NAPOLI – LAZIO (19/11/11) 0 A 0LL’AGGIU VISTA ACCUSSÍ

NAPOLI – LAZIO (19/11/11) 0 A 0
LL’AGGIU VISTA ACCUSSÍ

Eccuce cca guagliù doppo na privazziona ‘e pallone luvardo ‘e nun me ricordo quanto..., eccuce a pparlà ‘e n’ata meza ‘ntussecata giacché ero quase sicuro ca ajeressera ô san Paolo, ‘o Napule s’êsse spurpato ‘o pappavallo ‘e Lotito visto ca Reja avesse avuto fà a mmeno ‘e ggente ‘mpurtante accummincianno ‘a Klose ch’è ‘nu pallino mio viecchio ca avesse visto cu piacere... E ‘mmece che vuó spurpà?! ‘O Napule e soprattutto Cavani nun so’ cchille d’ ‘a passata tempurata. Ajeressera pe tutto ‘o primmo tempo ‘e guagliune cuane nun facettero ‘o riesto ‘e niente e cquanno, ô siconno tempo, ‘o Napule accumminciaje a gghiucà mettenno ‘ndifficultà ‘a Lazzio, spicialmente cu ‘o Pocho, ecco ca Marchetti accumminciaje a ffà ‘o fenomeno e salvaje cu allimmeno tre ‘ntervente decisive ‘a Lazzio (ca purtava ‘o llutto nun saccio pe qua’ mutivo); fuje accussí ca ‘a scuatra ‘e Reja riuscette a purtarse ‘a casa ‘nu punto,e forze se ne purtava tre si avesse jucato Klose e nno Cissé..., mentre ca ‘o Napule cu ‘e duje perze ajeressera allungaje ‘a lista d’ ‘e punte ca ce venono a mmancà quanno â fine, sott’ô lampione, s’ ànn’ ‘a fà ‘e cunte.
Nun avastanno Marchetti po ce se mettette pure Rizzoli ca annullaje ‘na redda a Ccavani pe n’ órzo ‘e cóse (fuori gioco) o ‘e Maggio o ‘e Cavani (ca però nun ce steva!)Preciso pe cchi nun avesse visto bbuono o nun se ll’arricurdasse e dico ca ‘a redda ‘e Cavani ca aveva avuto ‘a palla ‘a Maggio era recolare assaje ‘nquanto l'esterno cuano quanno aveva avuto ‘o pallone steva ‘nu metro primma d’ ‘a linia d’ ‘e difenzure....Nun ce ll’avesse annullata mo forze stessemo a pparlà ‘e ‘nu granne Napule ca êsse pigliato a vvolo ‘nu treno ‘e passaggio... Nun ghiette accussí e dicimmo allora ca Rizzoli ajeressera se levaje ‘o debbeto ca teneva cu ‘a Lazzio pe ‘na redda ‘e Brocchi nun vista, me pare ô tre abbrile...Rummane però ‘a delusione p’ avé jucato sulo l'urdema mez'ora e cchella ‘e nun tené n’attaccante ‘e piso (facite cunto ‘nu Denis(so) o ‘nu Calaiò) ‘a mettere a ffianco ‘e Cavani dinto a ll’aria ‘e ricore...’nquanto tutte ‘e cruzze (i cross) di Maggio e Dossena chella grama vòta ca riesceno..trovano sempe lla mmiezo sulo sulo ô Matador(ro). P’ ‘a fissazzione ca tène Mazzarri ‘e fà partí Lavezzi ‘a luntano ce vo’ pe fforza uno ca desse ‘na mano lla ‘nnante a Cavani... e nun po’ essere Marekiaro! Cuncludenno nun ce rummane ca piglià nota ca ‘e guagliune cuane nun riuscettero a ssaglí ‘ncopp’ô treno bbuono,e ‘o Napule s’à dda rammaricà d’esserse deciso a gghiucà comme sape troppo tarde; ma cuntinuanno a ffaticà, so’ ccerto ca priesto po’ passà n’ata cuincidenza ‘a puté piglià a vvolo.
Pe mmo tocca ô Manchester City, p’ ‘a partita cchiú ‘mpurtante d’ ‘a tempurata e è n’appuntamente ‘a nun mancà. Accussí spero!
Passammo ê ppaggelle:
DE SANCTIS s.v.. Se guardaje ‘a partita senza pavà biglietto e s’êsse pure pututo purtà ‘na seggia pe vedersela commotamente assettato.
CAMPAGNARO 6+ - Réscuso (roccioso) ‘nfase difenziva,êsse pututo fà coccosa ‘e cchiú quanno se trattaje ‘e appressurà.
CANNAVARO 6 – Favurito ‘a ll’assenza ‘e Klose, facette ‘o vallo ‘ncopp’â mmunnezza cu Cissé.
ARONICA 6,5 - Comme succedette pe Grava durante â passata tempurata, Totò se dimustraje ‘nu pierno d’ ‘a difesa,tadiello (impeccabile) e ssicuro.
MAGGIO 6- – Tenesse ‘e piere ‘e Maicon(no), stessemo parlanno ‘e nu marziano. Appressuraje pe ttutte ‘e nuvanta minute, sbaglianno però quacche cruzze
INLER 6 – Fuje malamente attènnuto (assistito) ‘a Dzemaili ô primmo tempo, ‘nu poco meglio quanno trasette Gargano.
DZEMAILI 4,5 – ‘Nturtato (Inesistente) e ‘nzicuro. Sulo ‘na bbella punizzione a ll'attivo.
( dô 57° GARGANO.5,5 Fà pejo ‘e Dzemaili era quase ‘mpussibbile. Pe poco nun ce riuscette).
DOSSENA 4,5 – N’avesse ‘ncarrata una!Pe mme oramaje a cchisto s’ à dda sulo ruttamà a ggennajo e fà carte faveze pe fà turnà a Vvitale!
(dô 28° PANDEV. 5,5 – Quacche bbuonu palleggio,ma servette a ppoco e nun riuscette a ddà sustanza e significato ô ppoco ca facette).

HAMSIK 5 – Spaisato e senza ggenio se jette annascunnenno paricchio.
’A Marekiaro ce s’aspetta ‘e cchiú spicialmente quanno se joca ‘na partita ‘mpurtante comme e cchella d’ajeressera!
LAVEZZI 6,5 – Sbagliaje ‘na redda facile, facile, po chillu canchero ‘e Marchetti lle negaje ‘a joja ‘e ‘na redda ca tutto ‘o pubbrico steva aspettanno...È cumunque ‘nu jucatore ‘mpurtante assaje pe chesta scuatra, spicialmente si ‘a fernesce ‘e partí ‘a luntano e se decide a ghiucà cchiú annante, puzo a ppuzo cu Cavani!
CAVANI 5,5 – Nun è ancòra isso! ‘O Matador(ro) d’ ‘a passata tempurata â Lazio d’ajeressere ce n’avesse fatto allimmeno ‘nu paro! Sperammo ca se repiglia.
ALL. MAZZARRI 5 – ‘A scuatra abbiaje a gghiucà troppo tarde.’Nu primmo tempo rialato a Rreja.Ô siconno nun se rennette conto ca ce fosse vuluto pure Mascara ô posto ‘e ‘nu Marekiaro spaisato e senza ggenio!
l’arbitro RIZZOLI 3 ‘Ncumpetente, ‘nmalafede e malamente attènnuto (assistito) annullaje a Ccavani ‘na redda sacrusanta e ce ‘ntussecaje ‘a serata!
GUARDALINEE (di ds. e sn.) 3 cecate , mute e ssurde!
E cu cchesto ve saluto e si vo’ dDio ce sentimmo ‘a prossima vota. Staveti be’
R.Bracale Brak