DUMMENECA APPACIATA

Dummeneca appaciata


Dummeneca appaciata, senza ggente,
senza rummure ’e machine p’ ’a via…
’o ppoco ’e sole ca fa cumpagnia
n’ addore ’e mare ca vene ’a punente…

Fora ô balcone senza penzà a nniente
zuco ’na sicaretta e comme sia
lasso ca sfrenneseja ’a fantasia
senza metterle frene, arditamente!

E va, senza sapé, pe ’stu turchino
’e chistu cielo mio e ride e canta…
E se ne fotte ’e tutto e d’ ’o destino

nun le passa p’ ’a capa manco tanto!
Dummeneca sulagna, e chistu core
ne fa capriole comme a ’nu guaglione!…
Raffaele Bracale
(dal vol. 'E CCOSE D''O PPASSATO ed. Graus Napoli 2006)