NAPOLI – PALERMO (28.10.2015) 2 A 0 ‘A VEDETTE ACCUSSÍ

NAPOLI – PALERMO (28.10.2015) 2 A 0 ‘A VEDETTE ACCUSSÍ Tutto a pposto, guagliú... tutto a pposto a fora ‘e chell’asciuta a ppaparelle [po ve dico] ‘e Lrenzigno ô mumento ca Sarri, giustamente!, ‘o sostituette. Tutto a pposto! Ajeressera ô san Paolo ‘nnante a ppochi pperzone, ‘o Napule vattette ‘o Palermo, cunfermannose, a vintuno punte ô siconno posto ‘ncrassifica cu Interre e fFiorentina ê spalle d’’a Roma, primma a vintitre. Pirciò ‘a nichemata (vittoria) d’ajeressera fove ‘mpurtante, ‘mpurtante assaje pure si ‘o risultato ‘e doje a zzero fove busciardo, pecché ‘o Napule êsse pututo cunzignà cinche sfugliatelle ê purtualle siciliane, [‘mmece d’’e ddoje ca lle ‘ncartaje senza guantiera] si sulo fósse stato cchiú ffurtunato e nun avesse cuoveto ‘a bbellezza ‘e tre ppale a ppurtiere vattutto. Ma jette accussí e cuntentammoce d’’o doje a zzero firmato Pipita e mMertenso, trasuto ô posto d’ Insigne, ca nun zannaje (gradí) e ascenno sbuttaje ‘mmocca a ‘na telecamera cu ‘nu “Mo me so’ rrutto ‘o casco” ca se fósse mmeretato d’essere miso ‘o puparuolo forte ‘mpont’ô musso! ‘Nzomma fóve ll’unica nota stunata ‘e ‘na bbella serata. Passammo ê ppaggelle: REINA sv Nun fove sfarma (colpa) soja si nun se spurcaje manco ‘e guante e avette farese nutà ‘na sola vota cu ‘na cabbesera (colpo di testa) pe risolvere ‘na jucata sbagliata ‘e Jorginho. HYSAJ 7, Sempe prisente a ll’epata uffenziva i a cchella difenziva, currette cuntinuamente ‘ncopp’â curzia soja comme a ‘nu treno. ALBIOL 6,5 Atalossa (prestazione) suddisfacente d’’o spagnuolo ca mettette ‘a musarola a cchi lle capitaje e ascette palla ô pere. CHIRICHES 6, Pulito e ppriciso s’’a vedette mo cu vVazquez, mo cu gGilardino e nun facette nisciuna fessaria. GHOULAM 6; Sbagliaje cchiú ‘e ‘nu cruzzo (cross), ma participaje a ttutte ll’azzione uffenzive LOPEZ 6- Atalossa (prestazione) ‘e sustanza, senza fessarie; ma ‘e cchiú nun se po’ pretennere; nun ‘o ttene! (Dô 63° ALLAN 7 Tutt’ ata pasta e se vedette!), JORGINHO 6,5 Pure si sempe a ccurto ‘e sciato, jucaje ‘na cifra ‘e pallune pe mMarekiaro, Caglieconno,Insigne i ‘o Pipita. Hamsik 7 Lle mancaje sulo ‘o stuco (gol), ma tutto ‘o riesto ‘o ffacette a cciammiello cupulianno (dialogando) a mmestiere cu Insigne e Caglieconno. CALLEJON 6 Partecipaje a ttutte ll’azzione d’attacco; lle capitajeno ddoje bboni accasione, ma una ‘a perdette e ‘ncopp’â siconna centraje a sSorrentino appustiato sott’ô palo (Dô 76° EL KADDOURI sv), HIGUAIN 9, Fove isso ca cu ‘na cagliosa tremenda ‘a fora sbluccaje ‘o risultato firmanno ‘o primmo stuco (gol); cu n’ata cagliosa ‘a fora cugliette ‘nu palo ca sta tremmanno ancòra e ffacette tante ‘e cchelli bbelli ghiucate ca ‘o pubblico s’alliccaje ‘o musso. Cumplessivamente ‘ncampiunato so’ otto ‘e stuche cu ‘a firma d’’o Pipita. E ringrazzianno ô Cielo joca cu nnuje! INSIGNE 5.5 Facette coccosa, cuglienno pure ‘nu palo, ma fove acqua ca nun levaje sete;puteva fà ‘e cchiú pecché ‘o ttene, ma nn’à dda magnà furne ‘e pane pe ddiventà cchiú ommo, ‘mparannose a rispettà allenatore e ccumpagne! (Dô 65° MERTENS 7 Pigliato ‘o posto d’Insigne se dètte da fà, cuglienno pur’ isso ‘nu palo nfi’ a ttruvà a ll’uttantesimo ‘a squina (angolo) justa p’’o doje a zzereo cunchiusivo ). Allenatore: SARRI 7 Dètte ‘a ‘mpressione ‘e avé amalgamato a mmestiere ‘nu gruppo, apprimma spaisato i ‘a scuatra mo pare ‘nu giuetto (giocattolo) ‘e marca ca nun se po’ rrompere. arbitro GIACOMELLI 5 E nun me spiate ‘o ppecché! E cu chesto ve ringrazzio ‘e ll’attenziona, ve saluto e si dDi’ vo’ ce sentimmo llunnerí ca vène pe cummentà ‘a trasferta chindunosa (pericolosa) d’ ‘e cuane ca vanno a ffà a gGenoa contr’ê grifune. Stàveti bbe’ R.Bracale Brak