VERMICELLUNE Â GGRAVUNARA ‘E VERDURE

VERMICELLUNE Â GGRAVUNARA ‘E VERDURE
chello ca ce vo’ pe sseje perzone:
600 gramme ‘e vermicellune,
4 cucuzzielle piccerille e vvierde,
200 gramme ‘e fasulille,
200 gramme(piso lisso =peso netto) ‘e cemmetelle ‘e vruoccole ‘e rapa ammunnate e lavate,
‘nu bicchiere d’uoglio ‘auliva dunciglio,
‘nu cerasiello percante (piccante)lavato, asciuttato e grabbato (inciso) p’ ‘o lluongo,
100 gramme ‘e pecurino rattato finu fino.
‘nu spiculo d’aglio ammunnato e scamazzato.
miezu bicchiere ‘e latte retunno,
5 ova,
sale duppio ‘na vrancata,
sale fino e ppepe janco mmacenato a ffrisco q.n.s.,


comme se fa

Spuntà, lavà e ttaglià a rundelle ‘e cucuzzielle e a pezzulle ‘e duje centimetre’e fasulille; privati degli eventuali filamenti; lavà cu acqua fredda ‘e cemmetelle ‘e vruoccole ‘e rapa ammunnate,
e scularle;scuttà dinto abbunnante acqua salata (vrancata ‘e sale duppio) vullente apprimma ‘e cemmetelle ‘e vruoccole e ppo ‘e fasulille; sculà ‘e vverdure e tenerle ‘ncaudo,astipanno ll’acqua ‘e cuttura.Ricà dinto a ‘na tiella a sponna auta e pruvvista ‘e cupierchio ll’uoglio, agnadirve ll’aglio ammunnato e scamazzato e ‘o cerasiello percante (piccante)lavato, asciuttato e grabbato (inciso) p’ ‘o lluongo e a ffuoco allero fà piglià culore a aglio e cerasiello; scartà ll’aglio e agnadirve apprimma ‘e rundelle ‘e cucuzielle e doppo tre minute ‘e cemmetelle ‘e vruoccole e ‘ncapo a n’ati dduje minute ‘e fasulille; cummiglià ‘a tiella e sempe a ffuoco allero fa ‘nzapurí tutto pe sette o otto minute a ttiella cummigliata. A ll’urdemo regulà ‘e sale fino e e ppepe janco mmacenato a ffrisco; mantenere ‘ncaudo e fraditanto arapí dinto a ‘na ciotola ll’ova, agnadirve ‘o ccaso, ‘o llatte, sale e ppepe e sbatterle forte. Fraditanto fà vollere n’ata vota ll’acqua ‘e cuttura d’ ‘e vverdure e appena ll’acqua jesce a vollere, àrvere pronte pronte ‘e vermicellune; scularle e revacarle dint’â tiella cu ‘e ccemmetelle e ‘a cunnimma.Ricarve ‘a coppa ll’ova sbattute e tuïglià pe tre minute a fuoco miccio; ‘mpiattà e serví caude ‘e fuculare ‘sta ggravunara sabrosa!
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale