COPPA ITALIA – NAPOLI – INTER 26.01.11 4 -5 d.c.r.

COPPA ITALIA – NAPOLI – INTER 26.01.11 4 -5 d.c.r.
LL’AGGIU VISTA ACCUSSÍ
Che peccato guagliú, che peccato! i’ ‘ngenuamente ce credevo ca ‘o palazzo ce facesse fà ‘o spezziale.... Addó?! Me sbagliaje... ‘O Napule dà ‘mpiccio e lle s’êva spezzarle ‘e passe. E mmannajeno ‘nu mammasantissima spicializzato ‘o signore Valeri ‘nu sischetto rumano ca ati vvote êva purtato bbuono ô Napule e pirciò nun puteva fà suspettà ‘o trave ‘e fuoco!
Passammo ê ppaggelle vva’... chi à avuto, à avuto e chi à dato, à dato:

DE SANCTIS 7.5: Nun sbagliaje niente e facette ‘nu miraculo ‘ncopp’ â bbotta a uocchie ‘nchiuse ‘e Cambiasso; peccato ca nun servette a nniente: avesse avut’ ‘a parà allimmeno ‘nu ricore e nun ‘o facette!
CAMPAGNARO 7 : fuje ‘o solito protonquanquaro d’ ‘a difesa: tuosto,bravo, diciso e priciso; dê pparte soje nun se passaje!S’appresentaje pure annante e tiraje ‘na mazzata ca Lucio respingette cu ‘nu vraccio, ma nè Valeri, nè ‘o signalinea vulettero vedé
ARONICA 6.5: Se facette ô ssolito ‘nu mazzo tanto jucanno ‘na partita assidua, meticulosa, cuscienziosa, senza nisciuna vaviatura.
CANNAVARO 4 : media ‘e 5 cchiú 3: Cumplessivamente riuscette a nmmettere ‘a musarola a ‘nu cliente scòmmeto comme Eto’o perdènnoselo però ‘nu paro ‘e vote e pirciò cinche. Addó ‘a facette assaje fora d’ ‘o rinale fuje quanno jette a ddà fastidio, senza essere d’ ‘o mestiere, ê cumpagne suoje lla ‘nnante... Cumminfatte lle capitaje ‘nu pallone d’oro e ‘o sbagliaje birbiamente (clamorosamente), e pirciò tre. Dich’ i’: Guagliò, si nun sî scarparo, pecché vaje a rrompere ‘o ca**o ê semmenzelle? Ma statte â casa !
DOSSENA 5- : Nun fuje ‘nserata e se vedette subbeto; forze steva ancóra ‘nfruenzato certo si è ca nun smestaje nè difennette comme se putesse pretennere ‘a uno comme a isso. Nun ll’êsse convocato proprio o ll’êsse cagnato assaje primma e nno doppo d’avé sprecato cchiú ‘e n’ora!
MAGGIO – 5 +: ‘A chiena e ‘a vacante: smestaje sí ‘ncopp’ â curzia ‘e dritta e menaje sí paricchi bbrecce ‘mmiezo a ll’aria ‘e ll’Interre, ma maje pricise o penzate. Currette tanto e cquanno avette ‘na bella uccasione Cordoba e n’ato ‘o zumpajeno ‘ncuollo sutterrannelo. Ma Valeri, sbaglianno dicette ca nun era fallo: cose ‘e pazze!
PAZIENZA – 6+: Dint’ ô primmo tempo nun se vedette assaje, ma ‘o ssuojo s’ ‘o facette e ghiette meglio ô siconno tempo quanno pe cquatto vote ‘e sèguito tentaje ‘e risolvere ‘e capa sotto porta.
GARGANO – 6 -: Bravo nfase ‘e cuntinemiento, troppi puttanate ‘nfase ‘e costruzzione.
HAMSIK – 5,5: Pe bbona parte d’ ‘a partita se jette annascunnenno; po fuje troppo tarde quanno se decidette a ddà ‘mpiccio a ll’Interre cu quacche ‘nzerimento e quacche ttaglio ‘mpruvviso. Avette ll’uccasiona bbona pe purtà ‘nvantaggio ‘o Napule, ma nun fuje abbastanza diciso e preciso a cuncludere e cunzentette ‘e rispingere ‘o tiro a Castellazzi ca ajeressera doppo d’ ‘a fijurella marrò fatta cu ll’Udinese venette a Nnapule a ffà ‘o fenomeno!
LAVEZZI - 5: Facette ddoje o tre cusarelle priggevole ma sbagliaje pure quacche passaggio ca nun era difficile... Fa’ ca s’êss’ ‘a arrepusà ‘nu poco? Soprattutto sbagliaje tiranno auto ‘o ricore ca qualificaje a ll'Interre; è gguaglione e à dda crescere: cumminfatte s’accustaje a tirà senza ‘a cuncentrazzione nicessaria e cu troppa vavia (supponenza).
CAVANI – 7-: Fuje isso chillo ca ce pruvaje ‘e cchiú; ce mettette tanta qualità e quantità sia attaccanno ca difennenno, ma nun lle jette comme speraje! S’appustaje pronto a ricevere ‘nu pallone ‘a Lavezzi ca ‘mmece tiraje muollo muollo ‘mbraccia a Castellazzi. ‘Nu gollo ‘o signaje pure, ma ‘o guardalinee ‘e dritta ce ll’annullaje pe ‘nu fuoriggioco discutibbile. Peccato!
dô 70° ZUNIGA 6 -: Mettette ‘a musarola a Maicònno e si smestaje ‘nnante ma senza zuco o risultate.
dô 98° YEBDA 6: Trasette subbeto ‘mpartita cu ‘a nicessaria ‘ntelligenza e cattiveria.
MAZZARRI 5.5: ‘O Napule suĵo sta veramente ‘ncundizzione fisiche eccezziunale currette pe 120 minute. Sbagliaje quacche convocazzione e quacche sostituzzione tardiva Sfurtunato ê ricori, ma isso ce mettette ‘o ssuojo sbaglianno a fà tirà a Lavezzi (meglio Aronica o Campagnaro!) L’arbitro VALERI 3
Già aggiu ditto d’ ‘a fetenzia p’ ‘o gollo annullato a Cavani,ma ce stettero ancóra allimmeno ‘nu paro d’episodie dinto a ll’area ‘nterista e n’ato appena fora (Maggio).
‘Nzomma Vriognoso, semplicemente vriognoso l’arbitraggio ‘e ‘stu signor Valeri. Crediteme seguo ‘o Napoli dô 1954, jevo sempe ô statio, mo m’ aggi’ ‘a vederlo pe televisione e nun è abbitudine mia appellarme pe ll’arbitragge cuntrarie;’o ffacevo sulo quanno ero guagliunciello e ‘e ccose storte me facevano suffrí; mo so’ ppassato ‘e cóveta e nniente cchiú m’êsse ‘a meraviglià, avesse avuto farce ‘o callo a tutte ‘e fetenzie.... Eppure no: me sta venenno n’attacco d’urticaria a penzà ca ajere fujeno 120 minuti ‘e arbitraggio sistematicamente sfavurevole. C'e stato ‘nu viecchio amico ca me dice:"Rafé,sulo ô penziero ca ‘o Napule vence ‘o scudetto me venono ‘e llacreme a ll’uocchie".Puntualmente lle rispongo:-" Pierí asciuttate ll’uocchie,ca nun ce ‘o fanno maje vencere!" Purtroppo ajere avette ‘a cunferma ‘e chello ca dico: ‘o gollo d’’o Zengariello fuje regolare assaje e nun c’era bsogno d’ ‘a zingara p’andivanà si era o no regolare... ‘O guardalinee si nun fosse stato ‘nmalafede se nn’êsse avuto accorgere facilmente giacché nun c'era ‘o difenzore ca saglieva e l'attaccante ca puntava verz’â porta. E ppo Cavani steva arreto â linia d’ ‘a palla! Â Roma contro Cagliari e Cesena ll’ànnu dato dduje golle ‘nfuoriggioco cunclamato...Ma siconno vuje è sulo ‘nu caso? O è pecché Dela nun è ‘na bbella figliola comme a Rosella Sensi? Nun parlammo po d’ ‘o fallo ‘e... vraccio ‘e Lucio e d’ ‘o ricore nun dato a Cavani,ricore cunclamato miso a paragone cu chille ca danno a ati squatre e nun voglio fà nomme!
Tengo ‘o vveleno ‘mpont’ô musso, ma ce sentimmo llunnerí ca vène!
Raffaele Bracale Brak