CORACHIATTA Â CACCIATORA

CORACHIATTA Â CACCIATORA
Chello ca serve pe sseje perzone:

2 kilò. ‘e spezzato ‘e sella ‘e corachiatta a piezze ‘e cm. 4 pe 6 pe 5,
‘nu cucchiaro ‘e ‘nzogna,
½ bicchiere d’uoglio ‘auliva dunciglio,
1/2 bicchiere d’acito ‘e vino russo,
4 alice salate levate ‘e sale lavate e spinate o paro piso ‘e sulumiglie d’alice salate sott’ uoglio,
farina q. n. s.
‘nu spiculo d’aglio ammunnato e ntretato finu fino,
½ cipolla ndurata ‘e Muntoro ammunnata e ntretata
400 gramme ‘e porpa ‘e pummarola,
Rosamarina spullecata q.n.s.
Sarvia ntretata q.n.s.
Sale fino e pepe bianco q.s.
‘nu tuppeto ‘e prutusino lavato, asciuttato e ntretato finu fino.
comme se fa
Lavà e asciuttà ‘e piezze ‘e corachiatta, ‘nfarenarle a mmestiere e farle suassà a ffuoco allero dinto a ‘nu ruoto a sponne aute cu ll’uoglio, ‘a ‘nzogna vivo con lo strutto e ‘a cepolla ntretata; nun appena so’ suassate agnadí ‘a porpa‘e pummarola,’o ssale, ‘o ppepe e ‘o ttrigliato d’aglio, rosamarina e sarvia Bagnà ‘o corachiatta cu ll’acito e ‘nu bicchiere d'acqua cauda.
Avascià ‘o ffuocoe fà cocere ‘a carne pe n’ora ammiscanno ògne ttanto pe nun farla azzeccà sotto. Fraditanto mettere dinto a ‘na tiellocce ‘nu filo d’uoglio e a ffuoco miccio farve sciogliere tutte ll’alice salate scamazzannole cu ‘na ponta ‘e cucchiarella, nfi’ a uttené ‘na sarzulella dellicata ca a ffuoco stutato e ccuttura cumpletata va agnadita â carne
‘nzieme ô tuppeto ‘e prutusino ntretato
Nota
ô posto d’ ‘e piezze ‘e sella se po’ ausà’nu cusciotto d’ ‘o corachiatta disossato, e ttagliato a piezze gruosse.

Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve, cunzulàteve ‘o vernecale e facíteve ‘a scarpetta!
Raffaele Bracale