VERONA -NAPOLI (22/11/15) 0 A 2 ‘A VEDETTE ACCUSSÍ

VERONA -NAPOLI (22/11/15) 0 A 2 ‘A VEDETTE ACCUSSÍ Che bella jurnata, guagliú chella d’ajere! E ce ne stesseno tant’ate, ce ne stesseno!Nichemata (vittoria) ‘mpurtante assaje chella d’ajere a ll’ora ‘e ll’apritivo (aperitivo), ‘ncasa ‘e chella zoccola ‘e giulietta e de chillu nnacchennella ‘e romeo ajere cu cchella faccia ‘e cestunia ‘e Mandorlini! Nichemata (vittoria) ‘mpurtante nun sulo pecché se vincette n’ antraffa(partita) ‘ncopp’â carta difficultosa [‘ncopp’a ‘nu campo fetente addó manco ‘a Marsigliese riuscette a ffermà ‘e core chiudàise(beceri) d’’e pariente ‘e giulietta contr’ê napulitane ], nun cuncedenno niente a cchilli quatto profuche d’’e verunese, ma pure pecché,ripiglianno ‘o trascurzo [diacupato (interrotto) p’’a sosta d’’a nazziunale] e nnacusicanno (proseguendo) ll'apistèuta (incredibile) striscia ‘e risultate pusitive,‘o Napule cu vintotto punte se piazzaje ‘ncimma â crassifica [‘ncumprupità cu ‘a Fiorentina ca adderezzaje ‘ncopp’ô doje a ddoje n’antraffa(partita) ca steva perdenno cu ll’Empoli, allimmeno nfi’ a ajeressera quanno ll’Interre,ca dummeneca ca vene à dda scennere ô san Paolo..., facette ‘o vallo ‘ncopp’â mmunnezza cu ‘o Frosinone e vvincenno pe quatto a zzero se piazzaje essa ‘ncimma â crassifica lassannoce ‘o siconno posto]. Che sfizzio jí a vVerona e vvencere cu ‘nu stuco ‘e Lorenzigno[67°] e n’ato d’’o Pipita [74°] dànno spettaculo e facenno addecrià ê spettatore ‘ntribbuna divano e a cchille pochi napulitane d’’o Bentegodi cu ttutto ca ‘o Napule nun sulo êtt’’a jucà contro a cchilli chianchiere d’’e verunese, [scise ‘ncampo cu ‘o pruposito fermo ‘e caucià sistematicamente ê cuane], ma pure a cchella fetenzia ‘nternazziunala ‘e Damato [4]ca nun vedette e nnun vulette vedé tutt’’e ffetenzie d’’e verunese,caputiaje ògne fóto (fallo) siscanno pe ppartito pigliato contr’ê nuoste e addirittura nutitianno (ammonendo) a Allanno ca se ‘mparuliaje cu ‘nu figlio ‘e coperativa verunese ca ll’êva cauciato.Ma ll’arbitro s’êtte ‘a fà dint’ô prozo isso i ‘o ddio suĵo, pecché ‘o Napule vincette ô stesso â faccia ‘e chi ce vo’ male! Passammo “ ppaggelle: REINA 6 Sicuro e ddiciso,nun sbagliaje praticamente niente trasmettenno tranquillità a ttutta ‘a scuatra. HYSAJ 6 Appressuraje (spinse) poco,ascette a cchi sî ttu e cchi songo i’ cu pPisano,abbuscannose ‘nu cartellino jalizzo (giallo) inutile e ca nun se mmeretava. Cumplessivamente atalossa (prestazione) meno ‘mpurtante d’ati vvote. ALBIOL6,5 Atalossa(prestazione) ‘e sustanza nun sbaglianno niente pure si se ll’êtt’’a vedé cu cchillu figlio ‘e coperativa ‘e Pazzini ca nun ghiucaje a ppallone, ma a ccauce, muorze, pizzeche, sbuttulune e fecuzzune. Bravo dint’ê briche aute (nei duelli aerei),e utile a ll’epata ‘e plantamiento (in fase di impostazione). CHIRICHES 7 Jucaje ô posto ‘e Koulibalý squalificato e nnisciuno s’accurgette ca ‘o francese nun ce steva;priciso e ppuntuale fove ‘a surpresa d’’a jurnata. GHOULAM 6 Ê vvote scuurdinato, ma assaje prupusitivo. S’allargaje a mmancina, cruzzaje (crossò), ce pruvaje mancanno sulo ‘nu poco ‘e pricisione. ALLAN 6,5 Nun se ne putette fà a mmeno!Ricuperaje e arremarraje (ripartí). Cuntinuamente.S’êtte surbettà ‘nu cartellino jalizzo (giallo) ca nun se mmeretava. JORGINHO 6,5 Granna atalossa(prestazione) ‘e ll’ècchese ‘e turno cu ‘na riggia pulita e ppricisa,déttanno ‘e tiempe e urtizzanno (verticalizzando) comme sul’isso sape fà; Sarri ll’à ripurtato a ll’epípete (livelli) suoje. HAMSIK 7,5 - Cuntinuo, volenteruso, sempe ‘int’ô vvivo d’’o juoco sfruttanno ògne pruica (dote) d’uno d’’e centrocampiste cchiú fforte d’Airopa ca se facette apprezzà soprattutto cu ll’ajuda (assist) d’’o primmo stuco (gol) e cquanno abbijaje ll’azziona d’’o siconno. (Dô 78’ LOPEZ sv) CALLEJON 5 Peccato! Fove ll’unico a essere overo necativo, quase ‘nu cuorpo estranio: nun signaje, nun tiraje, nun cupuliaje (dialogò) e nnun fove maje periculuso. (Dô 67’ EL KADDOURI 6 Trasette a mmestiere dint’ô fullè (match). Se facette sèntere cagnanno passo e puntanno ll’ommo e ppo fove isso ‘o fulacco (talismano) cuano: trasette isso i ‘o Napule signaje dduje stuche!) HIGUAIN 7 – Signaje e mmettette ô ssicuro ll’antraffa(partita), ma nn’êsse pututo fà allimmeno tre! Ce mettette ggenio e ccegna (grinta) e ffove sempe tassuso (rapido) a ttirà. Forze pure troppo, cosa ca lle custaje ‘a pricisione. Ma è gghiucatore e sse vedette! INSIGNE 6 [media ‘nfra ll’otto p’’o stuco ca sbluccaje ll’antraffa (partita)ô 67’ e cquatto pe ttutto chello ca nfi’ a cchillu mumento nun êva fatto o êva sbagliato].Sinamparco (comunque) doppo d’’o stuco venette fora rispunnenno ‘ncopp’ô campo ê sische i ê mmaleparole (ingiurie) d’’e pariente ‘e giulietta. (Da ll’88’ MAGGIO sv) ALL.: SARRI 7,5 Pussesso ‘e palla, urganizzazziona, idee, istiglie (verticalizzazioni), suvrappusizzione, triangule; ‘o Napule suojo vincette e cunvincettr facennoce apprezzà ‘o vero Marekiaro e ‘nu Giorgigno nuovo ‘e trinca; tutto ‘o Napule dette ‘a sensazzione ‘e avé capito ‘a lezziona i ‘o juoco suojo cu Insigne e ‘o Pipita ca so’ micidiale. ‘E chella fetenzia ‘e ll’arbitro DAMATO v’aggiu ggià ditto e spiecato ‘o ppecché d’’o quatto ca se mmeretaje. E fermammoce cca. Si dDi’ vo’ ce sentimmo viernarí ca vene doppo ll’allenamento d’ E.L. ca ‘o Napule va a ffà cu ‘o Brugge tenenno ggià dint’â sacca qualificazziona e pprimmo posto ‘int’ô ggirone. Staveti bbe’! R.Bracale Brak