CUOGLIE 'O MUMENTO

Cuoglie ’o mumento


Pigliàmmancella ’a vita alleramente
ca ’o bbuono juorno ahimmé, dura poch’ore
e si ne vuó asapurà ’o sapore,
stamme a sentí, l’hê ’a fà ’ncopp’ ô mumento…

E ggià ca tutto passa dinto a nniente
nun serve accapezzarce anema e ccore…
e ggià ca ’a vita è ppoca e po’ se more
arronza, quanno puó, arditamente!

E nun te farte scrupele ’e cuscienza:
fatte capace ca ’o llassato è perzo
e si tu vuó pelià, ne rieste senza

’e tutto, oj ni’…, ’e capitale e tierzo!
E quanno t’ appresiente addu san Pietro
faje ’na figura ’e chionzo e vaje cchiú… addietro!
Raffaele Bracale
(dal vol. 'E CCOSE D''O PPASSATO ed. Graus Napoli 2006)