TAGLIULINE CU ‘E PUPARUNCIELLE ‘E SCIUMMO

TAGLIULINE CU ‘E PUPARUNCIELLE ‘E SCIUMMO Chello ca ce vo’ pe sseje perzone 600 gramme ‘e tagliuline, 400 gramme (piso lisso) ‘e puparuncielle ‘e sciummo senza streppone lavate e asciuttate, ‘nu bicchiere d’ uoglio ‘auliva dunciglio, ‘nu spiculo d’aglio ammunnato e ntretato finu fino, 300 gramme ‘e pummarole pelate, ‘nu mazzetto ‘e vasenicola lavato asciuttato e ntretato a mmano ‘nu cerasiello pircante (piccante)lavato, asciuttato e grabbato (inciso) p’ ‘o lluongo, ‘nu bicchiere d’uoglio ‘auliva dunciglio, sale duppio ‘na vrancata, sale fino e ppepe janco mmacenato a ffrisco q.n.s. Comme se fà Appruntà ‘e puparuncielle ‘e sciummo, levanno ‘o streppone, lavannole e asciuttannole;chille ca fossero troppo gruosse spàrterle p’’o lluongo a mmità e levà ‘e semmente.Ricà ll’uoglio dinto a ‘na prupurziunata tiella, agnadí ll’aglio trigliato e ‘o cerasiello pircante (piccante)lavato, asciuttato e grabbato (inciso) p’ ‘o lluongo; a ffuoco allero fà piglià culore a ll’aglio e comm’è pronto agnadí‘e puparuncielle ‘e sciummo senza streppone lavate e asciuttate e lassà cocere sempe a ffuoco allero pe cinche minute, súbbeto doppo agnadí‘e pummarole pelate, accuncià ‘e sale e ppepe janco mmacenato a ffrisco e fà cocere pe ddiece minute, avascianno ‘o ffuoco; fraditanto àrvere teniente teniente ‘e tagliuline dinto a otto litre ‘e acqua vullente salata (vrancata ‘e sale duppio), scularle e revacarle dint’ â tiella cu ‘o zuco caudo. Tenerle a ffuoco allero pe ‘nu paro ‘e minute e a ll’urdemo, fora dô ffuoco, derrammàrle cu ‘o mazzetto ‘e vasenicola lavato asciuttato e ntretato a mmano. Ammiscà, ‘mpiattà e serví caude ‘e fuculare ‘sti sabruse tagliuline cu ‘e puparuncielle ‘e sciummo. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale . .