MACCARUNCIELLE CU ‘E CUCUZZIELLE

MACCARUNCIELLE CU ‘E CUCUZZIELLE

chello ca serve pe sseje perzone

600 gramme ‘e maccaruncielle,
‘nu kilò ‘e cucuzzielle vierde e piccerenielle,
‘nu bicchiere d’ uoglio ‘auliva dunciglio,
‘nu spiculo d’aglio ammunnato e scamazzato,
ddoje bustine ‘e safrone,
‘nu bicchiere ‘e latte retunno caudo,
100 gramme ‘e pecurino rattato finu fino
‘nu granne tuppeto ‘e fronne ‘e vasenicola lavate, asciuttate e ntretate a mmano senza curtiello,
sale duppio ‘na vrancata,
sale fino e pepe janco mmacenato a ffrisco q.n.s.

comme se fa

Spuntà e llavà ‘e cucuzzielle; tagliarle a rundelle ‘e miezu centimetro; dinto a ‘na prupurziunata tiella auta ‘e sponna ricà ll’uoglio e fà piglià culore ô spiculo d’aglio ammunnato e scamazzato; appena è pronto levà ll’aglio e fà zuffijere a ffuoco miccio‘e rundelle ‘e cucuzzielle;quanno se songo ammusciate, bagnarle cu nu bicchiere ‘e latte retunno caudo addó so state accumpliate ‘e ddoje bustine ‘e safrone; agnadí ‘o ccaso pecurino, accuncià ‘e sale e ppepe, cummiglià ‘a tiella e lassà cocere pe ‘nu quarto d’ora sempe a ffuoco miccio. Fraditanto àrvere ‘e maccaruncielle teniente teniente; scularle e revacarle dint’â tiella cu ‘e cucuzzielle; tuiglià a ffuoco miccio pe ‘nu paro ‘e minute, ‘mpiattà e dderrammà ògne purzione cu abbunnante ttrigliato a mmanosenza ausà ‘o curtiello ‘e vasenicola. Serví caudo ‘e fuculare.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale




.