NAPOLI – LAZIO [C.I.] (39/01/14) 1 A 0 ‘A VEDETTE ACCUSSÍ

NAPOLI – LAZIO [C.I.] (39/01/14) 1 A 0 ‘A VEDETTE ACCUSSÍ ‘O mellone ascette russo, guagliú! Ajeressera ô san Paolo, pe ggrazzia ‘e dDio, ‘e cuane vatteteno ‘a scuatra ‘e Reja e s’assicurajeno ‘o passaggio ê ssemifinale d’’a coppa itaglia. Ce vuleva, ce vuleva proprio pecché doppo d’’e duje paregge cunzecutive ‘ncampiunato, ggià quacche mala lengua mazzecava malamente dicenno ca ‘o Napule nun sapeva cchiú vencere... e ‘mmece, tié!, ajeressera ‘a malalengua avette ‘a risposta. Certo fósse stato meglio si ‘o Napule avesse vinciuto cchiú llargo ‘mmece ‘e ll’uno a zzero finale arrivato addirittura a ll’82°..., ma mo nun mettimmoce a ccercà ‘o pilo ‘int’a ll’uovo! Era ‘mpurtante véncere e sse vincette. E mmo sperammo ca se turnasse a vvencere ‘ncampiunato ggià da dummeneca jenno a bBergamo. Po doppo penzammo pure ô scontro ‘e semifinale cu ‘a Roma pecché ‘a coppa itaglia po’ essere e à dda essere a ‘stu punto n’ubbiettivo luvardo pe ‘sta tempurata (stagione). Passammo ê ppaggelle: REINA 6 Nun fove chiammato a ffà cose straurdinarie, ma se dimustraje sempe sicuro sia bluccanno ‘mpresa ferma cchiú ‘e ‘na palla aveta sia cchelli ppochi vvote ca avette ‘a ascí. MAGGIO 5 Troppi prane (errori) ‘nfase ‘e disancamiento (disimpegno) e dint’ê chiusure. ‘Mpurraje (Accompagnò) poco e malamente ll'azione e nun trovaje maje ‘nu cruzzo (cross) decente. FERNANDEZ 6 Serata tranquilla pe ll'argentino. Mettette ‘a musarola a pPerea soprattutto dint’ô juoco aveto e spisso fove priciso cu llanze luonghe pe ll’attaccante. ALBIOL 6,5 Turnato a essere isso,facette durante ô primmo ajone cchiú ‘e ‘na bbona chiusura. A ll’arrancua ’nfase ‘e cuntrasto (interdizione) nun dètte rispiro ê lazziale nun perdennole maje ‘e vista e prupunennose spisso pure annante. REVEILLERE 5,5 Difendette sí ‘a camma soja (la sua zona) senza troppi difficultà, cu Felipe Anderson ca fove fora dô juoco,ma ‘nfase uffenziva ‘o francese nun tenette ‘o passo p’arrivà ô cruzzo (cross), nè se vedette ‘nsovrappuzizziona. INLER 5,5 Cu gGiorgigno vicino, dette ll'impressione ‘e sènterse cchiú ssicuro; cumminfatte nun se pigliaje troppi respunzabbilità scarrecannole ‘ncopp’ô cumpagno ‘e linia e ppe cunsecuenzia sbagliaje assaje ‘e meno.Comunque fove sempe troppo cumpassato e bbraduso (lento). JORGINHO 7 Certamente ‘o meglio d’’e suĵe,currette assaje cummiglianno ‘na granna camma (un'ampia zona) ‘e campo senza perdere maje saffeneja (lucidità) e ghienno sempe a ccercà cu pperzunalità ‘e mezze pe ‘nfelarse dint’â difesa jancoceleste. Sfurtunato cugliette ‘o palo cu ‘nu granne tiro a ggiro. Dimustraje d’essere isso ll’ommo ca ce vo’ p’’o centrocampo cuano! (dô 90° DZEMAILI sv) INSIGNE 5 Pranaje (sbagliò) tanto, troppo, nun truvanno maje ‘na jucata bbona e, cquanno ascette, ‘o pubblico ‘o siscaje e ‘o guaglione se ne pigliaje dimustranno ca à dda ancòra crescere e mmaturà, pecché à dda capí ca ‘e sische quanno so’ mmeretate (e ajere isso s’’e mmeretaje!) s’ànn’ ‘a accettà! (dô 70° MERTENS 6,5 Trasette súbbeto ‘nfullé (in partita) mannanno ô manicomio ‘a difesa ‘e Reja cu cchiú ‘e ‘nu cruzzo(cross) periculuso.) HAMSIK 6- Nun fove ancòra isso, ma chianu chiano sta recuperanno; cumminfatte se sacrificaje pe ddà cchiú cunsistenza ô centrocampo e ppe fà ggirà ‘o pallone cu cchiú ttassezza (velocità).(dô 75° PANDEV 6 Trasette súbbeto e bbuono ‘nfullé, difennenno palla ô lemmeto d’’a camma e cupulianno (dialogando) a mmestiere cu ‘e cumpagne). CALLEJÓN 7 Accumminciaje cu quacche prano ‘e troppo, ma po, passanno ‘e minute criscette assaje assicuranno ll’equilibbrio nicessario; currette sempe senza stancarse e da ‘nu tiro suĵo nascette ‘accasiona sfruttata d’’o Pipita. HIGUAIN 7 Nun tanto pecché êsse fatto ‘nu granne fullé, ma pecché signaje n’iuperiocia (fantastica) rredda d’’a vittoria, cu ‘nu colpo ‘e tacco e pecché dimustraje d’essere ‘nu luciadore (gladiatore) cumbattenno cu curaggio ‘nfra ‘e centrale jancoceleste ca nun ghiettono p’’o ssuttile, tanto è overo ca a ‘nu certu punto Novaretti ll’arrunzaje dint’â camma ‘e ricore, ma chillu nnacchennella ‘e ll’arbitro nun sanziunaje ‘a falta (il fallo) BENITEZ 6,5 Vulette ‘a cualificazziona ê ssemifinale ‘e coppa Itaglia e ll’avette mettenno ‘ncampo quase tutte ll’uommene d’’a scuatra base ca tenette ‘o pallone cchiú d’’o ssolito; però cu gGiorgigno nce fove cchiú tassezza e ppe cunsecuenzia s’arapetteno cchiú spazzie dint’ê mmaglie d’’a difesa lazziala.Andivinate tutte ‘e cagne pre si quacche titulare (Higuaínno i ‘e terzini ‘mparticulare) nun tenetteno ‘a saffeneja (lucidità) justa pe bbia d’’e troppe fullé cunzecutive. Ma pe cchesto don Rafele nun po’ ffà ato ca aspettà ‘e risultate d’’o mercato ca se nchiude dimane. Sperammo ca coccosa ‘e bbuono succede! ‘Na preghiera a don Rafele: dint’ô spogliatojo se pigliasse a lLorenzigno p’’e rrecchie e lle facesse capí ca ‘a vita nun è ffatta sulo ‘e caramelle, franfellicche e applavuse, ma è ffatta pure ‘e carocchie, cauce ‘nculo e sische e si nun ‘e vvo’ cercasse ‘e nun mmeretarsele! arbitro BANTI 5 Vecchia cunuscenza e antica fetenzia, comme ô 99,9 pe cciento ‘e ll’arbitre taliane, ggià ati vvote ‘ncruciata dô Napule; ajere ‘mmece ‘e levarse quacche debbeto, ne aumentaje ‘a ddose nun siscanno ‘na punizziona a ffavore ‘e Marekiaro ô lemmeto d’’a camma ‘e ricore lazziale, nun siscanno ‘o ricore ‘e Novaretti ‘ncuollo ô Pipita, siscanno sempe a ffavore d’’e lazziale,caputianno cchiú ‘e ‘nu falte e addirittura ammunnno ‘ngiustamente ô Pipita e a mMarekiaro! E‘nchiudimmola cca ringrazzianno ‘sti guagliune p’ avé vinciuto ‘nu fullé ‘mpurtante! Forza Napule, Ciuccio fa’ tu e ghienno a bBergamo ,facce sunnà! Ce sentimmo. R. Bracale Brak