SIENA -NAPOLI 22/01/12 1 A 1LL’AGGIU VISTA ACCUSSÍ

SIENA -NAPOLI 22/01/12 1 A 1
LL’AGGIU VISTA ACCUSSÍ

E che nne parlammo a ffà, guagliú! Oramaje ‘ncopp’a ‘nu piazzamento decente ‘ncampiunato è mmeglio ca ce mettimmo ‘nu crucione niro e lassammo perdere..., cuncentranno tutt’ ‘e fforze ‘e capa e de cosce ‘ncopp’â Coppa Italia accumincianno dâ partita ‘e miercurí ca vène ca ce prupone ll’Inter(re) ‘e Raniere ô san Paolo. Ma p’ ajere se trattaje ‘e n’ata delusione grossa assaje e menu male ca santu Pandev(vo) adderezzaje ‘na facenna ca comme s’era misa puteva jí a fferní pure pejo! Ajere s’aunette ‘a funicella corta e ‘o strummolo tiriteppo; ‘a funicella fuje ‘nu Napule troppo allero ‘ndifesa, cu ‘nu centrocampo senza idee, cu n’attacco stanco e debbusciato e ‘o strummolo fuje ‘o purtiere d’ ‘o Siena ca se mettette a ffà ‘o fenomeno. Cuncrusione ? N’ati dduje punte perze. Rassignammoce!’Stu campiunato oramaje s’è bbello ca futtuto: ’o ggirone d’annata è gghiuto comm’ è gghiuto, cioè ‘na meza chiaveca e nun m’aspetto ‘e cchiú ‘a chillo ‘e ritorno!Cuncentrammoce ‘ncopp’â Coppa Italia ch’ è mmeglio e vedimmo ‘e nun farce fottere pure lla! Passammo ê ppaggelle:
DE SANCTIS 5,5 Corpe nun ne tenette ‘ncopp’â rredda, ma beneditt’ ommo nun fa ‘nu miraculo manco si ll’accidono.., assistette senza fà niente ô festivallo ‘e ll’abburracciamente (alla sagra degli orrori) d’ ‘a difesa soja . Pe furtuna ca dint’a n’ata accasione Calaiò ll’aizaje ‘a mano e ‘o perdunaje.
ARONICA 5 Partette ‘nu poco meglio d’ ‘e cumpagni,ma fernette pe perderse ‘mmiez’ê fullune suĵe e d’ ‘e suoje. CANNAVARO 4,5 Dagnino (disastroso)! Partita overamente bbrutta! Se facette truvà spisso fora pusizzione.
Sbagliaje sistematicamente ll’anticipo ‘ncuollo a Calaiò ca ‘na vota ce grazziaje e ‘na vota ce futtette!
CAMPAGNARO 5 Pronti via, ammunito.E ‘stu fatto ‘o cundizziunaje assaje facennole fà ‘na partita sempe a perzeguí (a rincorrere) spisso sbaglianno mesura; ‘a forma fisica scadente facette ‘o riesto.
DOSSENA 4,5 Si nun fósse pe cchill’unicu cruzzo ‘ncarrato ‘ncopp’ â rredda ‘e Pandev(vo), praticamente êva sbagliato tutto cosa.
INLER 5 - Nun tutte ‘e corpe songo soje, ma cumunque ‘o filtro a centrocampo nun ce stette e ‘a riggia fuje bradosa e previsibbile.
GARGANO 4,5 – A ppietto cu ‘o turco-napulitano ce mettette sulo ‘nu poco ‘e vivacezza, ma senza zuco!Se ‘nfessisce a ffà cose (tirà punizzioni) ca nun è articulo suĵo.
MAGGIO 4,5 - Cumpletamente fora partita e fora forma. S’ êsse avuto sustituí primma. Me dispiace, ma è ll’ombra d’ ‘o jucatore ‘e ll’anno passato!
HAMSIK 4,5 - Ô primmo tempo sbagliaje praticamente tutto e ô siconno aizaje póvera!
PANDEV 8 Santo súbbeto! Peccato sulo pe chillu tiro all'urdemu minuto ca ‘o purtiere lle paraje.êsse signato ll’avesse miso diece: Criaje juoco , luttaje, signaje ‘na rredda ‘a vero centravante,difennette ‘a palla e ricataje (fece dribbling)a rripetizzione. Nun se ne po’ ffà a mmeno.
CAVANI 5 – ‘O ricore sbagliato fuje ll’epitommé (il riassunto) ‘e ‘na partita senza zuco e senza sale.È ttroppo stanco!
All. MAZZARRI 4,5 – ‘O motulo è è previsibbile (prevedibile,), troppi jucature so’ fora forma, quaccuno (Cannavaro) ‘mpresuttito (ingrassato) Maggio e Inler(ro) so’ ffora dô juoco, ‘a difesa è ‘nu scolamaccarune, ‘e schemi d’ ‘e ppunizzione fanno ridere e fa ridere Gargano ca se ‘nfessisce a tirarle senza ca ll’allenatore ‘o cazzeja. Pe nun parlà d’ ‘e cagne sempe troppo tardíe(tardivi). Oramaje, bello ‘e si’ Rafele tiene ‘nu juoco previsibbile assaje accummincianno ggià dâ palla a ccentro; te sî ‘ncapunito cu ‘o stesso motulo e cu ‘e stessi jucature ca so’ troppo spumpate!Nun passa partita ca Aronica, Cannavaro e Campagnaro a tturno nun fanno cchiú ‘e ‘na puttanata; s’êsser’ ‘a arrepusà ‘mparanza, dànno spazzio a Fernandez(zo), Grava, Britos(so) e ppure Fideleff(o) o piscanno dint’â scuatra primmavera.E che saciccio! Ce sta pure quacche gguaglione decente, o tenimmo tutte meze cazette?!N’urdema cosa: ma nun ‘o vvide ca ‘o Napule ô ssolito attacca cu dduje, tre uommene ô massimo contro a ‘na difesa a ccinche e ppiazzata,lassanno stranamente pratère (praterie) scunfinate a ll’attaccante avverzarie?Datte ‘na sciacquata ‘e faccia!
l’arbitro DAMATO 4,5 ‘e stima e pe cchello ca ce cumbinaje a settembre cu ‘o Chievo.
E fermammoce cca. Appuntamento, si Ddi’ vo’, a ggiovedí ca vene speranno ca ve pozzo cuntà ‘e ‘na vittoria! Cu ‘na bbona salute!
R.Bracale Brak