NAPOLI – GENOA (26.01.15)2 A 1 ‘A VEDETTE ACCUSSÍ

NAPOLI – GENOA (26.01.15)2 A 1 ‘A VEDETTE ACCUSSÍ Ajeressera guagliú, vincenno contr’â scuatra d’ ‘e ppazzielle Preziosi e de chella faccia ‘e cestunia ‘e Gasperini se facette ‘nu ‘mpurtante passo annante (terzo posto ‘nsulitaria a trentaseje punte) e nne simmo tutte cuntente pure si ajere ‘o Napule sprecaje troppi accasioni e ffove custretto a ccuntentarese ‘e ‘nu misero ddoje a uno addó êsse pututo squarciunià pe tre o quatto a zzero senza arrubbà niente a nnisciuno. Pacienza; jette accussí e accussí sia. Passammo ê ppaggelle: RAFAEL 6: Tutto summato atalossa (prestazione) pusitiva d’’o Prevetariello ca s’’a vedette ‘e bbello soprattutto ‘nfra ê pale e cu cquacche bbona presa auta; ô primmo ajone (nel primo tempo) cu ‘na bbella parata fermaje ‘nu tiro d’Antonelli a bbotta sicura, ma nun ce putette fà niente ‘ncopp’ô stuco ‘e Iago lassato libbero e ffranco ‘e cercà ‘a porta cu ‘nu tiro ‘a fora senz’essere cuntrastato. MAGGIO 5,5:Mantenette ‘a pusizziona arretrata senza dannarese, ma nun se facette maje vedé annante. ALBIOL6-: Tutto summato facette ‘o ssuojo, ma nun ascette a nchiudere ncuollo a Iago; s’abbuscaje ‘nu cartellino jalizzo (giallo) ca – a ttiermine ‘e recolamento - nun lle spettava! KOULIBALY 6,5: ‘Nu poco ‘ndiciso (incerto) ô pprincipio..., ma po a mmano a mmano criscette e sse facette rispettà. STRINIC 7: Ivànno ‘o terribbile s’’a dichiaraje cu ccegna (grinta) e frennesia dimustrannose aggriuso (agguerrito) annante e pulitelico (prezioso) ‘ncupertura. ( da ll’85°BRITOS s.v. Trasette ô finale pe ffà piglià sciato ô croato.) INLER 5,5: Miso ‘ncampo comme titulare doppo paricchiu tiempo me dètte ‘a ‘mpressione d’essere arruzzenuto ( arrugginito) facenno cchiú ‘e ‘nu prano (errore) specie ô finale e soprattutto ‘nnaccasione d’’o stuco (gol) ‘e Iago quanno s’’o perdette. DAVID LOPEZ 6,5: Bbella atalossa (prestazione) d’’o spagnuolo miso a ffá trancàra (contenimento) ‘nnante â tràsera (difesa); sfresaje ‘o stuco (sfiorò il gol) cercanno ‘a porta cu ‘nu tiro ‘a fora parato ‘a Perínno. CALLEJON 6,5: Favurette (propiziò) ‘o primmo stuco (gol) ca sbluccaje ‘o fullè (match); p’’o riesto currette comme a ‘nu dannato pe ttutto ‘o campo; a ll’arrancua (ripresa) cercaje pure ‘a porta, ma centraje ‘o travesagno (traversa) Peccato! HAMSIK 5,5: Miezu punto mancante p’avé sciupato ‘nu granne bbassurero (suggerimento) d’’o Pipita e ppecché êsse avuto farse vedé annante e nun ‘o ffacette,fermannose ‘ncopp’â trecquarte a rricamà a ppuntaggiorno cu ccalma e pusatezza.Nun è cchello ca m’aspetto ‘a Marekiaro. DE GUZMAN 5: ‘A chiena e ‘a vacante pecché si se dimustraje pulitelico (prezioso) a ll’epata (in fase) ‘e recupero, po sciupaje sotto porta ddoje granni accasioni quanno ô primmo ajone se magnaje ‘nu stuco (gol) ggià fatto sbaglianno ‘a mesura ‘e ‘nu commeto, ma inutile pallunetto e quanno a ll’arrancua (ripresa) se ‘ntalliaje a cunchiudere permettenno a bBurdisso ‘e salvà ‘ncopp’â linia ‘e porta!( dô 70°GABBIADINI 5,5: Sulo quacche spunto pusitivo ‘ncopp’ê tire ‘a fermo; troppo poco!) HIGUAIN 8: Granna serata d’’o sciantiglione (fuoriclasse) nuosto ca sbluccaje ‘o fullé (match) apprufittanno ‘e ‘na rispinta ‘e Perínno, facette ‘nu paro ‘e magarie ca mettetteno a ttu ppe ttu cu ‘a porta ‘nu paro ‘e cumpagne ca però sciupajeno tutto cosa, rijalaje mumente ‘e granne juoco, se jette a ccunquistà ‘o ricore e ‘o mettette dinto cu granna freddezza. E scusate si è ppoco. Ne tenessemo n’atu paro comme a isso! ( da ll’ 89°DUVAN s.v.: Trasette pe ghiucarese ‘o recupero. s.v.) ALL. BENITEZ 6 - Nun fove sfarma (colpa) soja si ‘o Napule sprecaje troppi accasioni. Isso facette ‘o ssuojo andivinanno tutte ‘e ppedine. arbitro CALVARESE 4 Scuntentaje a ttutte quante dimustrannose scadente e ppoco priparato... E nun me facite trasí dint’ê particulare si no aggi’’alliscià quacche ttre contro a ‘stu teramano e ccontro a cchelli scuatre (juve, roma e llazzio) ca nun vonno ‘a moviola ‘ncampo. E nun sta bbene! E ccu cchesto ve saluto e ce sentimmo, si dDi’ vo’,mo nun saccio quanno; spero sulo ‘e cuntarve d’avé vinciuto n’ ata vota, macare cchiú llargo e ssenza sprecà.Staveti bbe’. R.Bracale Brak