NAPOLI CESENA 13/01/12 coppa Italia (2 A 1)

NAPOLI CESENA 13/01/12 coppa Italia (2 A 1)
LL’AGGIU VISTA ACCUSSÍ
E pure chesta è ffatta guagliú! E ve pozzo assicurà ca ajere a nnotte me jette a ccuccà (futtennome d’ ‘o diabbete) cu ‘o core dint’ê zzuccaro pecché ‘e guagliune nuoste ce facettero ‘o prisente (il regalo) ‘e ‘na vittoria pulitèlica (preziosa),‘na vittoria carreca ‘e significazzione (di significato), ‘na vittoria ca ce ‘mmita a penzà pusitivo e ce dà tanta cunfianza (fiducia) pe cchello c’à dda vení!!! P’’a verità, e ppe cchiú ‘e ‘nu mutivo, se trattaje ‘e ‘na vittoria sufferta forze cchiú d’ ‘o nicessario, ma pure ‘sta sufferenza puteva starce ‘ncalannario visto ca chille d’ ‘o Cesena (riserve o nun riserve) nun erano venute a ffarse ‘na passiata ‘e salute, anze pe tutt’ ‘o primmo tempo jucajeno cu ‘o sanco a ll’uocchie danno straccarellate senza misericordia a ddritta e a mmancina, riuscenno addirittura a passà ‘nvantaggio e custringenno ‘e guagliune cuane a accuzà (inseguire) ‘o risultato. Cumuncue comme jette e ccomme venette, ‘o ‘mpurtante è ca â fine arrivaje ‘a vittoria cuana primma d’arrivà ê tiempe ampliative (supplementari) ca certamente se fossero sentute dint’ê ccosce llunerí ca vene quanno ô san Paolo sbarca ‘o Bologna, n’ata scuatra ca fete e vene pe ccerto a ffà catenaccio! ‘O ‘mpurtante è ca â fine arrivaje ‘a vittoria cuanaca permettette ô Napule d’apprudà ê quarte ‘e finale ‘e ‘na coppa ca certamente nun è ‘o scutetto ma è ssempe ‘a siconna manifestazzione d’ ‘o pallone ttaliano e a vvencerla i’ nun ce sputasse ‘ncoppa!
Tirammo ‘a somma e ppassammo ê ppaggelle :
ROSATI 6 Forze e ssenza forze pe ‘nu purtiere è ancòra cchiú ddifficile jucà doppo tantu tiempo passato a scarfà ‘a panca...Ma ‘o lungagnone (‘nu metro e nuvantacinche) dètte sempe sicurezza ô reparto pure – si vulimmo pelià – ‘na cusarella ‘e cchiú ll’êsse pututa fà ‘ncopp’ô tiro ‘e Pupescu. Se dimustraje assaje sicuro cu ‘e piere.
FERNANDEZ 6- Nun è Ccampagnaro e cchiú ‘e ‘na vota dimustraje ca joca meglio comme centrale. Poco riattivo ô mumento d’ ‘a redda ‘e Pupescu, p’ ‘o riesto sprecaje dduje facile cruzze uffenzive.
CANNAVARO 6- Facette a ccutogne e ccunesse cu Bogdani, sbaglianno ‘nu paro ‘e trasute, ma tutto summato le mettette ‘a musarola e risulvette quacche situazziona periculosa.
BRITOS 6 Naturale non aspettarse súbbeto ‘o massimo, ma l'uruguagio dimostraje ‘e tené perzunalità e d’essere assaje forte ‘ncopp’ê ppalle aute.P’ ‘e muvimente ‘mmece è ‘nu poco machinuso.(dô 74° Donadel s.v.)
ZUNIGA 7 Si fósse pure sultanto ‘o vinte pe cciento cchiú cuncreto cu tutte ‘e ppalle ca porta ‘nnante s’ammeretasse sempe cchiú ‘e sette; pure ajeressera pe tutt’ ‘a partita fuje ll'unico a zzumpà sistematicamente ll’ommo e a ccrià coccosa lla ‘nnante. ‘Nu paro ‘e vota bravo ‘nchiusura.
INLER 5 ‘A partita cratista fatta a Ppalermo m’êva fatto sperà d’avé ritruvato ‘o turco napulitano ca ce aspettammo tutte, ma ajeressera facette sentí poco ‘o piso sujo a mmità campo e ffuje paricchio ‘ncunzistente (evanescente); da isso m’aspetto assaje ‘e cchiú. E ‘o ppo’ ffà! (dô 58° MAGGIO s.v.)
DZEMAILI 6 Bona prova d’ ‘o svizzero, accumpagnato ormaje ‘a ‘na granna cundizzione fisica. Alternativa pulitelica (preziosa) p’ ‘o riesto d’ ‘a tempurata; da alliccarse ‘e bbaffe ‘na sciandella (un pallonetto) ca Marekiaro sciupaje mannanno ‘o pallone ‘ncopp’ a san Martino!
DOSSENA 5 Nun trasette súbbeto ‘mpartita, pure pecché ‘o Napule preferette appressurà ‘ncopp’â dritta. Quanno po accuminciaje a gghiucà, facette assaje chilometre, ma a vvacante e ‘e cruzze ca facette nun fujeno maje ‘nteressante. Bbona però ‘a ‘ntesa cu Marekiaro
HAMSIK 5,5 Pure ajeressera ‘a ‘nu campione comme a isso me fósse aspettato tanto ‘e cchiú..., ma chi t’ ‘o dda? Poche appressature (accelerazioni) o jucate a mmestiere; pe gghionta ‘e ruotolo cchiú ‘e ‘nu tiro sballato.
VARGAS 5 Sfurtunato e casinista, cchiú ‘e tanto nun le pozzo mettere, pure si ‘o guaglione tène tanti cuardate (attenuanti) visto ca peffino Mazzarri se scusaje d’ averlo menato súbbeto dint’â bagarra (nella mischia); ‘o voto però nun è ‘na bucciatura; è ssulo ‘o riassunto ‘e ‘ na prova ‘a scurdà...
(Dô 1° st) PANDEV 7,5 – Sta attraverzanno ‘nu periodo ‘e fromma straurdinaria e cquanno isso trasette ‘ncampo cagnaje ‘a storia d’ ‘a partita.Appaciucaje (propiziò) ‘a rredda ‘e Cavani e risulvette ‘a partita cu ‘na punizzione velenosa e putente, sparagnanno ô Napule ‘e tiempe ampliative (supplementari). Dicisivo.
CAVANI 7 Soprattutto p’ ‘a prima parte d’ ‘a partita , ‘o contribbuto d’ ‘o Matador(ro) nun fuje a ll'aldezza d’ ‘a situazzione pure pecché spisso Vargas(so), ‘mpicciannolo, facette ‘e stessi muvimente suĵe. Ll’uruguaggio però se dimustraje ‘o solito pedrero (cecchino) quanno lle capitaje ‘a palla d’ ‘o pareggio.
MAZZARRI 6 ‘A scuatra accumminciaje tutto summato bbuono, po ‘a rredda d’ ‘o Cesena cumplicaje malamente ‘a facenna. Â fine però purtaje â casa ‘o risultato ‘e ‘na partita ca annascunneva troppi ‘mbusce (insidie).’Mparticulare ‘o sbaglio ca isso stesso rcunuscette fuje ca a Vargas(o) ll’êsse avuto fà trasí a ppartita accumminciata;’a mossa Pandev(vo),fuje chella justa pe risolvere ‘na partita ch’êva pigliato ‘na bbrutta chieja. ‘A Mazzarri però m’aspetto ca riuscesse a truvà ‘a chiave ‘e ll’arco pe rennere cchiú redditizzie ‘e pprove d’ Inler(ro)!
l’arbitro DOVERI 6 M’aspettavo pejo ‘a ‘stu guaglione, ‘mpiacato (nun se sape ‘e che) vulterrano ‘e trentacinche anne ca teneva ‘nu debbeto cu ‘o Cesena pe bbia ca ‘ncampiunato ll’êva trattato ‘na chiaveca contr’â juventus(sa). Pe ffurtuna nosta ‘o guaglione ajeressera facette ll’ommo e pure si lassaje, senza mettere lengua, ca ‘e guagliune d’ Arrigoni, (ca pe mme po’ ffà sulo... ‘a marmellata) facessero ‘e capuzzielle cu ‘e cuane...nun se facette accuppà ô mumento culminante d’ ‘o finale travulgente dê pruteste menasante (minacciose) d’ ‘e nire cesenate quanno giustamente cunvalidaje ‘a rredda dicisiva ‘e Pandev(vo), visto ca ‘o pallone era trasuto tutto ‘mporta e ca ‘o purtiere ll’êva cacciato fora troppo tarde!
Cuncludenno,chella cu ‘o Cesena è stata ‘na vittoria ‘mpurtante assaje e ppure mméresita (meritata) e mmo ‘ncoppa ce aspetta o ll’Interre o ‘o Genoa e francamente i’ nun saccio proprio qua’ è mmeglio pe nnuje, visto ca so’ ffiglie a ddoje maruzze e ll’una fete e ll’ata puzza!
Speriamo bene.
Staveti bbe’ e si vo’ dDio ce sentimmo marterí!
R.Bracale Brak