UDINESE- NAPOLI[10.1.21] 1 A 2 ‘A VEDETTE ACCUSSÍ

UDINESE- NAPOLI[10.1.21] 1 A 2

‘A VEDETTE ACCUSSÍ

Alleria guagliú, alleria! Nce vuleva cumme ô ppane ca ajere ‘o Ciuccio turnasse â casa dâ nacchèlla ‘ncasa ‘e ll’Udinese cu ‘e tre ppunte dint’â sacca. E cchesto succedette  a ll’ora d’’a tiella quanno ‘o Napule [forze recuglienno cchiú ‘e chello ch’êva semmenato…]doppo d’’a delusione casalinca ‘e miercurí passato affuzzaje (vinse) ô nuvantesimo  pe ddoje a uno  ‘nu sibbacco (match)   ca s’era cumplicato a ppe isso dàtose ca, passato ‘mmeizzo (in vantaggio) ô 15’ cu ‘nu ricore sacrusanto miso dinto da Lorenzigno, s’era fatto angappà pe ‘na fessaria ‘e Rrahmani  e ppo êva arresecato ‘e cuncedere ‘o bbisse d’’a mubbara (partita) d’’a Pifania  contr’ô Spezia, ma pe ffurtuna cchiú ‘e ‘na vota ‘o Lungagnone nce mettette ‘na pezza e ffinalmente ô 90’ ‘o Mammone riuscette a ccentrà ‘a porta i a ssignà rijalannoce tre ppunte taminne (preziosi). Cumplessivamente, che v’ aggi’’a dicere?, ‘o Napule nunn’è ca nce piacette: se jucaje senza priezza e ssenza arcajara(fantasia) cu  troppi fessarie,e ttroppa taraddudda (indecisione) sott’â porta d’’e lucale. Però recugliettemo chello ca vulevemo e ddicimmo ca ll’arnassa (vittoria) d’ajere jette pe cquanno jucanno bbuono e mmeglio ’e ll’avverzarie êvemo perzo!

Venimmo ê ppaggelle:

MERET[‘O Lungagnone] 6- Atalossa (prestazione) pusitiva d’’o guaglione ca risultaje  funnamentale allimmeno tre o quatto vote cu ‘e tacculle  (interventi) suoje cu ‘e piere pe stuppà quacche repartita  (ripartenza) d’’e lucale; peccato ca nun fove tassuso (veloce) ‘ncopp’ô pasiglio sbagliato ‘e Rrahamani! Ce fóssemo sparagnata ll’addaffa (rete) pigliata.

 DI LORENZO 6,5 – Partette carigginno  (esterno) a ddritta i addeventaje madaffio (difensore) centrale jucanno bbuono a ttutt’’e dduje ‘e pizze.

 

 MANOLAS [Chitelassa] 6 ‘e stima.Scalugnato se facette male quase sùbbeto i avette ‘a jí fora [Dô 16’ MAKSIMOVIC[‘O ‘Ntontero] 5,5 Custretto a ttrasí a ffriddo jucaje, ô ssolito,  ‘na mubbara (partita)cu cchiú ‘e ‘nu  sfregazzo (sbavatura), ma – pe ffurtuna -  senza fa guaje. 

RRAHMANI 4 ‘Nu cato ‘e colla, ô 27’ facette ‘nu pasiglio a gghí arreto (retropassaggio) inutile e ttroppo bbatiejo (lento) umaggianno a Llasagna ca nun se facette prijà e cce futtette; ce mettette ‘a jonta perdenno ‘nu  contrasto c a quase mannaje ‘mporta a  Stryger-Larsèn(ne). Finalmente ô 46’ Gattuso capette ca nunn’era cosa i ‘o cagnaje! Bucciato. [Dô  46’ Mario RUI 6,5 Facette ‘o duvere suojo asasa (soprattuto) cu cchillu tiro ‘e timmurria (punizione) ca mettette ô 90’ ‘o pallone proprio ‘ncapa ô Mammone!]

 

 HYSAJ[Mezacucchiara] 6  Tutto summato facette chello ca puteva ‘ncopp’â ferza mancina e gghiette ‘nu poco meglio a ll’arrancua ‘ncopp’â ferza ‘e dritta.

 

 RUIZ[Anemalonga] 5 Ògne maddaddo (contropiede) ‘e ll’Udinese fove ‘nu periculo pe nnujaute datose ca ‘o spagnuolo nunn’ è ‘nu matustejo (mediano) e ppure ajere fove troppo disurdinato jucanno ‘nnanteâ trasera (difesa) e  ffaticaje assaje a gghiucà ‘mprutezziona. Ma quanno ‘o vvo’ capí Gattuso?  [Dô 68’  ELMAS [‘o Turco]6 Meglio d’’o spagnuolo dètte ‘na bbona mana ô Mammone ca cu isso se sentette cchiú sicuro, migliuranno!

 

BAKAYOKO[‘O Mammone] 7 Atalossa (prestazione) cu quacche llucia e cquacche umbriccia, ma tutto summato pusitiva asasa (soprattutto) pe cchella preputente capata ca ô 90’ ce dètte tre ppunte sustanziuse  turnanno a ffà movere ‘a crassifica d’’o Napule. Signasse cchiú spisso!  

 

 LOZANO 6,5  N’arillo e ‘mpratteca ‘o meglio lla nnante: s’abbuscaje ‘nu ruicore sacrusanto, sfresaje  (sfiorò) ‘e capa ‘nu stuco (gol) e sse dette da fà crjanno ê lucale cchiú ‘e ‘nu prubblema ‘ncopp’â dritta.

ZIELINSKI 6-  Sulo una o doje ‘e cunchiusione ‘nteressante. M’apettavo ‘e cchiú… Peccato! [Dô 92’  DEMME 6 ‘e stima.]

 

INSIGNE 6 Nunn’accucchiaje assaje, sprecanno pure n’accasiona ‘mpurtante, ma signaje ‘o ricore  i allora lle perdono quacche fessaria.

 

 PETAGNA 5,5  ‘A trasera (difesa) d’’e lucale nun lle cuncedette affàraco (spazio) e isso faticaje assaje pe ffarese largo.[Dô 68’ LLORENTE[‘O Spetaccuso] 4,5  Mammuoccelo cumm’è nun cumbinaje ‘nu saciccio, ggiraje a vvacante  risultanno troppo ‘mpriciso e ssenza ficre (idee).

 

all.  GATTUSO 6  Dicimmola cumm’è: nun è ca à fatto ‘o miraculo ‘e sanà ‘a scuatra soja  doppo d’’a carocchia pigliata cu ‘o Spezia, giacché ajere ‘e cuane (azzurri) cuncedetteno troppi repartite (ripartenze) e mmancajeno ‘e freddezza ‘nnant’â porta  janca e nnera; ‘e cchiú nun riuscetteno a ccagnà zurea (ruitmo) e ppigliato ‘o stuco (gol) ce3 mettetteno troppo a repigliarese a mmistaua mentale   (a livello mentale). Certo mancano jucature ‘mpurtante cumme ô Ggialante, Ciruzzo e Ccaromecosta, ma ‘a scuatra nunn’è cchiú cchella ‘e quacche mmese primma… Sperammo ca ‘sti tre ppunte ponn’essere ‘na mana santa!

arb. PASQUA 5 Spisso pigliaje ‘na cosa pe n’ata e nce dette ‘a ‘mpressiona ca nun ce vedesse bbuono… tant’è overo ca pe ddarece ‘nu ricore ch’êsse visto pure ‘nu cecato ll’êtten’’a chiammà chille d’’a Varra. E mmenu male ca jette a ccecà!

E bbasta accussí. Si nun ce piacette ll’atalossa (prova) d’’a scuatra ce garbizzaje ‘o natiggio (risultato)… e ppe cchello se joca. Mo ve saluto e si ‘o Cielo ‘o vvo’ ce sentimmo ggioverì ca vene pe ccuntareve, si nun me sbaglio,  cumm’è gghiuto a ffenì ll’uttavo ‘e finale ‘e coppa itaglia casalinco contro a ll’Empoli. Staveti bbe’. R.Bracale Brak