SPARTAK PRAGA - NAPOLI E.L. (27/11/14) ‘A VEDETTE ACCUSSÍ

SPARTAK PRAGA - NAPOLI E.L. (27/11/14) ‘A VEDETTE ACCUSSÍ Ajeressera m’aspettavo ca, doppo d’’o scuzulato pareggio cu ‘o Cagliari, ‘o Napule m’êsse data ‘a pussibbilità ‘e cuntarve d’essere turnate a vvencere e dd’avé furnita ‘na bbona atalossa (prestazione). ‘Mmece nun fove accussí e sto’ cca a ccuntarve ‘e n’atu pareggio scartellato pe zzero a zzero: ‘o mminimo ‘ndispenzabbile visto ca jenne a pPraga avastava ‘nu punto per cunquistà ‘o passaggio ê sidicesimi d’ E.L. i ’e ‘nu punto ‘e guagliune ‘e don Rafele s’accuntentajeno dint’ô ggelo ‘e Praga, ‘nnante a scarze ‘nu migliaro ‘e tifuse cuane (azzurri).’Nzomma ‘a scuatra ‘e don Rafele, a ffullé fenuto, mantenette ‘o primmo posto (ma a ppare punte cu ‘e cecoslovacchie,pure si ‘nvantaggio dint’ê scontre dirette) e fistiggiaje cu ‘nu turno d’ancerca (anticipo) ‘a cualificazziona â siconna epata (seconda fase).Chillo però fove ll’unico aspetto pusitivo ‘e ‘na serata ca safeniaje (evidenziò) ‘na certa difficultà p’‘a scuatra ‘e don Rafele ‘e custruí palle-stuche (palle gol).E cchi se ll’aspettava?! D’accordo, mancavano Insigne e mMertenso ca so’ ‘mpurtante pe ‘na scuatra ca attacca quase sempe ‘ncopp’ê curzie laterale.... ma proprio pe cchesto vulesse sapé ‘a don Rafele: simmo sicure ca Marekiaro po’ ffà ll’ala? Nfi’ a mmo nun crero proprio! Jammo annanze; ‘e ccose jetteno accussí: ‘o Napule ajeressera êtt’ ‘appiccià ‘na cannela a santu Rafiluccio... E mmo ve dico;doppo ‘nu turno d’abbiento (riposo), don Rafele mettette n’ata vota Albiòllo a ccentro d’’a difesa vicino a cKoulibalý,ca me dette ‘a ‘mpressione d’essere rummaso cu ‘a capa ê prane (errori) ‘e dummeneca passata contro ô Cagliari; â primma entratura, guardateve ‘e ssacche ‘o francese cuano se mettette a ffà ‘o puntaggiorno, spalancanno ‘a prateria ‘nnante a dDockallo. Pe ffurtuna santu Rafiluccio ce mettette ‘na pezza, fermaje ‘o diacunale e cuncedette sulo ‘nu tiro ‘e squina (corner).’Nzomma da chillu mumento ‘o Napule s’accuntentaje ‘e trutterellà p’’o campo i ‘e duje artigliere Higuaínno e cCagliecònno risultajeno bluccate dô friddo senza dà signo ‘e vita tanto ca ll’unico tiro ‘mporta cuano (azzurro) d’’o primmo ajone (tempo) fove ‘e Gargano (17°) da fora camma (area), e risultaje quase ‘nu pasiglio (passaggio) p’’o purtiere Stecho. Súbbeto doppo ‘o Sparta sfresaje (sfiorò) pe ddoje vote ‘o vantaggio: Husbauerro, nun cuntrastato ‘a Gargano tiraje ‘a fora ‘na palla a scennere, ‘a traiettoria scavalcaje a Rafiluccio ma ‘ncucciaje ‘o travesagno(traversa), Lafata arrivaje primmo ‘e capa, ma santu Rafiluccio ca steva ‘nterra fove n’anguilla a mmetterese allerta e facette ‘o miraculo salvanno ‘a porta cu ‘nu tuffo a ddritta e ‘na rispinta disperata. A ll’arrancua (Nella ripresa) ‘o Napule partette cchiú cunvinto: ‘o Pipita ce pruvaje cu ‘nu tiro ‘a fora (deviato); ‘ncopp’ô tiro ‘e squina (corner) cunzeguente Albiòllo mettette ‘a palla ‘ncopp’ô primmo palo, ma nisciuno se facette truvà pronto pe metterla dinto.Jammo annanze; a ll’8° Cagliecònno, ‘mmece d’’a porta, da bbona pusizziona, centraje ‘o difenzore Holekco; mentre da chell’ata parte ‘nu paro d’ asciute a vvacante ‘e Rafiluccio detteno curaggio ô Sparta, custretto po però a rrassignarse annante ô siconno miraculo ‘e santu Rafiluccio, ca sott’â mez’ora tuccaje cu ‘a ponta d’’e ddete ‘nu tiro maligno ‘a fora ‘e Matejovsky deviato ‘a Mesto, spedennolo ‘ncopp’ô travesagno(traversa). Scampato ‘o pericolo, ‘o Napoli avette ddoje bboni accasione pe ppassà ‘nvantaggio, ma primma Zapata (trasuto ô posto d’’o Pipita) nun arrivaje ‘ncopp’a ‘nu cruzzo (cross) vascio ‘e Mesto, po Marekiaro, ‘e capa, ‘a bbona pusizziona mannaje auto; ll’urdemu rappiglio (brivido) ce ‘o procuraje Zapata ô 90°, ma ‘a ggirata soja ‘e capa fenette fora. Sinamparco (comunque) ‘o Napule passaje ê sidicesime! Ora mo p’essere primmo e rrummané capa-serie s’ à dda vattere ‘nfra doje semmane ô San Paolo ‘o Slovànno Bratislava,ch’è urdemo a zzero punte. E nun me pare proprio ‘na cosa difficile! Sperammo e facimmo corna! Passammo ê ppaggelle. RAFAEL 7,5: Subbeto ‘na parata difficile, po ‘nu miezu miraculo ‘ncopp’a lLafata.All’arrancua ‘nu paro d’asciute a vvacante, ma po se facette perdunà mannanno ‘ncopp’ô travesagno (traversa) ‘nu tiro maligno ‘e Matejovsky deviato ‘a Mesto. MESTO 6: Nun se ponno dimannà cape d’angele a ‘nu jucatore ca nsi’ a mmo a jucato poco o niente. Sinamparco (comunque) facette ‘o ssuojo muntanno bbuono ‘a guardia d’’a curzia ‘e dritta. ALBIOL 6: Ô pprincipio me parette ‘nu poco distratto, ma po pigliaje p’’a mana ‘a difesa e ppure a cKoulibalý. KOULIBALY 6-: ‘A bbrutta jurnata contr’ô Cagliari facette sèntí ancòra quacche ppiscigrazzia (strascico). Partette cu ‘nu bbruttu prano (grave errore) e ce mettette paricchiu tiempo pe ripigliarese, riuscennoce sulo a mmità ‘e ll’arrancua (ripresa). BRITOS 5,5: Pronti via e ss’abbuscaje ‘nu cartellino jalizzo (giallo) arresecanno pure ‘o cartellino russo cu ‘na trasuta ‘nfama ca pe ffurtuna nun fove sanziunata. Po però aumentaje l'attenziona e ‘a situazziona dê pparte soje migliuraje. GARGANO 6: Fove chillo ca tuccaje ‘na cifra ‘e pallune a mmità ccampo e ca currette pe dduje. Peccato ca a ll’epata ‘e plantamiento (in fase di impostazione) facette troppi prane! DAVID LOPEZ 5,5: S’accuntentaje’e fà ‘o ppucurillo ch’êv’ ‘a fà, ma nun sempe lle riuscette d’essere culaturo (filtro) annante â tràsera (difesa). CALLEJON 4,5: Ancòra ‘nu fullè (gara) negativo.Avette pure ‘na bbona palla, ma ‘a fravecaje ‘ncuollo ô difenzore cecoslovacchio. Peggio quanno se dimustraje egoista nun dànno palla a zZapata ca steva sulo sulo. JORGINHO 5: Senza idee pure comme trecquartista anacufizzato (alleggerito) da ògne tareja (compito) difenziva. ( dô 76° GHOULAM 6: Miso a ffà ll’ala ‘e mancina dinto a ‘nu quarto d’ora addivintaje ‘na spina dint’ô scianco d’’o Sparta.) HAMSIK 5: Nun fove sfarma (colpa) soja ma miso lla a ffà ll’esterno ‘e mancina risultaje cumpletamente fora fase, dimustranno ca ‘e caratteristiche soje nun ce azzeccano niente cu cchella pusizziona. HIGUAIN 5: Fosse stato meglio farlo arrepusà!Pe mme rummanette dint’ô spogliatojo e ‘ncampo ce jette ‘na controfijura ca nun facette manco ‘nu tiro decente ‘mporta, nè s’allargaje ‘ncopp’ê curzie. ( dô 68° ZAPATA 6: Cu isso lla ‘nnante, ‘o Napule riuscette a ssaglí cchiú spisso.). ALL. BENITEZ 4,5: Me dispiace, ma ll’aggi’’a dicere: atalossa scannalosa(prestazione indecente) d’’o Napule, forze a ccurto ‘e cuncentrazziona; è overo ca lle mancavano Mertenso e Insigne, ma ce sta quacche guaglione dint’â primmavera ca joca ‘ncopp’ê ffasce: Cagliecònno e Higuain s’êsseno avuto fà arrepusà e mMarekiaro miso lla a ffà ll’esterno ‘e mancina fa male sia â scuatra ca a isso stesso! Arbitro ‘ngrese: MARRINER 6 Niente ‘a sinnacà:arbitraje a ll’ingrese. E cu cchesto ve saluto e ve dongo appuntamento, si dDi’ vo’, â prossima vota ca è mmarterí ca vene doppo d’’a trasferta a gGenova contr’â Sampedoria, speranno ca se torna a vvencere! R.Bracale Brak