. REGGINELLE CU ZZUMPAGLIATA ‘E CUCOZZA

REGGINELLE CU ZZUMPAGLIATA ‘E CUCOZZA Chello ca ce vo’ pe sseje perzone 600 gramme ‘e regginelle, 500 gramme (piso lisso) ‘e cucozza jalizza, ‘nu bicchiere d’ uoglio ‘aulive dunciglio, dduje spicule d’aglio ammunnate e ntretate, ‘nu cucchiaro e mmieze ‘e ammennole arruscate ô tiesto, ‘nu cucchiaro d’uva passa ammullata, dduje puparuncielle percante (piccanti)lavate, asciuttate e grabbate (incisi) p’ ‘o lluongo, sale duppio ‘na vrancata, sale fino e ppepe janco macenato a ffrisco q.n.s., 100 gramme ‘e caso pecurino rattato finu fino, ‘nu tuppeto ‘e prutusino lavato, asciuttato e ntretato finu fino. Comme se fa Taglià a ffarinule ‘e 2 centrimete ‘e squina ‘a cucozza ammunnata, lavarle e asciuttarle.Dinto a ‘na prupurziunata tiella mettere a ffuoco allero ll’uoglio cu ‘e dduje spicule d’aglio ammunnate e ntretate, ‘e dduje puparuncielle percante (piccanti)lavate, asciuttate e grabbate (incisi) p’ ‘o lluongo; appena aglio e puparuncielle ànnu pigliato culore, agnadí ‘e ffarinule ‘e cucozza jalizza,allungà cu ‘nu bicchiere d’acqua vullente, accuncià ‘e sale fino ppepe janco macenato a ffrisco, avascià ‘o ffuoco, cummiglià e lassà cocere pe vinte minute ammiscanno spisso;â fine agnadí ll’uva passa e lassà pappià pe dduje minute.A ‘stu punto revacà tutto dinto a ‘nu mmiscraturo, agnadí ll’ammennole arruscate e siffulà ‘nfi a uttené ‘na zumpagliata dellicata e criceta; metterla dint’ â tiella e tenerla a ffuoco miccio. Fraditanto arvere teniente teniente ‘e riggenelle dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â tiella cu ‘a zumpagliata ‘e cucozza; agnadí tutt’ ‘o ccaso pecurino, ammiscà e misturà pe cinche minute; â fine a ffuoco stutato derrammà cu ‘o ‘o tuppeto ‘e prutusino lavato, asciuttato e ntretato finu fino; ammiscà ancòra e ‘mpiattà. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale .