CAGLIARI – NAPOLI (23.10.11) 0 A 0LL’AGGIU VISTA ACCUSSÍ

CAGLIARI – NAPOLI (23.10.11) 0 A 0
LL’AGGIU VISTA ACCUSSÍ
N’ata delusione guagliú! Me dispiace d’ ‘o ddicere ma proprio nun ce simmo. Nun so’ cchille d’ajere ô juorno ‘a manera, l’atteggiamento,’o ggenio ch’à dda tènere ‘na granna squatra. Doppo d’ ‘a mazziata ca ‘o Parma ll’êva dato ô san Paolo, ‘o Napule êsse avuto ‘a jucà cu ‘o sanco a ll’uocchie e nun s’êsse avuto accuntentà, comme ‘mmece s’ accuntentaje ‘e ‘nu pareggio senza zuco e senza sale ‘ncopp’ô campo ‘e ‘nu Cagliari mudesto assaje. Guardanno ‘a partita me songo addimannato si ‘o Napule fósse sciso ‘ncampo deciso a vencerla chella benedetta partita, o si ‘mmece puntasse ggià dô pprincipio ô pareggio e bbasta.
P’ ‘a verità tutt’ e ddoje ‘e squatre durante â partita avettero quacche accasiona ma cchiú passajeno ‘e minute, i’ cchiú me cunvincette ca fósse fernuta zzero a zzero, comme infatte fernette cu ‘o risultato ca ‘nclassifica ‘a cuollo ô Napule mo so’ zumpate cchiú ‘e ‘na squatra! Vedette ‘e jucature nuoste senza ggenio, senza cegna, senza chillu ‘mpegno sanguegno (determinazione) ca p’ ‘o ppassato recente ce ànnu fatto véncere diverzi ppartite ê minuti finale.Niente niente ca ‘a squatra êsse cagnato mentalità? Vuje che ne dicite? I’ nun ‘o saccio! Saccio sulo ca ajere vedette ‘na squatra senza idee, senza lucentezza, senza chill’appetito pe nun dicere famma ca caratterizzajeno ‘e cuane d’ ‘o campiunato passato. E nun me dicite ca è ccorpa d’ ‘o turnovèr(ro)! Passammo ê ppaggelle.
DE SANCTIS 6 – Palo e travesagno ll’ ajutajeno, ma isso se facette truvà pronto ‘ncopp’â n’asciuta vascia a pprincipio ‘e partita.
ARONICA 6 – Tenette bbuono ‘a pusizzione.Repuzaje (respinse) ddoje vote ‘e sèguito durante ô siconno tempo‘ncopp’â n'azzione periculosa d’ ‘e patrune ‘e casa.
FERNANDEZ 6,5 – Dimostraje bbona perzunalità,mustrannòse ggià quase ‘nzerito cumpletamente ‘int’â difesa a ttre. Cratisto (ottimo) ‘int’ô juoco aereo.
CAMPAGNARO 6+ - Nun andivinaje quacche suggerimento, ma ‘ndifesa risulvette paricchi situazzione periculose.Dê pparte soje ‘mpedecaje(mise le pastoie) a dduvere a Cossu.
ZUNIGA 6,5 – Uno d’ ‘e meglie.Ô primmo tempo appressuraje (spinse) assaje custringenno a Ficcadenti a radduppiarlo cu Nainggolan.
GARGANO 5,5 – Poca rrobba ‘e sustanza e pe gghionta ‘e ruotolo sbagliaje ‘na palla assaje periculosa ô primmo tempo annante â difesa. Nun steva a pposto fisicamente,cumminfatte se facette male e avette ascí.
(dô 71° INLER 5,5 – Trasette, ma nun risultaje utile: fumuso e casinista.)
DZEMAILI 6,5 - Prova pusitiva ‘a soja. Risultaje ‘na vera bbarriera annante â difesa e accumpagnaje spisso ll'azzione cu ‘a qualità.
DOSSENA 5 – Nun ne ‘ngarraje una bbona!Tanta corza a bbacante quacche pallone menato a ccentro, ma maje veramente ‘nteressanti e spisso ‘mprecise!Nun capisco pecché Mazzarri nun ‘o cagnaje...
SANTANA 6- Continuamente ‘nmuvimento, ‘o palo e ‘na parata d’ Agazzi lle negajeno ‘a cuntentezza d’ ‘a redda e se ll’êsse mmeretata pecché fuje ‘o cchiú periculuso... Ma pe ssignà s’ à dda sapé tirà ‘e pere o ‘e capa!
(dô 67° MAGGIO 6,5 – Trasette forze tarde e siconno me ô posto sbagliato; avesse avuto trasí apprimma e ô posto ‘e Dossena facenno spustà a Zzuniga ‘a chell’ata parte: quanno trasette accumminciaje a appressurà cu cunvinzione e mmestiere ‘ncopp’â dritta. S’êsse mmeretato ‘mpremio ‘na redda, ma ‘a sfiuraje sulamente.)
LAVEZZI 5,5 – Accumminciaje bbuono po però se perdette, nchiuso dint’â cajola d’ ‘e tre mediani d’o Cagliari. Ò ssolito ‘a porta nun ‘a vedette maje.
(dô 56° HAMSIK 5.5 – Simmele e cunforme a Inler(ro)).
CAVANI 5,5 - Quacche bbona apertura,po p’ ‘o riesto poco o niente. Dint’â ripresa cumpletamente fora dô juoco.’O guaglione è stanco e se vedette.
MAZZARRI 5,5: Dicimmo ca ‘nu punto a Ccagliari nun è pproprio ‘a jettà, ma nun ce simmo: ‘o Napule d’ ‘o campiunato à dda essere n’ata cosa! Pe mmo ‘mmece tène ‘na faccia differente ‘a chella mustrata ‘nCiampions(a). à dda vedé comme à dda fà, ma à dda assulutamente ritruvà cierti jucature ‘mpurtante, Cavani ‘mprimmese.
ll’arbitro BANTI 3 ‘e stima, ma ‘sta vota nun ne parlo pecché nun facette granni puttanate.
Si ‘o Signore ‘o vvo’ ce sentimmo â prossima vota.
Staveti bbe’!
R.Bracale Brak