E I’ ‘O SSAPEVO!

E I’ ‘O SSAPEVO!
Comme s’ è liggiuto ‘ncopp’ a ttutte ‘e ggiurnale, ajere 23/5 ‘o presidente DeLa, dint’â sede d’ ‘a Film Auro, s’è ‘ncuntrato cu Riccardino Bigon. Poco doppo s’è saputo - comme cunfermato pure ‘a «Sky sport 24» ca ô ruciello (all'incontro) à pigliato parte pure Mazzarri. ‘Na riunione longa assaje. Â fine, poco primma d’ ‘e nnove (delle 21, pe chille ca parlano cu ‘o sciosciommo...) s’è vvenuto a ssapé ca ‘a riunione era fernuta e ca s’era trattato ‘e n’incontro «sostanzialmente positivo». Mancava, a chistu punto, ‘a cunferma ufficiale ‘a parte d’ ‘a suggità cunferma che c’è stata cunvalidanno ‘o fatto ca Mazzarri rummane ‘ncopp’â panca d’ ‘o Napule. Che ddicere? Comme avevo anticipato p’’e juorne passate tutto è ffernuto a ttarallucce e vvino... Certo è stata ‘na cosa bbona chella ‘e scanzà ‘o fuosso ‘e Gasperini allenatore, comme se minacciava..., ma - doppo tutt’ ‘e tarantelle succiese - pe mme Mazzarri se n’aveva ‘a jí e aveva ‘a essere sostituito cu ‘nu granne allenatore straniero(maje ‘nu taliano, pecché tutte ‘e taliane (‘a fora ‘e Reja) ‘e ‘na manera o ‘e n’ata songo ‘nchiaccate d’ossazza (di lebbra) juventina e nun so’ ddegne d’a panca luvarda..., pirciò ora mo nun vulesse ca avé deciso ‘e tenerse a Mazzarri fósse n’ jerro gravuso (un errore gravissimo) ca corna facenno putimmo pavà dint’ô campiunato ca vène... Ripeto: Mazzarri troppo favone (chiacchierone), ‘na vota ca s’era saputo ca se jeva prupunenno a dritta e a mmancina a chisto e a cchillo comme a puntunera, se nn’avev’ ‘a caccià súbbeto doppo ca aveva affruntato ‘e partite cchiú’mpurtante cu troppa eparchía (sufficienza) pe nun dicere mancanza ‘e cumpetenza...; ll’anno ca vène po’ mmaje cuntinuà ‘o mazzo(la fortuna) ca Mazzarri à tenuto st’anno? E nun crero! E allora saranno overamente delure ‘e panza e a DeLa e ô Napule lle vène a custà cchiú ccaro truvà n’atu misterro pe sustituirlo; ‘nzomma facenno corna po’ accummincià p’ ‘o Napule ‘nu granne discienzo (un grande declino); e sperammo ca mo ca accummencia ‘o mercato DeLa,Mazzarri e Biguncino nun vanno a ppiscà dint’ê scarte d’ ‘a juventussa o dint’ê saldi ‘e l’Ikea... Me vulesse sbaglià dicenno ca ‘sta pace fatta è stata ‘na granna fessaria, ma purtroppo ‘a veco nera soprattutto pecché penzo ca nè DeLa, nè Mazzarri so’ disposte a accettà chistu cunziglio ca lle dongo a gratisse:
Mo 'mparateve a ffà ll'uommene: nun è ddifficile, basta fà 'o ccuntrario 'e chello ca facite!
R.Bracale Brak