NAPOLI-BARCELLONA (25.02.20 CIAMPIONSA) 1 A 1 ‘A VEDETTE ACCUSSÍ

NAPOLI-BARCELLONA (25.02.20 CIAMPIONSA) 1 A 1

‘A VEDETTE ACCUSSÍ

Ve ricurdate guagliú ch’ i’ ve dicette ca ‘o pallone è ttunno e ttutto fósse pututo succerere ajeressera ô san Paolo addó arrivaje ‘o Bbarcellona p’’o sibbacco (match) ‘e Ciampionsa e ‘ncopp’â carta c’êsse avuto ‘a scamazzà? ‘Mmece foveno proprio ‘e catalane ca arresecajeno d’abbuscà e recuglietteno ô 57’ cu Griezmann(e) appena n’ uno a uno pe ‘na negreggenzia (disattenzione) ‘e Mario Rui[ca se facette passà ê spalle da Semedo, mantenuto ‘nghiuco da Di Lorenzo]  e d’’o Ntontero [ca se perdette a Griezmann(e)] . P’’o riesto ‘o Napule facette ‘na bbella mubbara (partita) teschirranno (imbrigliando) ‘o Polece e ccumpagne ca tutto summato ce facetteno ‘o cellechio, nun tirajeno maje ‘mporta e Ppastacrisciuta s’êtt’’a spurcà ‘e guante ‘ncopp’a ‘nu paro d’armunàdere (spioventi) senza pretesa. Asasa (soprattutto) durante ô primmo ajone se vedette tantu Napule e ppocu Barca, ca – dicimmola cumm’è – ce iachibbaje (deluse) ; cumminfatte doppo diece minute  passate a sturià ll’avverzario e a ppiglià ‘e mmesure, ‘o Ciuccio cuncedette ê catalane ‘e zallabbà (palleggiare) senza maje darece penziere e mmarpione, trencato (furbo), ‘nteliggente e ppratteco ‘o mettette sotto â primma accasione ‘ncapo ‘e trenta minute quanno ‘ncopp’a ‘na timidda (ripartenza) ‘mpruvvisa nosta Zielinski da dritta sdradecaje dê piere ‘e ‘nu pierepetterra spagnuolo ‘na palla e ‘a mettette ‘a mettette ‘mmiezo addó Lorenzigno ‘a facette passà favurenno aina a Cciruzzo can un se facette prijà e ccu ‘nu tiro a ggiro ‘a mettette ê spalle d’’o purtiere catalano ca rummanette a gguardà.  A ll’arrancua Messi e ccumpagne turnajeno ‘ncampo cu ‘o sanco a ll’uocchie ‘ntenziunate a nnun abbuscà e gghiucajeno cu asciarra (cattiveria) i a ffà male cu trasute ‘e chelle: “t’aggi’’a scassà tutto chello ca tiene sano…” e ne facette ‘e spese Ciruzzo ca ô 54’ se nn’êtte ‘a turnà ‘mpanca; tre mminute primma però, cumme v’aggiu ditto, p’’e ffessarie ‘e Mario Rui e d’’o ‘Ntontero ‘e catalane êveno russimato (pareggiato) e cchiú ‘e chello nun riuscetteno a ffà. Cunchiusione? Cunchiusione tutto se decide ê diciotto d’’o mese ca trase quanno ‘o Ciuccio va ô Camp-nou. Facimmo corna ‘a mo, ma ‘na cosa s’è ccapita ajeressera: ‘o Napule oramaje ‘e ‘na scuatra ca po’ gghiucà senza ‘mpressiona, contro a cqualuncua scuatra e ttutto po’ succerere!

Passammo ê ppaggelle:

 OSPINA[Pastacrisciuta] 6  Nunn’êtt’’a fà nisciuna parata, nè straurdinarie o cape d’angele e ppure cu ‘e piere s’’a cavaje.

 DI LORENZO 5,5  Ll’aggi’’a mettere miezu zifo (voto mancante pecché  mantenette ‘nghiuco a Semedo, e pp’’o riesto me parette ‘nu poco gnògno (impacciato), però nun mullaje maje.

MAKSIMOVIC 5,5   Pure a isso miezu zifo (voto) mancante pecché ‘nnaccasione d’’o russimmo (pareggio) catalano se perdette a  Ggriezmann(e); p’’o riesto, durante ô primmo ajone (tempo) nun se spaventaje quanno ‘o Police cercaje ‘e trasí dint’â muntaca (area di rigore) nosta. A ll’arrancua quacche vvota jette ‘int’ê chiavette.

 MANOLAS[Chitelassa] 6,5 Mumazzo (ottimo) e ffunnamentale. Se Facette vedé pure annante e ppe ‘nu niente nun signaje ‘o doje a zzero. Peccato!

Mario RUI 5,5  Pure a isso ll’aggi’a merttere miezu zifo (voto) mancante p’’o fatto ca v’aggiu ditto  ma p’’o riesto fove attiento e ccuncentrato jucannosela pe n’ora a pparo cu  Semedo e ccu chillu bbellu mobbile ‘e  Vidal(le) ch’era ‘na carogna quanno jucava cu ‘a vecchia zoccola,e mmo è addivintato  cchiú ccarogna ancòra .

RUIZ (sacrificare) jucaje ‘nu sibbacco (match) diffajo (difensivo) cu quacche tammisso (guizzo) sulo ô primmo ajone (nel primo tempo).

 DEMME 6  Fcette tutto ‘o duvere suĵo  resistenno cu ccegna (grinta) e azzaja (aggressività), secutanno pallune e avverzarie.[dal l'80' ALLAN s.v.]

ZIELINSKI 7 Ll’ommo ‘e cchiú da ll’armidanno  (centrocampo) a gghí annante. Prutacunista d’’a munavara (manovra) cuana (azzurra) ggestiunaje (gestí) cu ttrenca (furbizia) tanti ppalle cumme a cchella a Ciruzzo facette addeventà ll’addaffa (rete) nosta.

 CALLEJON[Peppe ‘a ‘nguenta] 5,5 Me dispiace ca ll’aggi’’a levà miezu zifo (voto) pecché sí pe ffà ‘na bbella mubbara (partita) ‘a facette magnannose ‘a ferza ‘e dritta e  ajutanno ‘a squadra a ll’epata diffaja (in fase difensiva), ma nujn lle pozzo perdunà d’avé falluto ‘o doje a uno quanno Sant’Arcadio ‘o mettette a ttu ppe ttu cu Tter Stegen(ne) e issi le tiraje ‘a palla ‘ncuollo ‘mmece ‘e fravecarla ‘mporta! [dô 74'  POLITANO s.v.]

 MERTENS[Ciruzzo] 7  Facette chello ch’êv’’a fa: signà; ‘mpratteca avette unu pallone a ddispusuizzione i’o mettette a ffrutto, purtannoce annante e angappanno a Mmarekiaro! Applavuso. Peccato ca po ‘o struppiajeno e avette turnà ‘mpancaSperammo ca se repiglia ggià pe ssapato! [dô 54' MILIK[Sant’Arcadio] 6  Trasette pe mantené auta ‘a palla e cchello facette cumbattenno cumme a ‘nu lione; dètte ‘a Ppeppe ‘a ‘nguenta ‘na palla da mettere ‘mporta  i ‘o spagnuolo se ‘ntalliaje i ‘a sciupaje. Che peccato!]

 INSIGNE[Lorenzigno] 6,5  Ll’êsse miso miezu zifo (voto) ‘e cchiú si êsse miso pe ‘nu cumpagno chella palla ca ‘mmece sciupaje cunzignannola a Tter Stegen(ne).P’’o riesto capitano istadaddo (volenteroso) cupuliaje (dialogò) con i compagni ajutannole addó nicessario.

all.  GATTUSO 6   Presentaje ‘a scuatra justa e ttutta cegna (grinta),andivinaje ‘a mossa ‘e lassà ll’artabbo (pallino) d’’o juoco ‘mmano ô Bbarcellona pe ddarrabbarlo (colpirlo) cu cquacche timidda (ripartenza) cumme succedette; nun fove itimma (colpa) soja si Peppe ‘a ‘nguenta e Llorenzigno se facetteno parà palle da sfruttà meglio, né si Chitelassa fove jellato e mancaje ‘e ‘nu niente ‘o doje a zzero. Tutto summato ce fossemo mmeretate cchiú ‘e ll’uno a uno. 

arb: BRYCH 5,5 Facette  quase tutto ‘o duvere suĵo, ma êsse avut’ ‘a  essere cchiú arscididdo  (severo) cu ‘e catalane ca spisso foveno assaje caríse (fallosi) cu ttrasute  arcatelle (assassine)!

E fermammoce cca cuntente, ma nun suddisdfatte d’’o russimmo (pareggio) d’ajeressera e mmo si ‘o cielo ‘o vvo’ ce sentimmo dummeneca ca vene pe ccuntareve chello ca sapato a ssera succere ô san Paolo addó, p’’o campiunato, scenne ‘o Torino ‘e Mazzarri i a nnuje nce serveno ‘e tre ppunte! Staveti bbe’. R.Bracale Brak