CROTONE – NAPOLI (23.10.16) 1 – 2 ‘A VEDETTE ACCUSSÍ

CROTONE – NAPOLI (23.10.16) 1 – 2 ‘A VEDETTE ACCUSSÍ Eccuce cca guagliú. Alleluja, alleluja! Ajere a ll’ora d’’a tiella se turnaje ‘a Crutone cu ttre punte d’oro dint’â sacca e cu ddoje, anze tre nutizzie ‘mpurtante: ‘a primma fove chella d’’a nichemata cuana (vittoria azzurra), ‘a siconna ca mazzoleni[3] è ssempe cchiú scurnacchiato e ttene corne accussí aute ca si uno lle saglie ‘ncapa po’ ddà ‘a mana ô Pataterno… i ‘a terza ca gabbiadini [4] è accussí ffesso ( e ‘ngenuo da farese jettà fora pe ‘nu carí (fallo) ‘e riazziona ciuoto (stupido) ca s’êsse avuto certamente evità.’Nu jucatore ‘e serie A, ca se fruscia d’essere ‘nu campione, nunn’ ‘e ppo’ ffà cierti fessarie,rijalanno nun sulo n’ommo ô Crutone pe cchiú dde n’ora, ma pure [e cchesto è ppeggio!] pure a ll'Empoli e ppo â vecchia zoccola, facenno ‘o cchiú bbruttu cresemisso ca putesse fa a sSarri, ca ggià nun è esattamente ‘nu tifuso suojo. Però comme jette e ccomme venette se vincette pure si pe ddoje a uno ‘ncassanno n’addaffa (rete) a ppochi minute dô prazzo (dalla fine) quanno se nutaje ‘a stanchezza d’avé jucato pe cchiú dde n’ora ‘ndiece contro a unnece, anze a ddudece cuntanno pure a mmazzoleni, addó – si avessemo tenuto ‘nu vero artigliere (prima punta), d’’e calavrise ne putevemo fa carne p’’e ppurpette. Passammo ê ppaggelle: REINA 6,5 Durante ô primmo ajone (primo tempo) êtte ‘a fa ‘na parata sola ‘ncopp’a pPalladino,mentre po a ll’arrancua (ripresa) riuscette a rribbattere (rintuzzare) ll’attacche calavrise cu ‘nu paratone ‘ncopp’a fFalcinelli ô 75' salvanno ‘o risultato! HYSAJ 6,5 Atalossa (prestazione ) sustanziosa, dinto a ‘nu mumento difficile facennose nutà pure a ll’epata (fase) d’attacco e ppo occupannose ‘e fà ‘a guardia svizzera ‘ncopp’â dritta. MAKSIMOVIC 6,5 Albiollo è oramaje pronto pe tturnà, ma isso nun ne sentette ‘a pressiona e ffove sicuro a ll’epata difenziva (fase difensiva) e gghienno a mmettere ‘a firma sott’â siconna adaffa (rete)[‘a primma soja cu ‘a maglia luvarda (azzurra)], proprio dint’ô mumento cchiú cumplicato d’’a sibbacca (incontro); tanto avastaje pe ffarene ll’airoe (eroe) d’’a jurnata nosta. KOULIBALY 6 Miezu zifo (voto) ‘e cchiú, ma sulo pe cchello ca facette ô 33’ quanno, menatese ‘nnante, ‘ncopp’ a ‘nu tiro ‘e squina (calcio d’angolo) sfresaje (sfiorò) ‘e capa ‘a palla allungannola a mMaksimoviccio ca ‘a mettette dinto p’’o doje a zzero; p’’o riesto però fove spisso distratto e nnunn’ è ‘a primma vota: se facette fottere ‘a Falcinelli, ma menu male ca Reina ce mettette ‘na pezza, po a ll’89’ nun sagliette ‘ncopp’ô tiro ‘e squina (calcio d’angolo) tenenno ‘nghiuco a rRosi ca depositaje ‘a palla ê spalle ‘e Reina signanno ‘o doje a uno facennoce suffrí pe ttutto ‘o ricupero e sinamparco (comunque) se pigliaje ‘o lusso ‘e jucà quase ‘ncopp’ô velluto pe ffurtuna senza auti cunzequenzie necative. STRINIC 6 Sibbacca (incontro) tranquilla, facenno ‘a guardia ‘ncopp’â curzia ‘e mancina e dànno ‘na mana a cCiruzzo.Doppo tanta panca ce vulevano proprio nuvanta minute accussí! ALLAN 6,5 Bbella atalossa (prestazione): ‘ncampo cu ‘o sanco a ll’uocchie contro a ‘nu centrocampo praticamente ‘mmaneche ‘e mutande riuscette a ffà ‘a voce grossa piglianno pussesso d’’a camma (area) centrale d’’o campo e gghienno a ppruponerse pue annante DIAWARA 6,5 Dint’ô mumento no ‘e gGiorgigno ca, a ccurto ‘e sciato, va a dduje, ‘o guaglione ce facette vedé ca sape correre sciuveto e ccu ‘nu bbuonu passo gestiunanno (gestendo) a mmestiere ‘a palla e ffacenno tutto chello ch’ à dda fa ‘nu centrale ‘e mità ccampo. HAMSIK 6,5 - Jucaje sulo pe n’ora, ma fove capace cu ‘o muvimento suojo dint’ê spazzie ‘e mettere ‘ndifficultà ‘e calavrise ca nunn’ ‘o pigliajeno maje, e riuscette a ccrià uperossa pletosa (superiorità numerica)cuntinuamente; peccato can nun cercaje maje ‘a porta! [Dô 62' ZIELINSKI 6 Urdinaria amministrazziona p’’o guaglione ca trasuto a gghiuche fatte, gestiunaje (gestí) ‘a situazziona facenno ‘a guardia â camma (area) ‘e campo soja.] CALLEJON 6,5 Jucaje a lluongo apprufittannose d’’o spazzio ca truvaje a dritta e ca sfruttaje a mmestiere doppo diciassette minute mettenno dinto [isso e nno ‘o terzino calavriso, comme mmece êsse vuluto fa crere chillu strunzo d’’o telecrunista ‘e SKI…] ll’adaffa (rete)‘e ll’uno a zzero, a ll’arrancua (ripresa) però me parette ca fósse stracquo tanto ca mullaje ‘nu poco ll’epata difenziva (fase difensiva) Sarri sbagliaje a ccagnarlo troppo tarde; pure Peppe ‘a ‘nguenta êsse tirà ‘nu poco ‘o sciato: nun se po’ spremmerlo accussí! [Dô 75' GIACCHERINI sv] GABBIADINI 4 Nun lle pozzo mettere ‘e cchiú; e mme spiego: doppo dduje gruosse prane (errori) sotto porta, [ripeto] se facette jettà fora pe ‘nu carí (fallo) ‘e riazziona ciuoto (stupido) e inutile ca s’êsse avuto certamente evità! MERTENS [Ciruzzo] 6,5 Mo comme a mmo p’’o Napule è ‘o rre mMida: chello ca tocca addeventa oro e sse vedette dint’ a ll’azziona ‘e ll’uno a zzero quanno jette a rricuperà ‘nu pallone a mmità ccampo, ‘o strapurtaje ‘ncopp’â linia ‘e funno jabbrannolo (crossandolo) tiso pe cCaglieconno ca ‘o mettette dinto. Nsi’ a ll’82’ fove ‘o cchiú ppericuluso d’’e suoje. [Da ll'83' EL KADDOURI sv] ALL. SARRI 6 Chillo visto ajere nun fove certo ‘o meglio Napule suojo, ma a ‘stu mumento chesto nun ‘mporta; cuntavano ‘e tre ppunte e cchille arrivajeno, cu ttutto ca Gabbiadini facette ‘na granna puttanata, cunfermannoce ca tutto summato ll'idea ‘e Ciruzzo favuzo (centravanti) nunn’ è accussí sbagliata e prubbabbilmente chesto succede cu Empoli e ccu ‘a vecchia zoccola.’E sbagliato ca tardaje a ffà arrepusà a pPeppe ‘a ‘nguenta! Arbitro MAZZOLENI 4,5 ‘A morta civile!E cche vv’’o ddico a ffà? Ma me ll’aspettavo e nnun me deludette e mmo ve dico pecché aggiu ditto ch’è ‘nu scurnacchiato:mannato pe spezzà ‘e passe ô Napule facette tutto chello ch’êv’ ‘a fà caputianno ‘e carí. (falli), nun ne siscanno tante e nnun nutizzianno (ammonendo) cchiú ‘e ‘nu calavrese;però ‘a cerasella ‘ncopp’â pizza doce ‘a mettette quanno ô 31’ giustamente jettaje fora a gGabbiadini pe ‘nu carí (fallo) ‘e riazziona, ma po nun ghiettaje fora pure a fFerrari ca ll’aveva pruvucato cu ‘nu carí (fallo) carogna ê spalle… tutto chesto sempe che nun fove proprio isso, ‘stu bergamasco ‘e ppuppú ca, ‘nzurfato dâ vecchia zoccola, nun êsse mmezziato a fFerrari ‘e pruvucà a gGabbiadini, menannolo ‘nterra cu ‘nu caucione! E ffermammoce cca. A ‘stu punto cu ‘o Milanno e ccu ‘a Roma ca ‘ncrassifica ce so’ zumpate ‘a cuollo, e ccu lLazzio e tTurino ca ce stanno tampunanno penzo proprio ‘e vedé ‘mpericulo ‘nu bbuonu piazzamento. Sperammo ca me sbaglio! E cu cchesto ve saluto e si ‘o Signore ‘o vvo’ ce sentimmo â prossima vota, doppo d’’o fullè (match) cu ll’Empoli. Staveti bbe’! R.Bracale Brak