NAPOLI - ROMA ( 15/10/16) 1 A 3 ‘A VEDETTE ACCUSSÍ

NAPOLI - ROMA ( 15/10/16) 1 A 3 ‘A VEDETTE ACCUSSÍ Ll’uoglio a copp’ô peretto,guagliú! Nuje ggià stevemo malamente ‘ntussecate pe ll’azzimma (sconfitta) ‘e Bergamo e pe ll’arisabbo (infortunio) capitato a Arcadio Milikco... neh mannaggia chello ca nun se po’ ddicere ajere a ll’ora d’’a tiella ‘e cuane (azzurri) aumentajeno ‘a ddose e rignetteno ‘a mesura visto ca fovemo custrette a assistere a ll’arcatiffo (blitz) ‘e chilli quatto pecurare d’’a Roma ca dint’â primma ancerca (anticipo) ‘e ll’uttava jurnata d’’o campiunato ‘e serie A riuscetteno a vvencere ô san Paolo cundannannoce â siconna azzimma (sconfitta) cunzecutiva cu ‘na granna atalossa (prestazione) d’’o nassía (attaccante) Dzeko ca ce facette dduje stuche (gol)favurito da ‘na marcatura sbagliata e da doje fessarie[e ppo ve dico] d’’e madaffie (difensori) nuoste, mentre p’’o Napule risultaje assaje pesante ‘a chiabba (assenza) d’Arcadio datose ca Gabbiadini nun se dimustraje a ll’altezza d’’a situazzione. Pe pparta soja ‘a roma nun è ca facette cape d’angelo, ma chellu ppoco ca facette ‘o ffacette bbuono i ô mumento adatto mentre ‘o Napule facette ancòra ‘e meno e ppe gghionta ‘e ruotolo smarrunaje e fforte ‘nu paro ‘e vote. ‘Nzomma comme jette e ccomme venette ajere abbuscajemo facennoce surpassà ‘ncrassifica dê pecurare rumanise. E mmo s’à dda vedé ches’à dda fà pecché ‘e chistu passo ce mettimmo ‘ncopp’ a ‘na bbrutta scesa. E ‘sta cosa nun ce piace! Passammo ê ppaggelle: REINA 6,5: Nun ce putette fà niente ‘ncopp’a ll’adaffe (reti) d’’a Roma; p’’o riesto nun venette quase maje disturbato, ma, quanno capitaje, cu dduje taculle (interventi) pruvvidenziale ce sparagnaje ‘nu sarbo (passivo) cchiú ppesante. HYSAJ 5: Tenette ‘ncopp’â cuscienza ‘a siconna adaffa (rete) signata ‘a Dzeko pecché, stannole arreto e nno ‘nnante, sbagliaje ‘a vasumma (marcatura) conzentenno ô pecuraro rumanese ‘na cabbesera (colpo di testa) senza manco zumpà. MAKSIMOVIC 5,5: À dda ancòra diggerí ‘e ttacníe (meccanismi) d’’a trasera (difesa) d’’o Napule e soprattutto à dda capí ca quanno ave palla à dda fà arremarrà (ripartire) ll’azziona senza rallentà ‘o juoco passanno sistematicamente palla arreto ô purtiere; ma cumplessivamente l’atalossa (prova) fove quase caffa(sufficiente)pure si fósse meglio ca Sarri lle spiegasse súbbeto ca quanno ‘o cumpagno ‘e sezzione (reprto) jesce p’appilà ‘nu pertuso, à dda lassà chello ca sta facenno e à dda jí a ppiglià ll’avverzario ca ‘o cumpagno steva marcanno senza lassarlo sulo comme succedette ajere ‘ncopp’â primma adaffa (rete) signata ‘a Dzeko. KOULIBALY 5,5:’Nu zifo (voto) ‘e cchiú ‘e quanto se fsse mmeretato, ma sulo pe ll’ adaffa (rete) signata; si no ll’êsse miso 4,5 pecché smarrunaje assaje dint’a ll’azziona d’’a primma adaffa (rete) rumanese quanno mmece ‘e dà palla a rReina ca ‘a steva aspettanno o ‘mmece ‘e menarla ‘ncurva se ‘ntalliaje a ‘nu passo dâ muntaca (area di rigore) nosta facennose levà palla ‘a Salah ca però ‘o ffacette cu ‘nu carì (fallo) senza ca chillu scurnacchiato ‘e damato siscasse e ssuccedette ‘o llutto; bbuono p’isso ca po riuscette a ttruvà ll’adaffa (rete) d’’o catiffo (momentaneo) uno a ddoje. GHOULAM 5: appressuraje (spinse), pure si cu ppocu zuco sempe cu ttubbatta (costanza), ‘ncopp’â curzia soja, ma se dimustraje cafillo (distratto) ‘ncopp’a ll’adaffa (rete) ‘e Salah! ALLAN 5,5: Ce mettette cegna (grinta) ma sufferette a ccentrocampo comme a ttutte ‘e cumpagne ‘e sezzione (reparto). JORGINHO 5: Poco mascullo (brillante) e ttroppo cumpassato dint’â bbinata (costruzione)’e juoco; ‘nzomma ‘na mubbara (partita) ‘e muiàna (sofferenza) p’’o brasiliano. HAMSIK 5,5: Nun ce simmo: atalossa (prova) acrumatica (incolore) d’’o capitano cu quacche sfregazzo (sbavatura) supierchio. Pe gghionta ‘e ruotolo se vedette ca nun steva a pposto benniamente (fisicamente). [dô 76’ ZIELINSKI sv trasuto troppo tarde nun putette fà niente]. CALLEJON 6: Nun fove certo una d’’e mmeglie mubbare (partite) ‘e Peppe ‘a ‘nguenta, ca nun riuscette quase maje a rennerse periculuso, però se facette ‘o ssuojo a ll’epate ‘e riplico (in fase di ripiegamento) [dô 78′ EL KADDOURI s.v.inutile]. GABBIADINI 4: Ca nun fósse ‘nu primmu nassia (punta) ggià se sapeva, ma ajere distraje abbunnantemente ca nun è pproprio ‘o tipo ca po’ rimpiazzà a Arcadio Milikco: stazziunaje sempe fora d’’a muntaca (area di rigore) i ‘e ppoche vote ca trasette nun pigliaje maje pallarisultanno sempe o troppo annante o tropp’arreto â stessa, ‘nzomma ‘ngagnaje (deluse) ògne tuacchia (aspettative) e sSarri ll’êtt’’a levà pentennose [dô 55’ MERTENS 5 Miso a ffà chello ca nun è, cunchiudette poco]. INSIGNE 4,5: Nun ce simmo: atalossa (prova) acrumatica (incolore) ‘e Lorenzigno ca a ppietto ‘e ll’anno passato nun riesce cchiú a ttruvà ‘a strata ‘e ll’adaffa (rete) nè lle riesce cchiú ‘e zumpà ll’ommo! All. SARRI 5: Quanno se perde ‘a sfarma (colpa) è ssempe primma e ppure d’’o mutarribbo ( allenatore) ca ajere mettette ‘ncampo ‘nu centrocampo sbagliato e uno comme a gGabbiadini ca nun è pproprio ‘o tipo ca po’ rimpiazzà a Arcadio Milikco; ô posto suojo avesse dô primmo mumento miso ‘ncampo ‘na mediana cu Allanno, Zielinski e ccu rRoggo mentre ‘nnante êsse miso Caglieconno a ccentro cu Mmertenso e ccu Giaccherini ‘a cca i ‘a lla. Però pavano a isso no a mme! Arbitro ORSATO 4 E nnun me facite parlà! E ccu cchesto ve saluto e, ccu ‘o vveleno ‘mpont’ô musso, vve donco appuntamento, si dDi’ vo’, a ggioverí ca vene doppo d’’o scontro casalinco ‘e ciampionsa cu ‘e turche d’ ‘o Besiktasso, speranno, si ‘e cestarielle comme a ggiggino-uocchie-stuorte, pure ajere prisente ‘ncopp’ê bbemate (spalti) nun ce rompono ‘o pasticciotto, speranno ‘e nun assummà ‘a terza mazziata ‘e fila,ma ‘e cagnà finalmente ll’attià (tred) necativa accumminciata a bbergamo. Staveti bbe’. R.Bracale Brak