DON CICCILLE ‘NCRUVATTATE ‘NCEPULLATE

DON CICCILLE ‘NCRUVATTATE ‘NCEPULLATE chello ca serve pe seje perzone 600 gramme ‘e donciccille ‘ncruvattate, 400 gramme ‘e cepolle nuvelle janche, 250 gramme ‘e pummarole ramate mature, ‘nu bicchiere d’uoglio ‘auliva dunciglio, ‘nu túppeto ‘e vasenicola lavato, asciuttato e murcellato a mmano, 150 gramme ‘e caso pecurino rattato finu fino, sale fino e ppepe janco mmacenato a ffrisco q.c.n.v., sale duppio ‘na vrancata. Comme se fa Lavà e ammunnà ‘e cepolle lassanno 5 centimetri ‘e turzo (gambo) attaccato a ll’ampullo (al bulbo); tagliarle p’ ‘o lluongo ‘nquatto parte. Scuttà ‘e ppuummarole dinto a ‘na marmitta d’acqua vullente, scularle,spellarle e tagliarle a farinule levanno ‘e semmente.Dinto a ‘na prupurziunata tiella a ffuoco allero scarfà tutto ll’uoglio cu quacche fronna ‘e vasenicola lavata, asciuttata e murcellata a mmano; agnadí ‘e quarte ‘e cepolle e ffarle suassà pe cinche minute; a ‘stu punto agnadí ‘e ffarinule ‘e pummarole , avascià ‘o ffuoco accuncià ‘e sale e ppepe e lassà cocere pe ‘nu quarto d’ora ammiscanno ogne tanto.Mantenere ‘ncaudo e fraditanto arvere ‘a pasta dinto abbunante acqua salata (vrancata ‘e sale duppio) . Scularla pronta pronta e revacarla dint’â tiella cu ‘e cepolle; farle ‘nzapurí pe quatto minute a ffuoco allero derramanno cu ‘o ccaso pecurino. ‘mpiattà e serví caudo ‘e fuculare. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale