ME PARE CA FÓSSE ORA

ME PARE CA FÓSSE ORA
Me pare ora ca a ppavà ‘o costo d’ ‘a crisi ca sta atterranno ll’Italia fossero ‘e capitalisti, ( ciovè chille ca ‘e sorde ‘e ttènono overamente e spisso nun se sape manco comme se ll’ànnu fatte..), fossero’e cammurriste, fossero ‘e mafiuse, fossero ‘e puliticante janche, russe verde turchine e paunazze, fossero ‘e speculature, fossero ‘e nnacchennelle d’ ‘o sport(o) e d’ ‘a televisione e nun ggià cchiú ‘e povere criste: operaje,’mpiacate ‘e cuncetto e penziunate ca se zucano ‘a sputazza ‘mmocca e nun tenono cchiú manco ‘e sorde pe ffà ‘a spesa e mettere ‘nu piatto a ttavula. Mettere n’ata vóta ll’ICI ‘ncopp’â primma casa chella addó uno ce sta ‘e casa, è nu scuorno senza fine!
‘A CASA È ‘NU DIRITTO, NO ‘NU LUSSO PATRIMUNIALE! ‘E patrimonie songo ate e ppenzo ca ‘o presidente Mario Monti ‘e ssape bbuono e nnun è nicessario ca i’ nce ‘o rricordo. ‘Ncaso cuntrario so’ cunvinto ca ‘o popolo ttaliano,’a fora d’ ‘o sottoscritto (ca fisicamente nun s’ ‘o ppo’ permettere), scenne ‘mparanza ‘nchiazza a ffà ‘e bbarricate, pecché nun è pproprio justo cchiú ‘e mettere ‘e mmane dint’ê ssacche ‘e ll’italiane cchiú puverielle, pe cuprí pure ‘e vinticinchemila evere ô mese ca ‘o nuovo senatore a vvita e nuovo presidente d’ ‘o Cunziglio Mario Monti à dda avé ògne mmese p’arriducere, (comme vonno ‘a Goldman Sachs e ‘o Bilderberg Group) â distruzzione cumpleta e tutale ‘o popolo ttaliano, ma chillo cumposto dâ ggente ummela e ppovera..., e nno p’annientà chella parte d’ ‘o popolo ttaliano fatto ‘e camorra, mafia, speculature e malaffare ch’ è ‘a vera e unica causa d’’o sfascio ca ce affligge! Si ‘o bongiorno se vede dâ matina aggio ‘a ‘mpressione ca chesta e cchelle ca venono so’ ghiurnate ‘e trònnele, saette e acqua a lancelle!
Brak