JUVENTUS – NAPOLI (29.10.16) 2 A 1 ‘A VEDETTE ACCUSSÍ

JUVENTUS – NAPOLI (29.10.16) 2 A 1 ‘A VEDETTE ACCUSSÍ Tengo ‘o bbeleno fino a ‘mpont’ô musso guagliù e ‘na collera ‘ncuorpo ca mo chi sa’ quanno me passa e ssi me passa visto ca ajeressera a ll’ora d’’o diggestivo nujeaute ‘ntribbuna divano affullata ce ‘ntessecajemo vedenno ca ‘a vecchia zoccola tene cchiù cculo ca anema e riesce a vvencere pure quanno nun s’’o mmereta e nnun fa niente pe vvencere ‘a fora ‘e sfruttà a mmestiere quacche marrone d’’a trasera (difesa) avverzarja, comme succedette ajeressera quanno pe ddoje vote Ghoulamme[3] smarrunaje assaje rijalanno ddoje palle velenose pe nnuje cu ddoje marduffe (respinte) a scampulo ‘e mele cotte, pe nnun dicere a ccapa ‘e cacchio, cundannanno ‘o Napule a tturnarsene dô jummerdummo stadium ‘e Turino cu ‘na vranca ‘e mosche ‘mmano addó , p’’a sibbacca(incontro) ca facette, levanno chelli ddoje amàrteme (erroracci), lle fósse juto stritto pure ‘nu rusimmo (pareggio) e ‘mmece, ‘mmece jette comme jette pecché – comme se dice a llengua tagliana – “contro il cul ragion non vale”! Passammo ê ppaggelle: REINA 6 ‘A fora ‘e duje bbuoni tacculle (interventi)[uno ‘ntuffo,e n’ato ‘e pere fora dâ muntaca (area di rigore) ] nunn’êtt’’a fa nisciuna prudezza; traduto ddoje vote ‘a Ghoulamme nun ce putette fa niente ‘ncopp’ê ddoje adaffe (reti) juventine, ch’êtte ‘a ‘ncassà senza sfarme(colpe) ! Elseid HYSAJ 5,5 Nun pozzo darle ‘o seje pecché appressuraje (spinse)poco e ssufferette qanno Alex Sandro sagliette; ‘o guaglione nun è ancòra chillo visto p’’a tempurata (stagione) passata. CHIRICHES 6,5 – Na granna chiusura ‘ncuoll’ô traditore durante ô primmo ajone (primo tempo). Futtutto e frasturnato dâ primma fessaria ‘e Ghoulamme ca nun se puteva aspettà se perdette a bBonucci, ma p’’o riesto fove ‘na sicurtà (sicurezza) fatta ‘e cuncentrazziona e pruntezza. KOULIBALY 5,5 Miezu zifo(voto) mancante pecché jette meglio ati vvote dàtose ca ajeressera facette quacche sfregazzo (sbavatura) soprattutto ascenno; però cumbattette bbuono cu mMandzukiccio. GHOULAM 3 E ll’aggiu trattato!Pe cchello ca ggià v’aggiu ditto fove carrittuso (disastroso) visto ca cumplessivamente po nun appressuraje (spinse) maje sbaglianno troppi vvote:s’i’ fósse stato ô posto ‘e Sarri ll’arrancua (ripresa) nun ce ll’êsse fatta jucà! ALLAN 5 ‘Nu zifo(voto) mancante pecché facette coccosa sulo durante ô primmo ajone (primo tempo) visto ca a ll’arrancua (ripresa) stracquo s’assettaje comme quanno ‘mmece ‘e seguí ll’azione d’’o doje a uno se fermaje cunzentenno ô traditore ‘e tirà libbero e ffranco a bbotta sicura. Prano (errore)’a casticarlo cu ‘e cicere sott’ê ddenocchie arreto â lavagna. [Dô 76’ ZIELINSKI 6 Trasette troppo tarde a frettata ggià mmenestata e pputette fà poco: quacche tammisso guizzo, ‘nu tiro e quacche rricato (dribbling) êsse avut’’a trasí mez’ora primma.] DIAWARA 7 Nchiudette ògne linia ‘e pasiglio (passaggio) jancoennere, se facette vedé, prupunennose, cercaje ‘a palla, naviannola (smistandola) a mmestiere. ‘Nzomma ‘na granna atalossa (prestazione) ca custrignette Allegri ô 76’ a llevà a Hernanesse ca a ppietto cu ‘o guaglione steva facenno fijurelle. Marek HAMSIK 5,5 – No, nun fove ‘o fullè (gara) ca m’aspettavo dô capitano ca nun fove cúttero (incisivo) e ggiraje a vvacante senza nisciunu tiro e nnisciunu jusaida (assist). [Da ll’81’ EL KADDOURI s.v. Trasuto troppo tarde, a frettata ggià fatta, nun putette fà niente] CALLEJON[Peppe ‘a ‘Nguenta] 7 Raramente Peppe ‘a ‘Nguenta sbaglia ‘na mubbara (partita) e ppure ajere se facette apprezzà nun sulo pecché, abbruscianno ‘a tràsera jummerdina e recuglienno ‘o jabbro ‘e Lorenzigno, ‘o mettette a ppitoffio a bbuffonne mettenno ‘a firma soja sotto ‘a settima adaffa (rete) ‘ncampiunato, ma pure pecché spisso turnaje pe ddà ‘na mana a Hysaj ‘ndifficultà cu Alex Sandro cu ‘a solita fatica ‘ncopp’â curzia. MERTENS [Ciro] 5,5 Me ósse aspettato ‘e cchiú ‘a Ciruzzo, ma ajeressera dint’â morza ‘e Bonucci e bBarzagli fove ‘o meno mascullo (brillante) d’’o rammo (tridente) cuano (azzurro). INSIGNE[Lorenzigno] 6,5 Primmo ajone (primo tempo) nUrmale, po ô 54’ truvaje ‘o bisciú (gioiello) ca cunzentette a pPeppe ‘a ‘Nguenta ‘e afferrà ‘o russimmo (pareggio) ‘e ll’uno a uno; criscette passanno ‘e minute e si nun fove pe ‘nu ‘mpiccio jasado (fisico), ca però nun me parette nè a mme nè a lLorenzigno ce fósse, nnun me spiecaje pecché Sarri ‘o levaje! (Dô 61’ GIACCHERINI 5 Avette mez’ora ‘e tiempo, ma nun facette praticamente niente!) all. SARRI 5 Soprattutto pecché se perdette e cquanno succede è ssempe pure sfarma (colpa) d’’o mutarribbo (allenatore): ‘o Napule jucaje ‘na sibbacca (incontro) urdinata,ma poco cuncreta e pperò nun se fósse ‘mmeretato d’abbuscà, però i (cambi) nun cunvicetteno e sbagliaje a ttené ‘ncampo ‘nu Ghoulamme overamente carrittuso (disastroso)ca po fove chillo ca ce facette chiagnere! Arbitro ROCCHI 5 Carta canusciuta d’’a scuderia Agnelli, grossi ffetenzie nun ce facette, ma, appaurato ‘e se vedé assuttiglià ‘a busta-paca, lle mancaje ‘o cuorio ‘e fà tutt’’o duvere suojo e doppo ‘nu paro ‘e cartelline jalizze (gialli) ne sparagnaje troppe aute ê jucature jummerdine! I a ‘stu punto che putimmo dicere? Sulo ca, avenno miso cu ‘a (sconfitta) d’ajeressera ‘nu crucione ‘ncopp’ô campiunato, ce attocca ‘e scurcarce ‘e mmaneche pe nnun fà ati passe faveze e nnun perdere ‘e vista allimmeno ‘e piane aute d’’a crassifica e repigliarce pure ‘nCiampionsa accumincianno ggià da marterí ca vene contr’ ê turche d’’o Besiktasse! Fermammoce cca e ssi DdI’ vo’ ce sentimmo miercurí doppo d’’a nàcchela (trasferta) turca. Staveti bbe’! Raffaele Bracale Brak