PALERMO – NAPOLI 13/03/16 (0 A 1) ‘A VEDETTE ACCUSSÍ

PALERMO – NAPOLI 13/03/16 (0 A 1) ‘A VEDETTE ACCUSSÍ Ma tu qua’ trainerro nuovo e ttrainerro nuovo guagliú? Cu ‘o Napule ‘e ‘sta tempurata (stagione) nun ce so’ ccacchie!Si à dda vencere, vence! Ajeressera a pPalermo lle serveveno ‘e tre ppunte, êv’’a vencere e vvincette pe nun lassà ‘e pere ‘a vecchia zoccola janca e nnera e ppe mmettere ‘e ccose ‘nchiaro cu ‘e sbruffune ‘e Spalletti ca s’ànn’’a mettere dint’ê cchiocche ca ‘o siconno posto ‘ncampiunato è ‘o nuosto e ‘o mullammo sulo pe ppigliarce ’o primmo posto! Me dispiace sulo ca ajeressera se vincette p’uno a zzero appena senza sbrasà, addó, pe ttutto chello ca ‘o Napule facette vedé durante â mubbara (partita) avesse merretato ‘e vencere allimmeno tre a zzero, senza arrubbà niente; purtroppo sotto porta Lorenzigno sbagliaje cchiú ‘e ‘na vota e sciupaje cchiú n’accasione. Pacienza! Jette accussí e gghiammo annante speranno ca primma o doppo ‘o Napule turnasse a vvencere sbrasanno comme me piace e ‘o Ciuccio po’ ffà! Passammo ê ppaggelle: REINA 6,5 Pe cquase tutta ‘o fullè (match) s’ammusciaje visto ca nun fove maje chiammato a spurcarese ’e guante,però fove pronto ‘ncuoll’a Vazquèzzo e cquanno êtt’’âscí; pe nnun dicere po ca me facette murí p’’a simpatia ‘e comme s’avutaje facenno ‘e scungiure pe nnun vedé ‘o ricore d’’o Pipita; vuó vedé ca chist’è cchiú nnapulitano ‘e me? HYSAJ 6 - Attiento a ddritta, spisso se staccaje comme a gGhoulàmmo galuppanno ‘ncopp’â curzia p’allarià ‘a manovra. ALBIOL 6,5 Gruosso: carriato ‘nterra dint’â muntaca(area di rigore) palermitana se prucuraje ‘o ricore ca sbluccaje ‘o risultato e ffove risulutivo: addereto cuntrullaje a dduvere ‘a camma (zona) ‘e cumpetenza soja e ppure ‘e cchiú. KOULIBAL 6,5 ô ssolito facette valé ‘o putere ‘e ll’armaddia (fisico) soja e ajutaje ‘a scuadra ascenno palla ô pere dâ trasera (difesa)e ssulo raramente sufferette ‘a tacnía (tecnica) ‘e Vazquèzzo. GHOULAM 6,5 Appressuraje (spinse) custantemente a mmancina; cercaje pure ‘a porta cu ‘nu bbellu tiro rispinto ‘a Sorrentino. ALLAN 7 Sette purmune s’’a vedette ‘e bbella e tturnato a essere isso, ricuperaje ‘na cifra ‘e pallune currenno pe ttutto ‘o campo e pparticipànno pure a ll’azzione d’attacco cuano (azzuro). JORGINHO 7 Atalossa (prestazione) ‘e perzunalità d’’o guaglione ca ggestiunaje (gestí) a cciammiello ‘o tadaffuco (flusso) d’’a manovra d’’a scuatra. HAMSIK 6 – Nun steva bbuono e sse vedette cu ‘na mubbara (partita) ca fove ‘ntralciata dê prubbleme avute â matina; però ‘o capitano, strignenno ‘e diente partecipaje a ll’urganizzazziona d’’o juoco pure senza particulare note pusitive. [Dô 72' D. LOPEZ 6 – Agghiuntaje (aggiunse) muscule nicessarie ô centrocampo d’’a scuatra]. INSIGNE 5,5 traseraMiezu zifo (voto) mancante pecché si riuscette cu ll’azzione soje a armà ‘e cumpagne ‘e sezziona (reparto) crianno prubbleme â tràsera (retroguardia) rosa e nniro, sciupaje ‘nu pare accasione avute soprattutto quanno jettaje a mmare n’urtizzazzione (verticalizzazzione) ‘e Ggiorgigno ca ‘o mettette a ttu ppe ttu cu sSorrentino e isso le cunzignaje ‘o pallone. E nun ce ‘o ppozzo perdunà! [Da ll’ 88' El KADDOURI s.v.] HIGUAIN 7,5 Mettette ‘a firma sott’â nichemata (vittoria) cu ‘na siggiata libbera e franca da ll’unnice metre spiazzanno ‘o purtiere e mmettenno ‘ncarniere ‘o vinisettesimu stuco (gol) ‘ncampiunato pe ssuppuntà ‘a crassifica d’’e nassie (cannonieri) ca ‘o vede ancòra primmo. P’’o riesto se dette sempe ‘a fa spaventanno ‘a tràsera (retroguardia) rosa e nniro sulo muvennose dint’â muntaca(area di rigore) palermitana ‘nfra difenzure ca quase ‘o spugliajeno appennennose â maglia. CALLEJON 6 Tante foveno ‘e taglie ‘e Peppe ‘a ‘Nguenta can un sempe fove assecundato dê cumpagne;tenette però sempe sotto pressione a pPezzella e Ândelkoviccio. [Dô 65' MERTENS 6 Ciro se vedette ‘e dicere "no" da Sorrentino quanno isso cercaje ‘o stuco(gol) cu ‘nu bbellu tiro a vvolo. Peccato!Contro ô Napule tutt’’e purtiere cacciano ‘a scienza…] Allenatore SARRI 6,5 Comme isso vulette, fove ‘a scuatra soja a ffà ‘a mubbara ( partita) e nnun fove sfarma (colpa) soja si ‘e cuane (azzurri) nun riuscetteno a sbrasà, tenenno ‘nsi a ll’urdemo ‘nfullè( nel match) ‘o Palermo. Arbitro ROCCHI 5,5 ‘Ata meza cazetta nun ne putette fa ‘o mmeno ‘e dà ‘o ricore ô Napule quanno Albiollo fove carriato ‘nterra dint’â muntaca(area di rigore) palermitana, ma p’’o riesto me piacette poco soprattutto pe ccomme gestiunaje (gestí) ‘e cartelline jalizze (gialli) nutizzianno (ammonendo) Lopezzo e Albiollo. E mmettimmo punto cca, ringrazziannove pe ll’attenziona e dànnove appuntamento si dDi’ vo’, â prossima vota, ca mo comme a mmo, perdunateme, ma nun saccio quann’è. Staveti bbe’! R.Bracale Brak