BRESCIA-NAPOLI (21.02.20) 1-2 ‘A VEDETTE ACCUSSÍ

BRESCIA-NAPOLI (21.02.20) 1-2

‘A VEDETTE ACCUSSÍ

 Canta Napoli guagliú p’’a siconna arnassa carigginna (vittoria esterna) cunzecutiva d’’o Ciuccio  ca ajeressera jette a Brescia contro a ‘na scuatra scamosa e ccatenacciara [ca jucaje tutt’’a mubbara (partita) cu ddiece perzone arret’â linia d’’a palla],e sse mettette ‘e tre ppunte dint’â sacca affuzzanno (vincendo) p’ uno a ddoje â faccia d’’e duje armujllacche (telecronisti) cestarielle ca ce ‘a faccetteno a pplissé pe nnuvantacinche muinute tirannoce ‘e piere e ffacenno ‘o tifo p’’e rrundinelle! Over’è ca ‘e padrune ‘e casa signajeno pe pprimme ô 26’ cu Chancellor(re) ca, nun cuntrullato dô ‘Ntontero, ‘e capa futtette a Ppastacrisciuta…, ma po a ll’arrancua (ripresa) dint’a nnove minute ‘o Napule avutaje ‘a pizza apprimma [49’] russimanno (pareggiando) cu Llorenzigno ca cunquistaje e  mmettette dinto ‘nu ricore [sacrusanto!] e ppo [53’] affuzzanno cu ‘na perna d’Anemalonga ca cu ‘nu granne tiro a ggiro da fora mettette ‘a palla lla addó ‘o purtiere d’’e lucale nun putette proprio arrivà. ‘Ntribbuna-divano stammo ancòra sbattenno ‘e mmane, alliccannoce ‘e bbaffe! Vuje capite che significa esserse mise a ssunà ‘e castagnelle [36] a ttre ppunte dâ Roma? Po’ ssignificà ca overamente ‘o Ciuccio è asciuto dô nafacco (tunnel) e mmo tutto po’ succerere!

Passammo ê ppaggelle:

 OSPINA[Pastacrisciuta] 6  Ll’addaffa (rete) d’’e lucale nun fove itimma (colpa) soja, ma d’’o ‘Ntontero e pp’’o riesto se trattaje ‘e fa ll’urdinario senza prubbleme.

DI LORENZO 6,5  Primma parte cu ‘a martellina tirata,ma a ll’arrancua  (ripresa) se facette vedé annante. Fove isso a ddà a Anemalonga ‘a palla d’’o doje a uno.  

MANOLAS [Chitelassa] 6 Nisciuno sfregazzo (sbavatura) difenzivo.

 MAKSIMOVIC[‘O ‘Ntontero] 5 Se purtaje ‘ncopp’â cuscienza ll’esserse fatto ancercà (anticipare) da Chancellor(re) ‘nnaccasione ‘e ll’uno a zzero d’’e rrundinelle, cosa ca le costa ‘nu zifo (voto).

MARIO RUI 6,5  A mmancina pe ttutt’’o sibbacco (match) dette   filo ‘a torcere mo a Bbisoli e mmo a  Ssabelli, dimustrannose ‘ncriscenza.

FABIAN RUIZ[Anenalonga ] 7 Nun sempe fove tassuso (veloce)e ppriciso cu ‘e pasiglie (passaggi), ma tutto se facette perdunà ô 53’ cu chella perna soja da fora, ‘nu capo d’opera ca cètte tre ppunte. Applavuse.  

 DEMME 6  Cunfermato ‘ncabbina ‘e riggia facette ‘o spezziale tuccanno a dduvere ‘a palla.[da ll'86' ALLAN s.v.]

ELMAS[‘O Turco] 5,5  Miezu zifo (voto) mancante pecché me parette stracquo e ffacette poco. [dô 75' ZIELINSKI 6  Aiutaje ‘e suoje a ggestiunà  ‘o meizo   (vantaggio) ‘int’ô niajo (nel finale).Ll’êsse fatto trasí primma!]

 POLITANO 5,5  Pure a isso miezu zifo (voto) mancante pecché facette poco, nun se ‘mmentaje niente  e nnun cupuliaje cu ‘e culleche lla ‘nnante. À dda crescere.  

 MERTENS[Ciruzzo] 6,5 ‘Ncapo ‘e trenta siconne se ‘mmentaje ‘nu pallunetto ca però jette a ccogliere ll’afachia (traversa); cchiú ttarde tentaje ‘na magaria cu ‘nu tiro a vvolo, ma centrale doppo ‘nu lanzo ‘e Lorenzigno, da trenta metre. ‘Nzomma p’’o cientovintunesimu stuco (gol) àmm’ancòra aspettà; e cchi nce dice can un  succere marterí cu ‘o Bbarcellona?  [dô 67' MILIK[Sant’Arcadio] 6 Facette ‘o ppussibbile cu quacche bbona palla p’’e carigginne (esterni), turnanno arreto a ddifennere e ppiglià palla,  senza sparagnarse maje. M’addimanno si cu ‘o Bbarça Gattuso lle dà spazzio. Sperammo!]

 INSIGNE[Lorenzigno] 7 – Nun fove ancòra ô ciento pe cciento, ma se dette da fà turnanno arreto pe ddà ‘na mana, se prucuraje ‘o ricore in ‘o signaje cu ccazzimma… po cuntinuaje resistenno nsi’ ô niajo (fine), capitano curaggiuso. 

all.  GATTUSO 6,5 – ‘A cura soja cuntinua a ffunziunà; ll’êsse miso pure sette si s’êsse chiammato ‘mpanca a Ppolitano e nno a Cciruzzo e ssi êsse fatto trasí primma a Zielinski..., ma nun cercammo ‘o pilo ‘int’a ll’uovo!

arb. ORSATO 5,5 Tutto summato facette cchiú o meno ‘o duvere suojo. Nun me piacette ca fove nicessario  ca‘a VARra ‘o chiammasse  pe ffarelo ‘ntennere ca ô 48’ ‘a rundinella êva tuccato ‘a palla cu ‘a mana a vraccio largo e ca era ricore… cosa ca lle costa miezu zifo (voto).

E bbasta accussí. Fermammoce cca, assaje cuntente d’essere finalmente sagliute a 36 punte ‘ncrassifica. Mo si ‘o Cielo ‘o ccunzente ce sentimmo miercurí ca vene pe ccuntarve chello ca succede marterí a ssera ‘nciampionsa contr’ô Barcellona ‘e Messi ca scenne ô san Paolo. ‘Ncopp’â carta ‘o fatto pare scuro, ma ‘o pallone è ttunno!

Staveti bbe’. R.Bracale Brak