NAPOLI- JUVENTUS (30.03.14) 2 A 0

NAPOLI- JUVENTUS (30.03.14) 2 A 0 ‘A VEDETTE ACCUSSÍ Mo pozzo pure murí cuntento, guagliú e ccu ‘o zzuccaro ‘mpont’ô musso... Tutto arriva a cchi sape aspettà e i’ ‘a jurnata d’ajere ‘a stevo aspettanno ‘a nuvembre passato, ‘a stevo aspettanno p’avé ‘a suddisfazziona ‘e vedé ascí dô san Paolo ‘a scuatra ‘e marotta e parrucchino conte scunfitta e mmazziata a dduvere. E ajeressera ll’avette ‘sta suddisfazziona quanno ‘e cuane cunzignajeno ddoje sfugliatelle a ggianluigi bbuffonno ca s’’e ppurtaje â casa senza manco ‘ncartarle... Mo pozzo pure murí cuntento cu ddint’a ll’uocchie ‘a faccia ‘e cestunia d’’o purtiere lloro primma rammaricato d’essere stato futtuto ‘a Cagliecònno e ppo ncazzato cu ‘e suĵe p’’a rredda ‘ncassata ‘a Mertenso, mentre parrucchino-conte se grattava ‘e perucchie d’’a zella soja e nun se faceva capace! So’ ccose ca nun se scordano... comme nun se scorda ca ajeressera ‘a scuatra ‘e don Rafele facette n’atalossa (prestazione) quase cratista (perfetta), pe ccuje si mo v’avesse ‘a dicere chi fove ‘o meglio proprio nun sapesse scegliere... Tutte, tutte detteno ‘na bbona mana pe stennere ‘a vecchia zoccola janca e nnera... accumincianno ‘a don Rafele ca dètte ‘na lezziona a cconte e ‘o ‘mparaje a ffà ll’ommo e si ‘o parrucchino s’’a cavaje sultanto cu ddoje sfugliatelle, êtt’’a ringrazzià a ssantu bbuffònno (ca facette allimmeno tre miracule) e a ll’arbitro Orsato (ca annullaje ‘na rredda a mMarekiaro pe nn’urzo’ecóse (fuorigioco) ca vedette isso e quacche pennarulo juventino, addó ca i’ vedette a cChiellini ca, nchiummato ‘ncopp’â linia ‘e porta..., ‘o teneva ‘nghiuoco) e ca nun vulette vedé ‘nu sbuttulone ê spalle dato ô Pipita, dint’â camma ‘e ricore juventina, sempe ‘a chillu zimmaro ‘e Chiellini. Ma nun fa niente! Chi à avuto, à avuto e cchi à dato, à dato!’A cosa bbella e ‘mpurtante fove ca vincettemo â faccia ‘e chi nun ce stima e cce vo’ male! Ànn’’a schiattà quante cchiú ne songo! Passanno ê ppaggelle i’ ll’avesse miso nove a ttutte quante, ma pe nun esaggerà, vaco cchiú ccuoncio e ddico: REINA 6,5 Serata tranquilla ‘e Pepe ca nun êtt’’a fà ‘e straurdinarie; ‘ncopp’a quacche cunchiusione juventina senza pretese fove sempe sicuro e priciso e se dimustraje campione ascenno ‘e pere fora d’’a camma soja. HENRIQUE 7 Soprattutto ô primmo ajone quanno ‘a juve se mantenette chiusa e ‘o Napule jucaje dê pparte soje, ‘o brasiliano fove prutacunista ‘e ‘na granna atalossa(prestazione) e ppo nsi’ ô prazzo ( fino alla fine) nun perdette maje ‘a carma e ttruvaje sempe ‘a chesema (il varco) p’’a jucata adatta. FERNANDEZ 7 Mettette ‘a musarola a cchi capitaje dê pparte soje senza nisciuno sfregazzo (sbavatura) e ascette sempe bbuono palla ô pere pe sustàtere (impostare) quanno gGiorgigno nun putette ricevere palla! ALBIOL 7 Cummannaje a mmestiere ‘a linia d’’a tràsera (difesa), accurcianno ‘a scuatra ô finale ‘e fullé.Ce mettette ‘o mestiere e ‘o fisico pe bbluccà a n’accunto tuosto comme a Llorente e ffove priciso dint’a ttutte ‘e cchiusure. GHOULAM 6,5 Prubbabbilmente pecché accussí vulette don Rafele, isso nun appressuraje (spinse) comme ô ssolito,accuntentannose ‘e difennere cu attenziona ‘a curzia soja; iuperocia (fantastica) ‘na chiusura ô finale ‘ncopp’a Vuciniccio. Sfresaje (sfiorò) ‘a rredda cu ‘na bbella puniziona. INLER 6,5 Tutto summata bbona atalossa d’’o turco-napulitano, soprattutto ‘nfase ‘e prutezziona d’’a tràsera (difesa); peccato pe quacche prano (svarione) ‘nfase ‘e plantamiento (impostazione). Bluccaje a pPogbà e vincette tutte ‘e bbriche (duelli). JORGINHO 6,5 Sciso ‘ncampo p’’o terzo fullé cunzecutivo, rispunnette cu n’atalossa (prestazione ) cunvincente e de qualità, dànno raggione a ddon Rafele! INSIGNE 7 Finalmente ‘nu bbellu fullé ‘e Lorenzigno: lle mancaje sulo ‘a rredda pecché p’’o riesto nun fove maje a ccurto ‘e forze appressuranno e difennenno ‘ncopp’â curzia ‘e mancina senza maje scennersene ‘e pressione; quanno partette palla ô pere ll’avverzarie jetteno dint’ê cchiavette senza riuscirlo a ttené. ‘Na pennellata d’artista ‘o bbassurero suĵo a uocchie chiuse pe mmettere ‘a palla lla addó sapeva ca arrivava Caglecònno! HAMSIK 6,5 Pigliaje finalmente pe mmano ‘o Napule cu bbuonu passo, senza fermarse maje ‘nfase difenziva, e ‘nfase uffenziva alternaje cagne ‘e juoco (ca disturbajeno ‘a juve) a urtizzamiente (verticalizzazioni) ‘mpurtante. (dô 79° MERTENS 7,5 N’arillo! Cercajeno d’’o fermà cu ‘e ttriste, ma isso se jucaje meza difesa d’’a juve e mettette ‘o pallone ê spalle ‘e buffònno ‘ncopp’ô palo luntano nchiudenno ‘a prattica!) CALLEJÒN 7,5 Signaje ‘na rredda pesante, chella ca sbluccaje ‘o fullé, sbucanno ê spalle d’ Asamoàh, dimustrannose jucatore frubbo e ‘nteliggente e p’’o riesto dètte isurrupío (equilibrio) â scuatra currenno pe nuvanta minute. (da ll’88° DZEMAILI sv) HIGUAIN 6,5 Nun avette pallune ‘a sfruttà sotto porta, ma s’avasciaje assaje pe ffavurí ‘o sviluppo d’’a manovra lanzanno ll’esterne; spennette assaje e ascette stracquato e spisso fove mazzuliato ‘a chillu cammurristo ‘e Chiellini ca ‘o stennette pure dint’â camma ‘e ricore juventina senza ca chillu bbello mobbile d’Orsato facesse ‘na chieja.(dô 74° PANDEV 7 Trasette e se facette súbbeto valé: apprimma lanzaje a mMarekiaro ca se magnaje ‘o doje a zzero e ppo, cu ‘nu colpo ‘nsotto, facette ‘o capolavoro cunzignanno a Mertenso ‘a palla d’’a rredda ca nchiudette ‘a prattica e ‘ntussecaje a ttutte ‘e janche e nnire ‘ncampo e ffora). BENITEZ 9 ‘O Napule se mettette sott’ê tacche ‘a juve cu n’atalossa ‘a ‘ncurnicià, probbabbilmente ‘a cchiú bbella e cunvincente d’’a tempurata (stagione). Cu ttutto ca ‘e cuane sbaglieno cchiú ‘e ‘na vota sotto porta e ca buffònno facette quacche miraculo,’e cuane riuscetteno a vvencere ‘a mamma ‘e tutt’’e fullé sfruttanno ‘a tecnica ‘e Pandèvvo ca sfurnaje ajude a rripetizziona, mentre, pe pparta soja, ‘ncopp’â curzia ‘e dritta Henrique assicuraje â tràsera (difesa)fermezza (solidità) e cqualità; Giorgigno, po è oramaje ‘na pedina funnamentale pe ‘sta scuatra; certo ce sta ‘a magnarse ‘e mmane p’’e troppi punte perdute cu ‘e piccerelle o rijalate cca e lla, ma ‘a lezziona ‘e don Rafele è sservuta e sta servenno e ‘o Napule sta maturanno strata facenno mettenno ‘na pezza pure ê tanti ‘mpicce (infortuni), e l’atalossa d’ajere fove ‘a dimustrazziona ‘e chello ch’aggiu ditto e servette a ddà cunfianza (fiducia) p’’o futuro; manca poco p’arrivà a ll’arriba (al top), e ppure ll’avverzarie ànnu capito ca ‘a differenza ‘nfra ‘e ddoje scuatre nun è cchella d’’a crassifica. ll’arbitro ORSATO 5 E ll’aggiu trattato! Chesta meza cazetta teneva cchiú ‘e ‘nu debbeto cu ‘o Napule e ajeressera, mmece ‘e se ne levà quaccuno, aumentaje ‘a ddosa facennose ‘nzurfà pe tutt’ ‘o fullé ‘a chillu nnacchennello ‘e Pirlo ca nun ‘o mullaje ‘nu mumento e lle cammenaje a ffianco pe tutt’ ‘o campo dicennole chello ca êv’ ‘a fà. E isso ‘o stette a ssèntere siscanno sí e nno tre punizzione p’ ‘o Napule e allimmeno sette vote tante a ffavore d’ ‘a juve cu tutto ca ‘e piamuntise, ‘mprimmese Pogbà, Vidàllo e cChiellini, foveno tanti chianchiere ca mazzulajeno sistematicamente ‘e nuoste senza ca ll’arbitro vedesse niente e infatti nun vedette pe tutt’ ‘o fullé ca Chiellini ‘o steva facenno martire ô Pipita ca se fósse mmeretato ‘o ricure a ffavore p’essere stato stiso ‘nterra dint’â camma juventina cu ‘nu sbuttulone ê spalle e p’ ‘e tante fute subbíte e mmece Orsato nun ce ddétte niente! Pe nun dicere po d’’a rredda annullata a mMarekiaro pe nn’urzo’ecóse (fuorigioco) ca vedette sul’isso e quacche pennarulo o telecrunista juventino, addó ca se vedette chiaramente ca Chiellini nchiummato ‘ncopp’â linia ‘e porta..., ‘o teneva ‘nghiuoco a mMarekiaro! E menu male ca nun stette a ssentere a cchi ‘o vuleva cunvincere a annullà pure ‘a rredda ‘e Cagiècònno pe nn’urzo’ecóse (fuorigioco) ‘e quacche centimetro ca ‘mmece nun ce steva comme dimustrajeno ‘e fotocrafie dicenno ca quanno Insigne ‘o lanzaje Cagliecònno steva arreto a Asamoàh e ppo ‘o futtette ‘nvelocità. P’o riesto che ne parlammo a ffà? Carta canusciuta [‘stu vicentino parente lasco d’’e verunese ‘e chella zoccola ‘e Giulietta...] cuncedette ê cammurriste, delinquente juventine ‘e vattere sistematicamente ê cuane senza mettere lengua e pprima ‘e tirà fora ‘nu cartellino jalizzo ce penzaje mez’ora e ppo... nun ‘o tiraje! E nchiudimmola cca ringrazzianno ô Cielo d’esserce levate ‘e pacchere ‘a faccia e , vvisto ca stammo ancóra ‘e casa ê piane avete e ca ‘a cuncurrenza nun s’ è fatta ancòra cchiú sotto, cuntinuammo pe cchesta strata e sperammo ca ‘nfuturo pe nnuje jesse ancòra meglio e nun ce êssem’’a magnà cchiú ‘e mmane p’’e punte perze cu ‘e ppiccerelle o rijalate cca e lla! Bbona salute e - si dDi’ vo’ - ce sentimmo n’ata vota! Staveti be’! R.Bracale Brak