NAPOLI – GENK (ciampionsa 10.12.19) 4 a 0 ‘A VEDETTE ACCUSSÍ

NAPOLI – GENK (ciampionsa 10.12.19) 4 a 0

‘A VEDETTE ACCUSSÍ

‘Assa fà ô Cielo guagliú! Finalmente ve pozzo parlà ‘e n’arnassa  (vittoria) d’’o Napule, chella d’ajeressera ô san Paolo contr’a cchilli pezziente ‘e san Gennaro d’’e ggraunare d’’o  Ggenche dint’a ll’urdema jurnata d’’a maràla     (fase) a gghiavalle (gironi) ‘e Ciampionsa e ajeressera ‘e cuane misemo (addirittura) esaggerajeno affuzzanno (vincendo) pe cquatto a zzero cu ‘nu sant’Arcadio ca ‘int’” primme quarantacinche minute facette ‘o cchiú d’’o cchiú e scatenato mettette dinto tre ppalle: ‘a primma[terzo minuto] apprufittanno  ‘e ‘na meza fessaria d’’o purtiere d’’e ggraunare ca sturduto da Ciruzzo se nzallanette e pperdette palla cu sant’Arcadio ca isso cercaje [ vuje vedite che fesso!] ‘e scartà, ‘a siconna [ô 26’] facennose truvà ô mumento justo, ô posto justo pe sfruttà  ‘na granna palla misa ‘mmiezo da Di Lorenzo e  ll'urdema[ô 38’] cu nu ricore ca Peppe ‘a ‘nguenta s’era abbuscato; agghiustaje ‘o piso Ciruzzo a ll’arrancua  (nella ripresa)ô 74’,cu n’atu ricore ca ancòra Peppe ‘a ‘nguenta s’era abbuscato. ‘Nzomma guagliú è overo ca se trattaje ‘e vedersela  cucchilli pezziente ‘e san Gennaro d’’e ggraunare d’’o  Ggenche però turnate ‘ncampo sant’Arcadio i ‘o ‘Ncrifato se vedette n’atu Napule ca jucaje diciso a ffà ‘o spezziale, cumminto d’affuzzà (vincere) e ccunquistà  ll’artamannaje (gli ottavi) di Ciampionsa. Ma ‘o quatto a zzero d’ajeressera nun servette a ssalvà ô Jancone  ca, cumme ggià, se suspettava ne fove cacciato, a ttarda sera, cu ddoje parole asciutte asciutte ‘ncopp’a ll’armuco (sito) d’’a suggità. Ma ‘e chesto ne parlammo doppo. Mo turnammo â mubbara (partita) e ffacimmo ‘e ppaggelle:

 MERET[‘O Lungagnone] 6,5  Nun tenette quase niente ‘a fà, ma se facette truvà pronto chelli ppochi vote ca s’êtt’’a spurcà ‘e guante.

 DI LORENZO 7 Se facette apprezzà facenno annante i arreto ‘ncopp’â ferza ‘e dritta; ‘na perna chella palla ca mettette ‘mmiezo pe ssant’Arcadio ‘nnaccasiona d’’o doje a zzero.

 MANOLAS[Chitelassa] 6  Sulo quacche sfregazzo (sbavatura), senza cunsequenzie,ô niajo(finale) ‘e sibbacco (match) ma p’’o riesto facette bbona guardia lla ddereto.

KOULIBALY[‘O Ggialante] 6,5  Ancòra n’atalossa (prova) sustanziosa; truvaje pure ‘o tiempo ‘e scennere annante.

Mário RUI 6  Facette ‘o ssuĵo scennenno spisso ‘ncopp’â ferza mancina.

 CALLEJÓN[Peppe ‘a ‘nguenta] 6,5  Bbella atalossa (prova) d’’o spagnuolo ca lassaje  campo libbero a Di Lorenzo, jenno a ccupulià (dialogare) ‘int’ô campo mo cu Anema Longa, mo cu Cciruzzo, ma facennose vedé pure dint’âmuntaca (area di rigore) d’’e ggraunare abbuscannose dduje ricure sacrusante.[dô 78’  LOZANO sv  Trasuto a gghiuoche fatte nun suraje ‘a cammisa.]

ALLAN[]’O ‘Ncrifato] 7 – Finalmente turnaje a ffà ‘o cane ‘e presa e ccu isso lla ‘mmiezo ce fove ‘o culaturo (filtro) ca servette a Zzielinski e a ll’Anema Longa pe ffà vedé ‘e cqualità lloro.

 RUIZ[Anema Longa] 6  Accumminciaje cu cquacche sfregazzo (sbavatura) pe ffurtuna senza cosequenzie, ma po venette fora cu gghiucate sustanziose e cchesto va pe cchello.

 ZIELINSKI 6,5  Peccato ca fove poco priciso quanno tiraje ‘mporta, ma ‘ncumpenzo currette assaje mettenno pezza addó fove nicessario. [dô 72’  GAETANO 6 Facette vedé ‘e saperece fà.]

 MERTENS[Ciruzzo] 6,5 Pigliaje p’’o prozo ô purtiere d’’e ggraunare signanno ‘nu ricore sfezziuso cu ‘nu miezu cucchiaro accurcianno ll’armasafeja (distanza) da Marekiaro ‘int’â crassifica ’e ll’arameje d’’a storia d’’o Napule. Cchiú ‘ngenerale fove overo gidaffè (bravo) a ttruvà  ‘a pusizziona justa ‘ncampo arapenno arfadà (spazio) pe sant’Arcadio ca ‘o ringrazziaje facennolo tirà ‘o ricore d’’o quatto a zzero.

 MILIK[Sant’Arcadio] 8,5  Turnato ‘ncampo ce facette alliccà ‘e bbaffe pe cchello ca facette nun suylo signanno tre addaffe (reti) ma jenno sempe ‘mpressione (in pressing) ‘ncuollo a ll’ arcuseme (avversari) e cupulianno (dialogando) a mmestiere cu ‘e cumpagne. [dô 78’  LLORENTE[‘O Spetaccuso] sv Arfaidejo (inutile) tuccaje pochi pallune  e pp’o risto aizaje porvera].

All. Carlo ANCELOTTI 6,5 Affuzzaje (vinse) e avette raggiona,‘ncarraje ‘a fricca  (formazione)e ccentraje ll’artairra (qualificazione), ma chesto nunn’ avastaje pe ffarele magnà ‘o cenone napuliano cu vvermicielle a vvongole,mussillo ‘e bbaccalà, ‘nzalata ‘e rinforzo, capitone, vruoccole ‘e foglia, scioccele,fiche ‘mbuttunate, struffole, toccocò, susamielle e rraffiuole a ccassata.; cumme v’aggiu ditto ne fove cacciato cu ppochi pparole senza manco darelo ‘o tiempo ‘ncampiunato ‘e s’’a vedé ‘ncasa cu ‘o Parma. E nnun sta bbene, nun se fa accussí!

E ffermammoce cca pe ‘na parta cuntente, pe n’ata avveluta. Pacienza: a Nnapule ‘e ccose, ‘e ‘na manera o n’ata, so’ ssempe cumpricate. Jammo annante. Mo p’’o campiunato se joca sapato ‘mmerz’ê sseje e ssi ‘o Cielo ‘o vvo’ ve conto dummeneca ch’è ssuccieso. Staveti bbe’ R.Bracale Brak