbona nun perdunaje, facenno tutto summato chello ca uno s’aspetta da ‘nu nassío! [Da ll’89’ PETAGNA sv]

 

INSIGNE[Lorenzigno] 6,5 Pur’isso jette mo sí e mmo no pruvanno quacche cagno ‘e juoco ca faceva cu Ppeppe ‘a ‘nguenta, ca nun ce sta cchiú; ‘ncopp’a ll’uno a zzero cugliette ‘nu palo ma po ô 77’ riuscette a ssignà cu ‘nu tiro ca nunn’è spicialità soja, ma va bbuono accussí!

 

all. Gattuso 6,5  Pecché se vincette, ma êttem’âspettà n’ora primma ‘e vedé ‘o ccustrutto.Vulimmo vencere primma!!!

arb.: MARIANI 5 Siscaje a vvienetenne e spisso ‘ntralciaje ‘o juoco!

E bbasta accussí.

Cunchiudenno tre ppunte sustanziuse e overamente ‘mpurtante  pe Ggattuso ca avette spiciali ccertezze (indicazioni) da nun surtanto Caromecuoste, ma pure da Lozano,dô Ggialante, da Chitelassa e dda Pastacrisciuta.

Ve saluto e si ‘o Cielo ‘o vvo’ ce sentimmo lunnerí ca vene. Staveti bbe’!

R. Bracale Brak