PATANE Â PARULANA

PATANE Â PARULANA Chello ca ce vo’ pe sseje perzone 600 gramme ‘e patane vecchie, 150 gramme ‘e pancetta affummecata tagliata a ffarinule ‘e ½ cm. ‘e ‘squina, ‘na cepolla ndurata ‘e Muntoro ammunnata e ntretata, ‘nu cerasiello pircante (piccante)lavato, asciuttato e grabbato (inciso) p’ ‘o lluongo, ‘nu bicchiere d’uoglio ‘auliva dunciglio, ‘na tazzulella abbunnante d’acito ‘e vino janco sale fino e ppepe janco mmacenato a ffrisco q.n.s. ‘nu tuppeto ‘e prutusino lavato, asciuttato e ntretato. Comme se fa Ammunnà ‘e ppatane, lavarle, asciuttarle e tagliarle a fellocce tonne doppie ½ cm..Ricà ll’uoglio dinto a ‘na prupurziunata tiella, agnadí ‘na cepolla ndurata ‘e Muntoro ammunnata e ntretata,‘nu cerasiello pircante (piccante)lavato, asciuttato e grabbato (inciso) p’ ‘o lluongo,e a ffuoco allero farle piglià culore; agnadí ‘e ffarinule ‘e pancetta affummecate e farle suassà pe cinche minute; appena è ppronta agnadí ‘e ffellocce ‘e patane e lassà cocere pe ddiece minute avutannole dellicatamente ògne ttanto; quanno so’ ccotte accunciarle ‘e sale e ppepe e ciurrarle (spruzzarle) cu ll’acito. Lassà svapurà, stutà ‘o ffuoco e derrammà cu ‘o tuppeto ‘e prutusino lavato, asciuttato e ntretato, ammiscà e serví. Bbona salute! R.Bracale