TUNNO E PPESIELLE

TUNNO E PPESIELLE Chello ca ce vo’ pe sseje perzone ‘nu kilò e duiciento ‘e tunno frisco tagliato a ffelle doppie ‘nu centimetro, miezu kilò ‘e pesielle piccerille frische o cunceliate (surgelati), ‘nu bicchiere d’ uoglio ‘aulive dunciglio, ‘nu spiculo d’aglio ammunnato e ntretato, quacche fronna ‘e menta fresca, sale duppio ‘na vrancata e mmeza pepe janco mmacenato a ffrisco q.n. s. comme se fa Derrammà ‘e pesielle frisce o cunceliate dinto a ‘na marmitta cu ttre llitre d’acqua vullente salata (vrancata ‘e sale duppio) e farle scuttà pe cinche minute; scularle e metterle dinto a ‘na ciotola cu quacche fronna ‘e menta fresca,accunciarle ‘e pepe tenerle ‘a parte. Fraditanto ricà ‘a mmità ‘e ll’uoglio dinto a ‘na tiella e fierro niro, agnadí ll’aglio trigliato e a ffuoco allero farlo piglià culore, agnadí ‘e ffelle ‘e tunno e scuttarle tre minute pe faccia, accuncià cu meza presa ‘e sale duppio e tantu ppepe quanto ne piace; agnadí ‘e pesielle cu ‘a menta, avascià ‘o ffuoco e ffà ‘nzapurí pe quatto minute. ‘Mpiattà e serví accumpagnata ‘a ‘na ‘nzalatella ‘e ‘ncappucciata fresca cunnita cu uoglio aglio,sale, acito o limone. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! raffaele bracale .