CESENA - NAPOLI 10/09/11 (1 A 3) LL’AGGIU VISTA ACCUSSÍ

CESENA NAPOLI 10/09/11 (1 A 3)
LL’AGGIU VISTA ACCUSSÍ
Finalmente doppo tanti mise ‘e privazzione sapato a ssera âmmo accumminciato ll’avventura ‘e ‘stu campiunato ca nun sapimmo addó e quanto ce po’ purtà luntano..., ma i’ tengo bboni speranze! Overo ca a Cesena ‘e guagliune napulitane nun tenevano ‘ncuollo ‘a maglia luvarda, ma chella jalizza-canario forze pecché ll’arbitro Bergonzi se ll’era miso isso ‘na maglia luvarda. Comunque jalizza o nun ghializza ‘a maglia purtaje bbuono e me jette a ccuccà (futtennome d’ ‘o diabbete) cu ‘o core dint’ê zzuccaro pecché ‘e guagliune nuoste ce facettero ‘o prisente (il regalo) ‘e ‘na vittoria politelica (preziosa),
‘na vittoria carreca ‘e significazzione (di significato), ‘na vittoria ca ce ‘mmita a penzà pusitivo e ce dà tanta cunfianza (fiducia)!!! Vittoria sufferta forze cchiú d’ ‘o nicessario, ma pure ‘sta sufferenza puteva starce ‘ncalannario visto ca jí a Ccesena nun era farse ‘na passiata ‘e salute. Comme jette e ccomme venette, o’ ‘mpurtante è ca arrivaje ‘a prima vittoria luvarda ‘e ‘stu campiunato doppo d’ avé fatto ‘o cuollo luongo cu semmane e semmane ‘e privazzione e de ‘spera (di attesa). E nun efuje facile tenenno presente ‘a velocità d’ ‘o Cesena, ‘a difficultà ‘e cunfermarse e ll'emozzione ‘e accummincià n’ata vota. Vittoria sufferta sí, ma vencere accussí è ccomme farse ‘na serenga ‘e cunfianza (fiducia); se pruvaje ‘e tutto: ‘o speggismo (l’illusione) ‘e vencere facilmente (essenno passate ‘nvantaggio doppo sule tre mminute...), ‘arraggia ‘e sufferí (subire) ‘o pareggio... ‘a sufferenza, ll’apprenzione (la tensione), ‘a cuntentezza ‘e passà n’ata vota ‘nvantaggio e ‘a guzzata (la goduria) finale ...Nun se po’ che ddicere “Grazzie guagliú, grazzie Napule”! E che suddisfazzione vedé e sèntere tutte chilli napulitane cantà pe nuvanta minute senza fermarse...Cosa ‘a fà azzellí ‘e ccarne! Certo stammo sulo ô pprincipio e s’à dda faticà pe ccassà cierti marrune (errori) ‘e quaccuno e cchelle d’ ‘o juoco cullettivo....E sperammo ca Erode Mazzarri facesse ampressa a ffà chello ca à dda fà!
Tirammo ‘a somma e ppassammo ê ppaggelle:
DE SANCTIS 6 - Poco ‘mpignato pe tutta ‘a partita;ce mettette ‘e punie pe ffermà ‘nu tiro ‘e Candreva ô 45° ‘ncopp’ a ll’uno a uno.S’ à dda levà però chillu vizzio ‘e cessà arreto, ‘mmece ‘e ascí ‘ncopp’ê cornerre! P’ ‘o riesto urdinaria amministrazzione. ‘Ncopp’â redda nun tenette particulari respunzabbilità.
CAMPAGNARO 8 – Paricchi se mettettero paura doppo d’ ‘o guajo ca ll’êvano visto prutagunista, ca ce fossero state ripercussione ‘ncopp’ ô juoco ‘e ‘stu granne e prestazionali fforte difenzore argentino. E ‘mmece asciutto e ttirato a lucido Hugot urnaje a essere ‘o toro ca sapimmo... Difennette cu ccegna (con vigore), ma soprattutto pesaje ‘ncopp’â vittoria cu n’eccezziunale rimessa laterale ca prupizziaje ‘a signatura d’ ‘o Pocho Lavezzi. Po se facette truvàô posto justo ‘ncopp’ â sustentazziona (appoggio) ‘e Marekiaro e signaje ‘a redda (la rete) d’ ‘o doje a uno! ‘Nu toro accussí ce serve comme ô ppane, e si chesta fuje ‘a primma reazione soja ‘ncopp’ô campo,putimmo essere certe ca Hugo nun ce dà nisciunu prubblema!

CANNAVARO 4,5 –Nun ce fuje male fino a cche se trattaje ‘e cumbattere a ttu pe ttu cu Mutu; ma p’ ‘o riesto fuje ‘o solito si’ nisciuno e dint’ a ll’area luvarda, durmette cu ‘a zizza mmocca, tanto è vvero ca â primma accasione se facette appiccià (bruciare) dâ sciuliata (dalla scivolata) ‘e Guana ca facette uno a uno; pe nun parlà d’ ‘e troppe sustentazzione (appoggi) sballate e d’ ‘e bbonde (lanci) a la sanfrasòn (senza misura).P’ antico vizzio jette a ddà ‘mpiccio annante, ma aizaje póvera e nun fuje capace ‘e signà e Candreva putette salvà ‘ncopp’â linia ‘na capata soja senza forza. No,no nun po’ proprio uffrí cunfianza (fiducia) uno comme a isso ca cuntinuaje e cuntinua a gguardà cchiú ‘a palla ca ll'ommo! ‘Nzomma fuje ‘a testimonianza ca se tratta ‘e ‘nu jucatore ca nun ‘o ttène o è fora cundizzione e ca Erode Mazzarri facesse meglio a farlo stà ‘mpanca!

ARONICA 5,5 - Sufferette ‘a velocità ‘e Ederro e s’êtte fà ajutà ‘a Dossena.’Na partita sempe ‘nsufferenza.Cumplessivamente però meglio ‘e comme me fósse aspettato...nun facette grossi puttanate!

DOSSENA 6,5 - Apàteco (abulico) durante ô primmo tempo, jette assaje meglio durante ô siconno Se facette apprezzà assaje ‘ncopp’â mancina jucanno ‘na partita ‘e carattere:dê piede suoje ‘e bbonde (lanci) cchiú azzeccate e perigliuse(insidiosi). Dètte pure ‘na mana a Totò Aronica ‘nfase difenziva.
INLER 7 – Nun ce vo’ ‘a zingara p’ ‘o ‘ndivinà:chisto è uno ca sape jucà a ppallone! Ce mettette ‘nu poco ‘e tiempo primma ‘e trasí ‘mpartita, ma ‘a perzunalità e ‘o‘ngegno dispiggiato (l'indubbio talento) ‘e stu jucatore venettero fora quanno pigliaje ‘mmano ‘a bbacchetta d’ ‘o direttore d’urchestra e se facette sèntere cu pricise e sistimate passagge luonghe bbuone pe Maggio e Dossena.Me fósse piaciuto vederlo cchiú assaje tentà quacche tiro ‘a luntano, ma ne facette uno sulo e ‘o mannaje fora!
DZEMAILI 6. – Pur’isso nun partette subbeto, ma po dimustraje d’essere‘nu granne cumbattente! Chillo ca ce vo’ lla mmiezo!Resta ‘a chiarí ll’esatta pusizzione ‘ncampo. MAGGIO 6-. ‘Nu treno frenètico (inarrestabile), ma se magnaje ‘a redda d’ ‘o doje a zzero e nun ce ‘o pozzo perdunà! È overo ca dètte ‘na mano a Campagnaro, ma ‘nnante â porta nun se po’ sbaglià!
LAVEZZI 7-. – Sempe ggenio e desarreglia (sregolatezza), Disgarrado (furbo) e ‘ntelliggente partette forte lanzanno ‘o Napule verzo â vittoria! Faticaje assaje p’ ‘a squatra.. Priparazzione cratista(ottima) penzanno ô City. Se magnaje ‘na redda retumbante (clamorosa) a dduje passe dâ porta. E nun ce ‘o pperdono! Ma d’ ‘o Pocho nun se ne po’ ffà a mmeno.
SANTANA 5 +. – Assaje cumbattivo, ma ‘ncuncrudente, aizaje póvera pe tutt’ ‘o tiempo ca stette ‘ncampo: unu tiro facette e ‘o mannaje fora!
HAMSIK 7 – ‘Nu campione ‘e perzunalità e ‘ntelliggenza Trasette ll’urdema mez’ora ‘ncampo addivintanno subbéto prutagunista cagnanno cumpletamente ‘a faccia d’ ‘a partita;bastaje mez’ora pe fà vedé chi è cu ‘na granna sustentazziona pe Campagnaro p’ ‘a redda d’ ‘o doje a uno e signanno isso stesso ‘a redda ca ‘nchiudette ‘a partita ‘ncopp’ô tre a uno! Mazzarri, forze penzanno ca ‘o guaglione êva ggià jucato cu ‘a nazziunala soja, s’ ‘o sparagnaje ô pprincipio p’ ‘a partita ‘e miercurí ca vène a Manchester.
CAVANI 5,5 – Meno lucente (brillante) d’ ‘o ssolito, ma sempe prisente, dètte sempe ll’impressione ‘e stà ancòra agghiustannose (in rodaggio) ìNzomma nun fuje ‘na granna primma asciuta (debutto). ‘E cumpagne nun ‘o cercajeno e isso nun s’ ‘a jette a chiajetà; me parette troppo sotto piso, tanto ca tiraje solo ddoje vote ‘mporta ma ‘o ffacette senza ‘a forza nicessaria.Ô siconno tiro loffio dicette a ll’amico mio: “Neh, Federí... ma chisto ‘e ffà magnà a ‘sti guagliune?”
PANDEV 5,5. – Trasette ô posto ‘e Aronica per sustené l’uffenziva luvarda contro a ‘nu Cesena ‘ndieci. Primma asciuta decurosa (debutto discreto), ma se magnaje ‘na redda a pporta vacante centranno ‘a mandrilla (traversa). Peccato!
FERNANDEZ s.v. – Trasette ô posto ‘e Lavezzi all’urdimi minute justo pe ffà atto ‘e presenza.
MAZZARRI 7 – Pilutaje a dduvere e a mmestiere ‘o Napule quanno ‘o Cesena rummanette ‘ndieci, chiammannose ‘mpanca a Totò Aronica e ‘mplantanno (schierando) addirittura quatto attaccante (Pandev, Cavani, Hamsik, Lavezzi).
Cuncludenno,chella cu ‘o Cesena è stata ‘na vittoria ‘mpurtante assaje e mméresita (meritata). ‘A jurnata s’è cumpletata a cciammiello cu ‘o pareggio d’ ‘o Milanno e cu ‘e panesiglie ca s’ànnu pigliato Roma e Interre. Ll’unica cosa ca mm’è rummasa ‘ncopp’â vocca d’ ‘o vernecale (stomaco) è ‘a vittoria d’ ‘a Rubbentussa ca dint’ô cesso nuovo à fatto unu muorzo d’ ‘o Parma... e ‘sta cosa a mme me puzza e nun m’ ‘a contano justa e si fósse ll’Ufficio ‘Nchieste d’ ‘a Federcalcio jesse a mmetterce ‘nu poco ‘o naso pe vedé si ‘a sotto nun ce stesse quacche papucchiella o quacche zzella visto ca ‘e ducale ‘mmece d’ ‘a cuntrastà lle dettero ‘na mana a chella allurdata squatra janca e nnera. E i’ tre nnummere nun andivino!
Ce sentimmo. Staveti bbe’!
R.Bracale Brak