VERMICELLUNE D’ ‘O PARZUNARO

VERMICELLUNE D’ ‘O PARZUNARO

 

chello ca serve pe 6 perzone

600 gramme ‘e vermicellune,

250 gramme ‘e cucuzzielle piccerille lavate asciuttatte e tagliate a rundelle ‘e miezu centimetro,

ottuciento gramme  ‘e pummarole mature lavate, scuttate, spellate e ttagliate a ffarinule,

 

300 gramme ‘e provola tagliata a ffarinule ‘e centimetre 2 pe 2 pe 2,

 ‘nu bicchiere d’uoglio dunciglio,

‘ddoje  cepolle ndurate  ‘e Muntoro ammunnate e ntretate finu fine,

‘nu spiculo d’aglio vestuto e scamazzato,

100 gramme ‘e pignuole arruscate ô tiesto,

sale duppio ‘na vrancata

sale fino e ppepe janco mmacenato a ffrisco q.n.s.

‘nu tuppeto ‘e prutusino lavato, asciuttato e ntretato finu fino.

 

comme se fa

Appruntà ‘e pummarole mature lavate, scuttate, spellate e ttagliate a ffarinule,  ammunnà e ntretà ‘e cepolle e lavà, asciuttà e taglià a rundelle ‘e cucuzzielle. Dint’a ‘na prupurziunata cazzarola , auta ‘e sponna,ricà ll’uoglio  e agnadirve ‘e cepolle ntretate e ‘o spiculo d’aglio vestuto e scamazzato,  abburrí tutto  doce doce a ffuoco miccio.Sempe a fuoco miccio agnadirve ‘e rundelle ‘e cucuzzielle e lassà cocere pe ‘nu quarto d’ora;a ‘stu punto, levà ll’aglio e  agnadí ‘e ffarinule ‘e pummarole, accuncià ‘e sale e ppepe  e lassà cocere a ffuoco miccio pe  n’ ati diece  minute.Àrvere ‘e vermicellune teniente teniente dinto a ‘na caurara cu abbunnante acqua vullente salata (vrancata ‘e sale duppio) e, ‘na vota sculate, revacarle dint’â cazzarola cu ‘o zuchillo,agnadí ‘e ffarinule ‘e provola e ‘e pignuole arruscate ô tiesto   ammiscannole pe cinche minute  a mmestiere pe farle ‘nzapurí a ffuoco miccio; ‘mpiattà e serví caude ‘e fuculare cumpletanno ‘e piatte cu ‘o ttrigliato ‘e prutusino. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale