CANNARUNCIELLE CU ‘E CCIMME ROSSE

CANNARUNCIELLE CU ‘E CCIMME ROSSE Chello ca ce vo’ pe sseje perzone: 600 gramme ‘e cannaruncielle, 600 gramme (piso lisso) ‘e cemmetelle ‘e rapa ammunnate e lavate, 250 gramma ‘e passata ‘e pummarola, ‘nu bicchiere d’uoglio ‘auliva dunciglio, ‘nu spiculo d’aglio ammunnato e ntretato finu fino, ‘nu cerasiello percante (piccante)lavato, asciuttato e grabbato (inciso) p’ ‘o lluongo, sale duppio ‘na vrancata, sale fino e ppepe janco mmacenato a ffrisco q.n.s., Comme se fa S’accummencia appruntanno ‘na sarzulella ricanno dinto a ‘na prupurziunata tiella ll’uoglio cu ‘nu spiculo d’aglio ammunnato e ntretato finu fino, e cu‘nu cerasiello percante (piccante)lavato, asciuttato e grabbato (inciso) p’ ‘o lluongo; tenerle a ffuoco allero nfi’ a cche ‘o ttrigliato d’aglio nun piglia culore; agnadí ‘a passata ‘e pummarola, avascià ‘o ffuoco e lassà cocere pe diece minute accuncianno ‘e sale e ppepe sulo â fine; mantené ‘ncaudo Fraditanto fa ascí a vvollere quatto litre d’acqua salata (vrancata e sale duppio)e agnadirve ‘e cemmetelle appruntate e farle arvere pe cinche minute; aspettà a jesce a vvollere n’ata vota e agnadí ‘e cannaruncielle, farle arvere teniente teniente e sculà asciutte asciutte tutt’assieme pasta e cimme ‘e rapa;revacà tutto dint’â tiella cu ‘a sarzulella, ammiscà e tuïglià tutto a ffuoco allero pe dduje minute. ‘Mpiattà accuncianno ‘e pepe janco mmacenato a ffrisco e serví caude ‘e fuculare. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale .