PALERMO – NAPOLI (14/02/15) 3 A 1 ‘A VEDETTE ACCUSSí

PALERMO – NAPOLI (14/02/15) 3 A 1 ‘A VEDETTE ACCUSSí E cche saciccio, guagliú! N’ ata fijura ‘e tre sorde! Anze ‘a peggia da quanno accumminciaje ‘o campiunato, addirittura cchiú ppeggia ‘e chella fatta a mMilano contr’ô Milanno! V’ ‘o stongo cuntanno, ma ancòra nun ce crero ca ajeressera ‘o Napule ce mettette ‘o scuorno ‘nfaccia a nnujaute tifuse sbaglianno tutto cosa, nun riuscenno maje a mmettere paura ô Palermo, cu ‘na tràsera [‘a nosta] ca abballaje malamente accumincianno dô purtiere, ‘nu centrocampo ca facette ridere ‘e pulle braduso (lento) senza idee e casinista e cu n’attacco ca giraje a vvacante,n’attacco addó ‘o Pipita fove lassato sulo e scunzulato a vvederesela cu ttutte quante, arbitro cumpreso. E cche saciccio, guagliú! I’ ancòra nun ce crero ca ajeressera don Rafele sbagliaje furmazziona, tenenno ancòra ‘mpanca a Kulibbalì e a gGargano ca pe mme êsse avut’ ‘a jucà ô posto ‘e ll’inutile Giorgigno visto ajeressera; penzate ca cumplessivamente ‘o Napule ajeressera centraje sulo ddoje vote ‘o specchio d’ ‘a porta ‘e Sorrentino: ‘na vota cu ‘o Pipita e ‘o tiro fove parato e ppo cu ‘o tacco ‘e Gabbiadini e ffove ‘o stuco (gol) d’’a bbannera, ‘nu bbabbà ca nun riuscette però a rrennere meno amare ‘e ttre ppanelle cu ‘a meuza ca ‘o Palermo ce aveva dato. Passammo ê ppaggelle: RAFAEL 3,5 Nun me parette ca stesse dicenno ‘o rusario... o ‘e lletanie d’’e sante; chi sa’ a cche steva penzanno, cert’è ca s’addurmette cu ‘a zizza ‘mmocca ‘ncopp’â cunchiusione ‘e Lazaarra ca ‘o futtette ‘a quase quaranta metre cu ‘nu tiro senza pretese; e ddicere ca ‘o prevetariello avesse avuto tutt’ ‘o tiempo ‘e fà ‘na telefonata, pigliarese ‘nu café fumarse ‘nu paro ‘e sigarette e ppo decidere comme êsse avuto piazzarese pe parà ‘o tiro; mmece facette ‘na papera esaggerata e sse facette ‘nfilà dô pallone e mmettette ‘ncrisi ‘a tràsera(difesa) e ‘nsagliuta tutt’ ‘o fullè (match) doppo appena quinnece minute da che era accumminciata. Pure ô 35°’ncopp’ ô stuco (gol) ‘e Vazquezzo êsse pututo tentà coccosa... e nun ‘o ffacette! MAGGIO 5 – Lazaarro vincette ‘a brica (il duello) ‘ncopp’â fascia ‘e dritta stuppanno tutte chilli pochi pruggette ‘e ll’ecchese treno cuano (azzurro) ca oramaje è ‘nu papunciello. ALBIOL 5 Serata no d’’o spagnuolo; forze fove preoccupato pe bbia cumpagno ‘mporta, cert’è ca facette cchiú ‘e ‘nu sfregazzo (sbavatura) e nnun dètte sicurezza manco a ll’ate. ‘BRITOS 5 Manco isso dètte sicurezza ê suoje: sufferette a dDybala quanno ll'argentino ‘o sfitaje a tte ppe ttu e nnun ascette a ttiempo ‘ncuollo a Vazquezzo ‘nnaccasiona d’ ‘o stuco (gol) d’’o trecquartista d’ ‘o Palermo. STRINIC 5,5 Partette bbuono a ll’epata ‘e ‘mpurramiento (fase di spinta),ma fove poco cuncentrato a ll’epata ‘e trancàra (difesa), facennose spisso surprennere ê spalle dê centrocampisti rosa e nniro. JORGINHO 4,5 Ajeressera fove uno d’’e pegge,risultanno ‘na vera delusione; don Rafele ll’êva miso speranno d’avé cchiú fosforo lla ‘mmiezo, ma ‘o brasiliano facette acqua â pippa sia a ll’epata ‘e custruzziona (fase propositiva) sia a cchella d’’o ricupero ‘e pallone. D.LOPEZ 5 Accuminciaje a ccapa sotta, ma po se perdette p’’a via venenno meno ‘int’ê ccuseture e nun riuscenno a ffà da culaturo (filtro) a ccentrocampo. (Dô 69° GARGANO 6 – Trasette a ccose cumprumesse, ma se dètte da fà. Ah, si don Rafele ll’êsse fatto jucà dô primmo minuto ô posto ‘e gGiorgigno, forze se ne fósse ggiuvato pure ‘o cumpagno ‘e sezziona!) CALLEJON 5 – Turnato titulare ‘o spagnuolo nun riuscette a ddà ‘nu cuntribbuto serio â causa cuana (azzurra) cuntrullato comme fove a mmestiere da Lazaarra ca se levaje pure ‘o sfizzio ‘e signà! HAMSIK 5,5 – Uno d’’e meno scadente dimustraje cegna (piglio) e ggenio ‘e fà jucanno ‘na cifra ‘e pallune pure si cu pocu zuco. (Dô 54° GABBIADINI 6 – S’ anventaje ‘o stuco (rete) d’’a bbannera facennose truvà ô posto justo, ô mumento justo.) DE GUZMAN 4,5 N’ato ca lassaje a ddesiderà; aizaje pórvera pe tutt’ ‘o fullè (match) nun riuscenne maje a ffà aumentà ‘o tunfallo (ritmo) d’’a manovra ‘e chispanno (d’attacco), nè a ddà ‘na mana ô centrocampo! HIGUAIN 5,5 Lassato sulo e scunsulato dê cumpagne, berzagliato ‘a ll’avverzarie e ‘a ll’arbitro, ‘o Pipita fove comme a ‘nu lione dint’a ‘na marza (gabbia da zoo), abbeluto dâ puchezza d’’a manovra ‘e chispanno (d’attacco) d’’e suoje e dâ parata ‘e Sorrentino ca lle levaje ‘o sfizzio ‘e vedé ‘nu granne pallone suojo trasí dint’â rezza palermitana. Mazzoleni, ca se ll’era miso ‘ncapo e s’’o ppurtaje â casa, ‘o custringette â prutesta pe cunzignarle ‘nu cartellino jalizzo (giallo) cosa ca servette a llevà ‘a miezo ll’argentino p’’o prossimo fullé (match). (Dô 73' ZAPATA s.v. Cercaje súbbeto ‘a porta e ppruvaje a ddà ‘mpiccio â tràsera (difesa) d’’o Palermo). Allenatore BENITEZ 4.5 Me dispiace d’’o ddicere, ma ‘e fatte stanno accussí;pure don Rafele po’ sbaglià e ajeressera sbagliaje, mettenno ‘ncampo ‘na furmazziona scazzonta (zoppicante) arreto e a ccentrocampo; ll’uoglio ‘a copp’ô peretto po ce ‘o mmettetteno ‘o purtiere Rafiluccio cu cchella papera esaggerata e mMazzoleni ca, mo ve dico, ajutaje p’’a scesa ‘a scuatra cuana (azzurra). Arbitro MAZZOLENI 4,5 ‘A morta civile! Ma me ll’aspettavo e nun me deludette:mannato pe spezzà ‘e passe ô Napule facette tutto chello ch’êv’ ‘a fà caputianno ‘e falte (falli) soprattutto chille ‘ncuoll’ ô Pipita nfi’ a ffarlo ‘ncazzà pe farlo prutestà e ammunní, comme aggiu ditto, fermànnolo p’’o prossimo fullé (match). Ma ‘a cerasella ‘ncopp’â pizza doce ‘a mettette a ll’urdemo quanno, a nnove minute dô sisco finale, ‘ncopp’ô tre a uno nun assignaje ‘nu ricore p’ ‘o Napule ô mumento ca ‘ncopp’a ‘nu tiro ‘e Cagliecònno, Andelkoviccio vuluntariamente mantenette ‘o vraccio ‘e mancina largo pe ffà sí ca ‘o pallone nun arrivasse dê pparte ‘e Sorrentino. E ffermammoce cca. A ‘stu punto cu ‘a Fiorentina ca ce s’è accustata e cu ‘a Roma ca quase certamente ogge fa unu muorzo d’’o Parma, i’ veco ‘mpericulo pure ‘o terzo posto e ssempe cchiú lluntano ‘o siconno. Sperammo ca me sbaglio! E cu cchesto ve saluto e si ‘o Signore ‘o vvo’ ce sentimmo â prossima vota, ca êsse ‘a essere doppo d’’o fullè d’E.L. Staveti bbe’! R.Bracale Brak