NAPOLI – FROSINONE (14.05.16) 4 - 0 ‘A VEDETTE ACCUSSÍ

NAPOLI – FROSINONE (14.05.16) 4 - 0 ‘A VEDETTE ACCUSSÍ Trezziole,biancale, tricchi-tracche, fuja-fuje e bbotte a mmuro e â faccia 'e tutte ‘e cestarielle comme a ggiggino-uocchie stuorte ca pure ajeressera steva assettato ‘ncopp’ê bbemate (spalti) a mmenà ‘a seccia, ma però se ll'êtte ‘a ppiglià cchiù ddinto 'e dint' ô prozo: ‘o Napule, ô san Paolo, sott’ô patapato ‘e ll’acqua, cardaje malamente ‘o Frosinone piazzannose [cu ‘o sàggialo(record)’e punte, 82!] ô siconno posto ‘ncampiunato e cunquistannose ‘o pasiglio (passaggio) diretto ‘nCiampionsa e soprattutto, facennone addirittura tre ajeressera, cu ‘a bbellezza ‘e trentaseje stuche (gol)fatte ‘ntutale, ‘o Pipita se jette a ppiazzà ‘ncimma â crassifica d’’e nàssie (cannonieri) ‘e sempe zumpanno ‘ncuollo ô pumpiere Nordallo fremmo a trentacinche! Nuje ca vulimmo bbene ô Ciuccio, nun putimmo ca essere cuntente ‘e tutto chesto, dispiaciute sulamente ca vincennole (comme pure fósse stato pussibbile…) ‘mmece ‘e perderle ‘nu paro ‘e mubbare (partite) ‘mpurtante se fósse pututo cunquistà finalmente ‘o scutetto, senza lassarlo â vecchia zoccola!P’’o mumento però, nuje ca vulimmo bbene ô Ciuccio, avimm’’a essere cuntente ‘e chistu primmo anno ‘e Sarri e mmo avimm’’a sperà sulo ca Aurelione nun se venne nè ô Pipita [comme facette cu cCavani], a cKoubalý i a cquacche ato, ma anze cerca ‘e migliurà, ‘e rinfurzà i allargà ‘a varda (gruppo) permettennoce, p’’a tempurata (stagione) ca vene ‘e cumbattare ‘ncopp’ a ttre fronte, senza custringere a sSarri a arrangiarese i a frijere ‘o pesce cu ll’acqua! Passammo ê ppaggelle: REINA 6 - Comme spisso quanno se joca ‘ncasa, avette poco ‘a fà, ma fove bravo ‘mparticulare a sbarrà ‘a strata a cCiofani,e ffurtunato cu ‘o travesagno (traversa) ‘e Kraglo. HYSAJ 7 – Avette poco ‘a fà, ma fove sempe assaje attiento lla ddereto e se facette nutà pure ‘ndaimmo (in appoggio)prufittevulmente, comme dimustraje cu cchillu bbellu cruzzo (cross) p’’o tarisso (tris) d’’o Pipita. CHIRICHES 7 Sempe priciso, puntuale e ppulito cu ògne tacullo (intervento) e ttacaddammo (anticipo) e ppure sotto a ll’acqua nun sbagliaje niente jenno pure vicino a ll’adaffo (rete). KOULIBALY 7,5 Ciofani cercaje ‘a brica (duello) d’armaddia (fisico), ma truvaje pane p’’e diente suoje e ffacette palla corta pecché, ancòra ‘na vota, ‘o centrale nuosto fove ‘o patrone assuluto d’’a situazziona. (dô 76' REGINI s.v.) GHOULAM 6,5 - Nun sempe fove priciso, però mettette ‘mmiezo ‘na cifra ‘e cruzze (cross) e ddalle e ddale, ‘o cucuzziuello addeventaje tallo quanno dô mancino suojo partette ‘o pallone ca spustato justo justo dô Pipita permettette a mMarekiaro ‘e mettere dinto ‘o stuco (gol) d’’o vantaggio. ALLAN 7 - Che core!E che alcudrata (capacità) ‘e ‘nsertarese( di inserirsi): ll’adaffo (rete) d’’o dubblato (raddoppio) cuano (azzurro) fove tutto jàdara (merito) soja! JORGINHO 6,5 Ô pprincipio cercaje ‘e ‘mmuccarese dinto a spazzie ca nun ce steveno, po capette ll’ antifuna, evitaje ‘e jí ‘nnante fermannose a urganizzà comme a ssempe ‘o juoco ‘mmiez’ô campo. HAMSIK 7 – ‘E solite ascienze (avanzate), ‘e solite cupuliamiente (scambi) cu Insigne e gGhoulammo, ‘e ssolite ‘mmenzione a ttaglià ‘o campo pe Caglieconno senza ca maje ‘o riuscesseno a ffermà! Sujo ll’adaffo (rete) ‘ e ll'uno a zzero, funnamentale pe nnuje [pecché ce levaje ‘a cuollo ‘na preoccupazzione ca se tagliava a ffelle] e ppe isso [pecché lle permettette, finalmente, ‘e ancappà a mMaradona a ccuota 81 adaffe (reti) fatte ]. [da ll'83' D. LOPEZ s.v.] CALLEJON 6 Pure si nun fove ‘a meglia atalossa (prestazione) soja cu ‘a maglia d’’o Napule, quanno riuscette a ttruvà ‘a chesema (varco) justa cercaje ‘e fà male ê profuche ‘e Stellone e ssulo Zappino e ‘nu pizzico ‘e sualazza (sfortuna) nujn lle cuncedetteno ll’adaffo (rete) [dô 65' MERTENS 6 Trasette cu ‘a solita acusía (voglia) ‘e lassà ‘o signo suojo, ma stavota ‘o stuco (gol) nunn’arrivaje. Peccato!] HIGUAIN 10 e mmada (lode) – Pe cquase tutto ‘o primmo ajone (tempo) faticaje a truvà spazzio p’arrivà a ccunchiurere mentre Celi tentaje ‘e farlo jí ‘nfreva, nun prutiggennolo e nnun sanziunanno ‘e chianchiere ‘e Stellone ca ‘o mazzuliavano sistematicamente dàtosi ca, comme aveva anticipato Stellone, ‘o Frosinone era scisco ô san Paolo a ffà ‘a mubbara (partita) d’’a vita, manco nun fosse ggià scisop ‘nsere B... Ma Celi nun ce riuscette e appena ‘o Pipita pigliaje cunfianza (fiducia), nsciuno ‘o fermaje cchiú: signaje a rripetizzione tre stuche uno meglio ‘e n’ato i ‘o terzo addirittura cu ‘na scicca cataballa (rovesciata) e – comme v’aggiu ditto - cu ‘a bbellezza ‘e trentaseje stuche (gol)fatte ‘ntutale, ‘o Pipita se jette a ppiazzà ‘ncimma â crassifica d’’e nàssie (cannonieri) ‘e sempe zumpanno ‘ncuollo ô pumpiere Nordallo fremmo a trentacinche! Nurmale pirciò ca tutta Napule e nun sulo chella d’’o san Paulo sta ê piede suoje e nun voglia maje ‘a Maronna Aurelione s’’o vennesse, cca ‘sta vota overo ca succede‘na rivoluzzione i ‘e cunsequenzie nun se ponno sapé! INSIGNE 6,5 - Tuccaje acccussí ttanti pallune ca pe fforza ne sbagliaje quaccheduno;cegna (impegno) i ajàvia (vivacità) nun mancajeno maje, ‘a pricisione purtroppo sí e cce se mettette pure ‘a jella ‘naccasione d’’o travesagno (traversa) cuoveto duranteô primmo ajone (primo tempo). Calaje durante ll’arrancua (ripresa). All. SARRI 8 ‘O muaggiddo (fautore) principale d’’o capolavoro cuano (azzurro) fove isso! Che ppozzo dicere? Ll’abbrazze cu pPeppe ‘a ‘Nguenta e ccu ‘o Pipita vàleno cchiú ‘e mille parole. Applavuso! Arb. CELI 5 Nun ne parlo, ma crediteme ca tanto se mmereta ‘o frato scemo ‘e Schettino, soprattutto pe ccomme trattaje ô Pipita! E ccu cchesto, ringrazzianno a dDio ve saluto, dànnove appuntamento nun saccio a cquanno. V’astregno ‘a mana a uno pe vvota e vve dico a ll’uso nuosto: cu ‘na bbona saluta! R.Bracale Brak