PORTO – NAPOLI (8.08.15) 0 A 0 ‘A VEDETTE ACCUSSÍ

PORTO – NAPOLI (8.08.15) 0 A 0 ‘A VEDETTE ACCUSSÍ Tutto summato, guagliú, ‘o pareggio d’ajere ssera a Oporto fove meglio ‘e ‘nu caucio dint’ê rine o ‘e ‘nu punio ‘mmocca e ddicimmo ca ‘o Napule ajere facette ‘na bbona fijura..., ma sinamparco (comunque) nun è ca so’ assaje cuntento soprattutto pecché – senza arrubbà niente - s’êsse pututo vencere, ma nun se vincette e cchesto nun me piacette. Contr’ô Nizza se vedette ll’attacco, ma po se perdette; ajere ‘mmece se vedette ‘a difesa cunvincente cu Chirichesso ca fove una d’’e nnote cchiú ppusitive d’’a serata e se facette apprezzà nun perdenno maje ‘a tramuntana e rusultanno tassuso (veloce) cu ttutt’ ‘a stazza soja e guvernanno a mmestiere pure ‘e ppalle aute. ‘E nnote stunate venetteno a ll’epata d’attacco (in fase d’attacco) quanno ‘e nuoste sciupajeno cchiú ‘e n’accasione soprattutto cu Mmaggio, ccu Allanno e ccu Insigne mentre Gabbiadini e Mertenso facetteno assaje poco dint’ â camma (l’area) purtuchesa, nè jette meglio cu ‘o Pipita e Caglièconno. ‘Nzomma c’êttem’ ‘accuntentà ‘e ‘nu zzero a zzero addó s’êsse pututo pure vencere.E ppe gghí ‘nnante s’à dda vencere! Passammo ê ppaggelle: REINA 6: Nun se spurcaje ‘e guante ‘a fora ‘e quacche ttiro loffio ca nun lle dette penziere; ‘ncumpenso se sentetteno ll’allucche suoje pe ddà ‘ncapo ê suoje. (Dô 77° RAFAEL s.v.: Nun tenette che ffà.) MAGGIO 4 : Ll’êsse vattuto! Certo fove cchiú attiento ‘ncupertura, ma ô ssolito sprecaje ‘na cifra ‘e cruzze (cross) e nun lle pozzo perdunà d’avé mannato ‘mparaviso ‘mmece ‘e fravecarla ‘mporta ‘na bbona palla ‘mmitante (Dô 77° GHOULAM 5.5: Ô ssolito cocche disattenziona ‘e troppo ‘ncupertura. CHIRICHES 7 : Surprennente p’’o passo tassuso (rapido), cu ttutt’ ‘a stazza soja; attiento a mmantené ‘a pusizziona e ‘ncopp’ê ppalle aute, nzerraje ‘e spazzie, risultanno listo (vigile) ‘ncoppo a ll’ úrze ‘e cóse (i fuorigioco). ALBIOL 6,5: Forze è ampressa p’ ‘o ddicere, ma avette ‘a ‘mpressione ca se truvasse a mmestiere cu ‘o Vampiro vicino:marcaje a Aboubakarro cu fforza e ddicisione e ssempe senza perdere ‘a pusizziona. P’’o riesto diriggette ‘o traffico e ffacette saglí ‘e suoje.(Dô 71° KOULIBALY s.v. HYSAJ 6: Tenace ma ‘nu poco amarco (acerbo);ancòra ‘na vota Sarri ‘o mettette a mmancina, cosa ca lle prucuraje quacche pprano (errore) p’essere custretto a ttirà cu ‘o pere ‘e dritta, ma ‘ncumpenso fove ebberguso (efficace) ‘ncupertura pure cu ‘e ttriste! Allan 6 : Assicuraje ‘na sustanziale bbanna (interdizione), alternanno mumente bbuone e poco bbuone, ma dètte a vvedé ‘e stà criscenno; dopo pochi minute cu ‘nu cuntrasto tuosto mettette fora causa ô fantasista Brahimí.Primma d’ascí dô campo mannaje ‘mporta a mMaggio e sciupaje ‘na bbona accasione, (Dô 77° INLER 5.5: Forze se trattaje ‘e ll’urdema asciuta cu ‘a maglia napulitana, ma ‘a cunchiudette cu ‘nu cuntrollo assurdo e ‘na mancata chiusura. E cche saciccio! VALDIFIORI 6 : Pe vinte minuti êtte ‘a mettere ‘na pezza ô straputere fisico ‘e Imbula senza puté urtizzà (verticalizzare) comme êsse vuluto, ma quanno ‘o pputette fà, futizzaje (illuminò) ll’artigliere (attaccanti) dimustranno sinamparco (comunque) perzunalità a ppietto ‘e jucature tecnicamente dutate .Ascette ô 58°, ma a mme me fósse piaciuto vederlo ‘ncampo cu ‘o Pipita, cosa ca nfi’ a mmo nun è ssucciesa ancòra. (Dô 58° JORGINHO 5,5: Ce mettette ‘a bbona vuluntà, ma nun avastaje e urtizzaje (verticalizzò) senza zuco e ssenza risultate cuncrete.) HAMSIK 5: Sia quanno partecipaje a ll’epata uffenziva (alla fase offensiva), sia quanno se spustaje ‘ncupertura mancaje ‘e sustanza, nun epigrafaje (non incise) e ‘a scuatra ne risentette . (Dô 45° LOPEZ 5,5: Se facette apprezzà dint’ê cuntraste ricuperanno ‘na cifra ‘e pallune, ma purtroppo chiste pariggiajeno chille perdute a ll’epata ‘e plantamiento (fase di impostazione).) INSIGNE 5 : Chiuso dint’â morza d’’o straputere fisico d’’e purtuchese, sprecaje ‘e ppochi accasione avute dô Napule;nun riuscette a avasciarese pe se fà dà ‘a palla e risultaje assaje poco presente dint’ô juoco. (Dô 72° EL KADDOURI 5.5: Agruppino (vivace) sí lla ‘nnante,ma quanta poca pricisione sotto porta! GABBIADINI 5,5 : Pavaje pe ttutte.’A tràsera (difesa) nun se facette surprennere, ‘o centrocampo facette trancara (barriera) ma nun custruette e venetteno meno ‘e rifurnimente lla ‘nnante e isso, spalle â porta cercaje ‘e crià spazzio p’’e ‘nzerzione (inserimenti) ca nun arrivajeno. (Dô 58° HIGUAIN 6: Spalla teleiosa (ideale) ‘e Caglièconno, se muvette – comme ô ssolito - ‘nfra ‘e duje centrale avverzarie,spaventannole, ma nun truvanno maje ‘o parpadío (guizzo) justo. Me fósse piaciuto vederlo ‘ncampo cu Valdifiori,ca forze ll’êsse servuto meglio. MERTENS 5,5 : Riuscette a sse ‘nfilà dint’â trasera ‘na grama vota crianno ll'unica accasione d’’o primmo ajone (tempo),sprecata da Insigne.Êsse avuto fà ‘e cchiú. (Dô 45° CALLEJON 6: Pruvaje a cupulià (dialogare) cu Gabbiadini ma lle riuscette meglio, ovviamente, cu ‘o Pipita.) All. Sarri 6 : Scuatra ‘nu poco crisciuta p’’a cundizziona comme se vedette a ll’arrancua (ripresa);.nun rinunziaje â trasera auta(difesa alta) e â scuatra corta. ‘A nuvità fove ‘o quartetto arretrato ca facette ‘o duvere suojo senza sfregazze (sbavature) e mantenette ‘a porta acrata (inviolata).Da migliurà ‘a custruzzione d’’o juoco pe ccrià quacche accasione ‘e cchiú. E cu cchesto ve saluto e vve dongo appuntamento, si dDi’ vo’ â prossima vota ca mo comme a mmo nun saccio quann’è. Staveti bbe’. R.Bracale Brak